（獨媒報導）昨日（4月15日）是「全民國家安全教育日」，國務院港澳事務辦公室主任夏寶龍講話時，斥美國總統特朗普關稅政策荒謬，新民黨主席葉劉淑儀形容中國人「好捱得嘅，亦都打得嘅」，稱要與美方對等談判，「要習主席去call特朗普，就唔好諗啦。」對於夏寶龍提及商人需顧及國家利益，葉劉淑儀指任何港商「純粹利益當頭、唔顧國家利益呢，係唔會有好嘅結果。」
夏寶龍亦大篇幅提醒港人要留意「軟對抗」，葉劉指社會不要因國安大案告一段落而鬆懈，仍有不少美國的代理人在港「迷惑人心」，強調教育十分重要，但稱「國家安全唔係叫你隨便去拉人」。
葉劉淑儀（資料圖片）
稱中國人「好捱得」：「要習主席去call特朗普就唔好諗」
夏寶龍昨日發表視像講話，新民黨主席葉劉淑儀今早在港台節目解讀。她斥美國徵收對等關稅荒謬，認為夏寶龍講話是要向美國人展示強硬態度：「我哋中國人係好捱得嘅，亦都打得嘅，我哋唔怕佢打嘅。」她指特朗普「希望人人都向佢跪拜、求饒」，中美可展開正式貿易談判，但中國不會「獻媚」：「要習主席去call佢嗰種，就唔好諗啦呢啲，擺到明啦。」
夏寶龍昨日發表視像講話
至於貿易戰對雙方的影響，她指中國向加洲大量採購農產品，又向德洲購入不少石油、天然氣，認為「美國係唔會又有利益囉，最終佢係會輸囉。」
提醒港商「純粹利益當頭、唔顧國家利益呢，係唔會有好嘅結果」
長和擬出售全球43個港口，引起「國家安全」顧慮，夏寶龍昨日未有點名李嘉誠，僅指香港商人有愛國愛港傳統，並引愛國商人莊世平和霍英東為例。葉劉認為夏寶龍是想提醒香港企業家「唔好淨係喺利益方面著想」，應該「時時都要記住國家嘅利益」，「如果純粹係利益當頭、唔顧國家利益呢，係唔會有好嘅結果。」
主持人問到夏寶龍是否「意有所指」，葉劉稱大家「自己解讀啦」，強調屬「嚴厲嘅警告」。她稱商人與國家利益並無衝突，指本港最大貿易夥伴為內地，「地產商都明白㗎啦，咩人嚟買樓最多？金融界都明白㗎啦，邊度資金流動最多？」雖然有企業全球發展，對此「諗法唔同」，但認為與國家關係不好「始終我認為佢係會蝕底嘅。」
夏寶龍
葉劉：港人應與國家站在一起
在貿易戰下，港人應如何自處？葉劉表示要「同國家站埋一起」，港府則應積極「擴大朋友圈」，増加與中東等地的貿易往來。但葉劉認為港商不需放棄歐美市場，「美國都唔係單一嘅板塊嚟㗎，佢哋有好多不同嘅意見。」她指美國不少民間學者和中立的獨立智庫，反對特朗普政策，認為港人要與美國民間「打交道」，爭取美國民間支持，「講畀美國人知，你哋嘅政府做嘅嘢，係傷害你哋嘅利益。」
不過她提醒與美國政界溝通時，要「保持頭腦清醒同埋冷靜」。
葉劉：國家安全唔係叫你隨便去拉人
夏寶龍亦講到要提防「軟對抗」，更稱美國在港代理人將加速滅亡。主持問到政府是否需要加強國安工作，葉劉指「國家安全唔係叫你隨便去拉人，香港係法治嘅地方。」她強調昨日是國安「教育日」，夏寶龍講話是提醒港人時刻警惕，「唔好以為嗰啲國安大案差唔多告一段落，就無國安威脅。」
她稱香港「係十分開放」，有極高資訊自由，導致不少代表美國利益的代理人在港「散播啲假嘅消息呀、迷惑人心」，特別針對青年人，吹捧美式民主自由：「但係大家都睇到啦，美國民選出嚟嘅領導不斷打壓自由、欺壓其他國家。」
葉劉表示「完善」選舉制度後，政府持續將「反中亂港」人士排除在政治制度之外，但稱「我哋制度始終係開放」，需小心有人「政治化妝」。