【獨媒報導】宏福苑大火懷疑因宏昌閣工人食煙引起，其後牽連七棟大廈。罹難者最多的宏泰閣是第二幢起火大廈，七旬宏泰閣獨居街坊葉女士向《獨媒》表示，當日起火初時約下午3時正，自己聞到燒焦味道，開門發現操鄉音的外牆工人提早收工，並準備搭升降機離開，但對方僅向她表示火燭「唔係呢座，係隔離啫」。
葉女士家人今日上樓執拾，在落樓後接受訪問，指當日起火時走廊外未有氣味，自己折返單位，鄰居數分鐘後大力拍門提示「走火警」。她才發現防煙門已滿佈濃煙，只能到鄰居家躲避，驚險渡過待救5小時，被救出後留院四天。而收留她的鄰居，正是曾在聽證會作供的宏泰閣1006室居民張次濂。
翻查聽證會資料，起火當日下午2時43分閉路電視拍到宏昌閣出現閃光。有宏昌閣保安則曾作證表示，著火後看不到工人叫喊或者找她。
圖片由葉女士提供
3時已聞「𤓓味」 工人提早個多小時走
宏泰閣10樓住戶73歲的葉女士憶述大火當日下午在家，約下午3時聞到「𤓓味」，遂打開廁所窗確認。她其後聽到屋企門口有聲音，遂打開大門查看，看到穿制服、工作背心的工人準備搭𨋢離開。她向工人詢問是否火燭，其中一人回應「唔係呢座，係隔離啫」。她指當時走廊外仍未聞到氣味，遂折返單位。不過未幾，葉女士有感「唔對路」，再次打開大門「嗌係咪火燭？」但其時工人已經落樓，左鄰右里也沒有回應。
葉女士表示，當時約3時正看到負責外牆工作的工人，平時自己亦在樓下看到他們，也會看到他們搭升降機收工，記得對方操鄉音：「你唔識佢講乜，總之又唔係國語。」她續指平時工人不會這麼早收工，一般都要4時多才離開。
圖片由葉女士提供
鄰居拍門收留 待救5小時
葉女士指回家數分鐘後，鄰居曾大力拍門提醒走火警：「我初時成個人都戇居居，我冇諗到呢個情形，不嬲火燭如果隔離嗰座，你慢慢落樓睇下咩環境啫嘛。」在打開後樓梯防火門後，她才發現事態嚴重，「你真係冇可能落到去，啲煙卷住咁上嚟，刺鼻」。
其後葉女士獲該對鄰居夫婦收留，正是曾在聽證會作供，憶述收留鄰居和待救經過的宏泰閣1006室的居民張次濂。葉女士指張次濂曾潑水救火不果，最後只能一起在家中等待救援：「當時唔係好大煙，但我感覺啲手燻黑晒，手指甲都已經黑晒，擤鼻涕又黑。」
圖片由葉女士提供
接回撥電話後爆喊 感激前線消防員拯救
她指等到救援到晚上，自己接到回撥的電話已經「爆喊」，並不禁說：「你哋咁樣再安撫我係冇用嘅，我聽咗好多啦，我話我依家想出去，就嚟頂唔順啦，我真係冇空氣。」在苦待5小時，3人終於等到消防員救援，她指：「最後嗰刻我曾經諗過我係咪真係就咁死咗？」
葉女士感激前線消防員的拯救，指當時自己剛完成膝蓋更換手術10日，需要攙扶下樓。她還記得逃出生天後：「落到嚟望到個天，唞到啖新鮮空氣，我就好舒服。」。
在被救出後，葉女士留院4天才能出院，鄰居夫婦則留院多天。她表示自己搬入宏福苑不足兩年，與鄰居不是很熟絡，十分感激張次濂夫婦協助：「如果我喺自己間屋，一個人都唔知點算、好無助。」她引述張次濂之後常激動說，大家「共過生死」，至今仍有保持聯絡。
圖片由葉女士提供
今無上樓 盼下次有機會
葉女士慨嘆，大火至今從未曾開心，「日日睇到新聞我都流淚」，並對於家園被毀「一萬個唔甘心」我依家好似流離失所咁」。她獲安置到啟德青年住宿「啟航1331」，最大心願是盡快處理長遠安置：「一個人戇居居，起身我行去邊呢？冇個家嘅感覺。」
在完成膝蓋手術後，葉女士現已康復七八成，她原本擔心上樓環境惡劣，所以今日由家人代勞執拾。不過她說如果有下次機會，都想回家看看。
女婿李先生
女婿代上樓執拾 指難斷捨離
葉女士的女婿李先生表示，自己曾與外母一家四口曾同住宏泰閣，今天上樓看到家中部分地方沒有被焚毀，客廳則剩一半未被波及。他指今天上樓取回多袋物品，包括三隻名錶，並找回妻子的嫁妝、兒子小時候的相片及玩具。
李先生又說當初找好朋友裝修單位，對方早幾個月不幸過身，這個單位就是他的「遺作」，無奈說「人又走咗，間屋都燒埋」：「呢度住得幾好，俾啲人為疏忽搞到冇咗間屋，冇咗成條村。」
李先生最後指曾想過斷捨離，但上樓後發現做不到：「所有嘢都係好想要、好想帶走，奈何時間、人手問題，你冇可能全部嘢攞得走晒。」