【獨媒報導】第五波疫情下，公立醫院病房爆滿，醫管局在急症室外設臨時帳篷，予未能入院的病人等候。天文台下午發出寒冷天氣警告，醫管局表示爭取今日內安排所有病人到室內，醫管局總行政總經理何婉霞稱，憂慮戶外病人的身體狀況：「無論點困難，都會盡所有全力，目標都喺今日之內安排晒病人返到去室內。」
強調會考慮通風、人流情況
醫管局表示，正騰空公立醫院內的室內地方予入院病人等候，包括員工後勤房間、門診等候區、走廊和其他可用空間，強調會同時考慮通風和人流情況。何婉霞形容該項工作困難，因為醫院的室內空間擠迫，但透露政府正安排醫院以外的場地，轉用作病人等候區，詳情有待食衞局公佈。
何婉霞：宜家都好凍，嚟緊呢兩日都會繼續凍
在下午的疫情記者會上，有記者追問，是否有信心能即日移送所有病人到室內，何婉霞就稱：「其實唔好講嚟緊，宜家都好凍，嚟緊呢兩日都會繼續凍。我諗呢度所有人其實都唔忍心見到啲長者，因為等緊入院而喺出面捱凍。咁所以點解我哋會話用盡一切方法，無論室內所有環境，我哋都希望將等緊嘅長者移送返室內，呢個係我哋好想做到，亦係我哋希望做到。」
至於在急症室外失救而離世的人數，何婉霞則未有正面回應，稱同事已加強巡查年幼病患者及長者，「紀錄係逐步安排緊入院」。
此外，醫管局已將部分情況較穩定的病人轉到北大嶼山醫院香港感染控制中心、亞洲博覽館治療設施和竹篙灣社區隔離設施，以騰出更多醫院病床。