近年巴布亞新畿內亞足球喺國際都幾活躍，上年年中喺大洋洲錦標賽中屈居亞軍，年底仲踢多三場友賽，首先主場先對馬來西亞，然後中立場對伊朗，最後作客再對返馬來西亞，最後取得一勝兩負嘅戰積。
可能你聽完會覺得有幾活躍呀，咁計香港咪過度活躍？但請睇睇巴布亞新畿內亞以往不論男女足定大小腳，除圍內比賽，係極少踢友賽，就算被邀約都好大機會推，14年作客新加坡及菲律賓係好罕見了，再對上踢友賽要數到2003年，過往巴布亞新畿內亞當地對足球冇咩重視，但近年得到當地政府及友國協助，成功主辦幾項大賽外仲加強青年訓練，積極同馬來西亞主客友賽作交流，巴布亞新畿內亞足球唔再係會踢先郁了。
不過當地聯賽暫時只屬半職業性質，現時巴布亞新畿內亞球員要踢職業聯賽，就只有出外，因為上年年中喺大洋洲錦標賽表現令人喜出望外，所以有少量球員可以去到新西蘭、澳洲搵食，不過平台空間有限，幸好兩對馬來西亞時巴布亞新畿內亞Nigel Dabingyaba前鋒表現出色，所以球探引線下Nigel Dabingyaba喺今年就去到馬來西亞超聯嘅檳城隊試腳，成為有史以來第一位登陸馬來西亞職業賽場嘅巴布亞新畿內亞球員，若果Nigel Dabingyaba喺馬來西亞發展得好，話唔定仲有第二位巴布亞新畿內亞球員到來。
講到「有史以來第一位」呢個topic，上年馬超嘅彭亨FC都引入過一名阿富汗國腳叫Faysal Shayesteh，現時Faysal已轉去印尼阿雷馬發展，阿富汗同巴布亞新畿內亞都係冇職業聯賽，而阿富汗同巴布亞新畿內亞國家隊水平同馬來西亞都係差唔多，但對於阿富汗同巴布亞新畿內亞嘅球員嚟講，馬來西亞聯賽都算係一個好平台，起碼薪酬待遇唔差，而且比自己國家嘅聯賽專業得多。