【獨媒報導】太子獨立書店「留下書舍」早前涉售賣煽動意圖刊物，被國安處搜查。事隔一個多月後，書店今日（26日）起重開至30日作結業清貨。有市民把握最後機會買書，未開門已在店外等候，重開不久店內更已人頭湧湧，門外亦人龍不斷，一度排至地下。
留下書舍今日下午1時至9時恢復營業，《獨媒》在開門前15分鐘到訪書店，門外已有約10名客人等候，樓梯口原貼滿書藉及電影宣傳海報，惟大部分海報已被移除，亦有客人在牆壁貼上便利貼，寫上「江湖再見」、「清風不識字，亂9封書店」。在開店首4個小時，店內客人熙來攘往，不少人手捧數本書籍排隊輪候付款，窗邊亦貼上「留下數載感謝厚愛，散聚有時後會有期」，以及「你們要努力進窄門」字句，門外亦人龍不斷，一度排至地下。
楊先生
讀者感可惜 稱獨立書店結業令選擇變少
早已在門口等候重開的楊先生是「留下」常客，對於近年獨立書店接二連三結業，他坦言感到相當可惜，忽略小眾非主流讀者的需要。他提及除了獨立書店不同原因結業，舞台劇、演唱會及電影的審批門檻逐漸提高：「咁就變咗大家會選擇會少咗。」他認為民主社會重視多數服從少數，但強調更重要的是多數人亦要尊重少數人，部份LGBTQ+及同性婚姻等議題亦摸不清政府政策取向：「一時話好多元共融要包容社會，但係有陣時突然之間好似踩中咗紅線就冇咗。」
楊先生喜歡關於採訪及攝影的書籍，認為可從不同角度理解一段新聞，指「留下」正正有不少此類書：「社會要百花齊放、五花十色，就係同一件事唔同角度去睇，係會刺激到思考。」他又稱「書店有別於一個只係賣書嘅地方，就係成個空間氛圍同店長店員嘅溝通」，並指「留下」最特別是深宵營業：「你夜晚瞓唔著，11點仲有乜嘢書店有開，可以上嚟打書釘，（其他地方）又好似未搵到。」
他又稱「香港人重視選擇」，認為大家喜歡獨立書店因可滿足小眾讀者：「佢有一啲嘢主流市場冇，我先會跨區、其他17區嘅人都要嚟呢度去買」。他笑指如沒有獨立書店，「全部人都係食 canteen咁樣都唔開心」，認為最重要「有得揀」，指投票亦是一種選擇的形式，人民精神要關顧弱勢社群需要，令少數人都可以和諧共處。
他續指，書店經營困難及生存空間屬各自原因，認為「香港人不嬲都係識走位、靈活變通，你話個框喺邊度，我就喺個框入面容許空間嗰度營商」，惟稱「你所謂嘅紅線或者個框架好似無定向」，指當局不設禁書名單，令「框架」變得模稜兩可，政策模糊令大家無所適從，「每個行業或者普通消費者市民都喺度適應緊一個新嘅環境」。
被問到會否擔心進一步限制市民買書？他認為未至於落在消費者層面，但或會觸動部分讀者「早買早享受」心態，「買咗返屋企有時間再睇，因為你唔知道今日賣得嘅，聽日可能唔賣得，聽日賣得後日又唔賣得」。
Ben
六旬讀者入手8本書：一半買嚟睇、一半係心意
年逾60歲的Ben亦是「留下」多年顧客，臨別之際一口氣入手8本書。他向《獨媒》表示，得知重開便馬上前來買書：「知道都會人多，賣咗之後就冇啦嘛，賣一本少一本，以前有啲書係想買，問題係屋企太多書籍，買完睇唔切又要清出去……但係而家到咁樣關頭，其實一半真係想買返嚟睇，另一半係就有啲心意。」
談到連鎖的書店，Ben指他們有一套既定的書單，不如獨立書店各有特色及性格，指「留下」有新聞界背景，認為較多書籍關於基層及弱勢社群。他笑言，自從獨立書店如雨後春筍出現後，再未有去過連鎖書店：「其實佢哋經好格式化，差唔多好似上邊一個指令，咁佢哋個個都係賣個種書。」
至於獨立書店接二連三結業，Ben嘆：「我唔想用『麻木』呢個字，『無可奈何』又好似覺得太過喪志，我覺得係向前行。」他指現實「有閘門」無法改變，但正如「留下」貼出的「你們要努力進窄門」所言。