【獨媒報導】今日是宏福苑最後一日開放居民上樓執拾，宏泰閣低層住戶歐太準備了「心繫宏福」、「宏福人宏福情常在」及「同根、同心、同行、同在」的標語貼於家中。對於有街坊的訴求被清走，歐太坦言感到「心噏」，想起《聖經》中的「眼中樑木」，認為政府視街坊張貼的心聲如「木刺」覺得「哽眼」，卻不見自己眼中的「樑木」。她強調居民只是希望表達心聲，並不是與任何部門作對：「我哋好努力嗌過救命，但係阻止唔到呢件事發生嘅時候，而家其實我哋個願望只係好卑微。大家可以有一個空間去講自己嘅諗法，講自己嘅心聲。所以我希望大家明白，我哋真係唔係想做任何嘢，只係我哋想忠於自己，講出我哋呢幾個月嘅感受。」
貼標語慰街坊「You are not alone」
宏泰閣低層住戶歐太是三個小孩的媽媽，單位已嚴重燒毁，面目全非，她今天特地帶了象徵全家福的Duffy公仔相片，打算上樓後把它貼在原本位置，「有返少少家嘅感覺」。她向記者展示有象徵一家五口的Duffy 公仔相片，指公仔本來放在電視機櫃上，如全家福一樣。她續解釋，其中兩隻身穿禮服及婚紗的Duffy，是她和丈夫為結婚而準備買的第一件物品，之後每一個孩子出生，他們都會添置一隻小熊代表他們。
此外，歐太亦準備了幾張寫滿心聲的紙，打算貼在窗戶上的當眼位置，其中一張寫上「心繫宏福」，又印有已拆除的毛毛蟲攀爬架及兩對緊握着的手。她指除了代表最掛念、最喜愛的地方之外，亦希望藉此向街坊表達關心：「You are not alone（你並不孤單）、我哋大家都係手牽手同行，面對緊嘅困難都一樣。」
其他貼在窗前位置的標語包括「宏福人宏福情常在」及「同根、同心、同行、同在」。歐太形容，宏福苑街坊的情誼深厚，「唔係咁易放低、唔係咁易取代到」。她特意想向街坊表示：「其實（無論）我哋賣唔賣業權，我哋都係宏福人。大家其實係可以繼續keep住聯絡，大家都繼續係街坊。」另外，她亦準備花束，希望趁還有機會回家「擺低少少心意」，以懷念已離世的街坊，並表示若有機會再次上樓，每一次回去都會準備花束。
引聖經指政府不見自己「眼中樑木」
對於有街坊貼在窗外的訴求被清走，歐太坦言感到「心噏」，想起《聖經》中的「眼中樑木」，認為政府視街坊張貼的心聲如「木刺」覺得「哽眼」，卻不見自己眼中的「樑木」。她續稱，聽證會上已揭示不少部門問題：「政府都可以接受到所有嘅唔理想，老土啲講句。每一個party都係講緊一句說話咋嘛，『呢單嘢唔係我跟開』。」
她又認為災民所貼的標語影響不大，只是普通中英文字，居民亦不是與任何一個機構或政府部門作對：「但你偏偏包容唔到我哋嘅一啲字、我哋嘅小小心聲。」她認為政府應了解居民的情況及心情，不需太敏感看待事情：「只係我哋曾經咁多街坊試過去向公眾發聲、向政府發聲，我哋好努力嗌過救命，但係阻止唔到呢件事發生嘅時候，而家其實我哋個願望只係好卑微。大家可以有一個空間去講自己嘅諗法，講自己嘅心聲。所以我希望大家明白，我哋真係唔係想做任何嘢，只係我哋想忠於自己，講出我哋呢幾個月嘅感受。」
歐太下午三時左右離開宏福苑，她表示張貼過程順利，未有被阻撓，惟警方有提示要確保穩妥。她亦用了「大力膠」及索帶繫緊於窗前橙網上。由於部分財物仍未尋回，因此歐太在離開前已報警，警方亦上樓搜尋過但不果。她為孩子取回一個單車鐵架，希望孩子們可懷念一下，「呢樣嘢係真係曾經同覺得好重要嘅，咁雖然個樣已經變咗，但係我哋都希望俾佢有機會去摸下佢」。她指如果再有上樓機會，希望可以帶同小朋友一起上樓道別，「親自同佢哋人生嘅第一個家講聲拜拜」。
促政府提供較中庸選擇 指災民被放在假兩難局面
至於被問到是否會出售業權，歐太認為居民處於「假兩難」的局面：「好似畀咗好多選擇我，我有樓換樓、我有收現金、我有好多嘅選擇，但係說到尾最終都係賣業權⋯⋯你乖乖哋然後賣業權，咁你就解決咗你嘅問題，至少你有屋住，如果唔係嘅我哋唔理，甚至乎立法攞咗你層樓，咁你就係同我一個對立面。」她認為政府應設有較中庸的選擇，如可利用住宅火災保險為災民重建家園，不需以公帑收購業權，令居民重回原有生活：「其實win-win呀，呢個係雙贏架！但係而家畀我哋嘅選擇係黑同白、either be with us, either against me。」
不賣業權非對抗 僅「好驚我揀錯」
歐太亦坦言，由於現時的資料不足，仍難以決家是否要賣業權，「我單位唔係我自己負責，我背後仲有我屋企人、我嘅小朋友。我做嘅每一個選擇，其實係為咗成頭家負責，唔係一個輕易嘅嘢⋯⋯作為一個災民我真係個驚弓之鳥，我好驚我揀錯」。
歐太重申即使不賣業權亦並非等於對抗政府，「而係根本落唔到決定」。她續指：「小朋友買玩具，我可以幾廿蚊同佢買個盲盒，我而家咩資料都冇嘅情況下，講緊我成家嘅將來，我唔可以幾百萬、咩資料都冇嘅時候，去貿貿然落一個決定。作為小朋友嘅榜樣，我都覺得呢個係一個唔適當嘅決定，我冇去為呢頭家負足夠嘅責任。」