【獨媒報導】紀錄英華女校學生10年成長的《給十九歲的我》，其中一名受訪女生阿聆向《明周文化》撰文指從未同意公映，引起極大爭議，影片昨宣布今日（2月6日）起暫停公映，不少觀眾趕在昨晚觀影，多個場次皆告爆滿。昨晚8時20分Cinema City朗豪坊的一場，導演張婉婷按照原定安排現身映後分享，她向入場者致謝，稱「咁夜我仲見到有咁多人」、「我真係好感動，多謝大家！」
張婉婷昨日有多場「謝票」，並在映後見記者。在最後一場，她首先向入場者致謝：「多謝大家，咁夜我仲見到有咁多人，同埋今日係元宵節，我真係好感動，多謝大家！」張婉婷又稱「唔知下一場會係幾時，但我見到咁多人都好鼓舞啦，因為近日好多風風雨雨呢，所以學校同我都決定由聽日開始就暫時停止公開放映啦。」她續解釋稱望預留空間處理好「嗰啲大家溝通嘅事宜，或者理解上嘅落差」。她強調對學校而言「人係比電影更重要」：「所以我哋要處理好人嘅關係問題，同埋解答晒佢哋所有嘅疑慮呢，先至或者會再同大家見面啦。」
在答問環節，有觀眾問紀錄片原意是希望拍到英華女學校學生經歷三個不同校舍，但因工程延誤而未能如願，最後是怎樣調整計劃。張婉婷稱初期已覺得「人要擺係最前面」，「呢個故事係睇住呢啲少女成長，所以呢啲千禧BB由2011年到2021年嘅成長係擺係最前面，學校嘅改建擺係後面，中間就睇埋社會嘅變遷，有三層意義喺度，但人永遠擺係最前面囉。」
被問到片中為何堅持要有她的旁白，張婉婷就稱紀錄片「一係用旁白，一係用字幕」交代觀眾要知的資訊，並舉例稱：「例如阿雀佢『生意失敗』，咁點影『生意失敗』呢？將佢好快咁講咗佢去賣眼鏡就生意失敗啦咁樣。」她又指自己作為英華校友，「擺咗自己少少感受喺裡面」，認為自己的旁白與一般的不同，「唔係同BBC嗰啲好冷、好有距離嘅旁白，唔係一樣嘅。」
有觀眾問到如果重新再來，張婉婷會否再願意拍攝，如會又將有何不同處理。張婉婷思索片刻指，「如果早知道呢......我係個啲就算知道，都係有少少一往直前嘅性格，其實我初初都唔知呢個會去邊㗎嘛，但你唔做又點知呢？即係話......我覺得有興趣嘅嘢，就會一路做，好努力咁做囉。如果呢個叫我再做，我都會做落去嘅，係會嘅。」然而，她覺得現時公映版本已經是在海量30多萬小時資訊中「現階段最好」，要幾年後再看才知道改善地方。
被問到為甚麼可以堅持長時間紀錄，張婉婷答道「係一份傻勁」，指起初只希望拍攝6年，但久而久之不覺時間飛逝，「你逐步逐步好易行到落去」。
影片原只作學校內部放映，有觀眾問及為何將影片公映，以及會否直接與片中學生溝通，「想同佢哋講啲咩？」張婉婷重申在2011年有同意書協議，「所有拍紀錄片都係要簽咗先，如果唔係所有人都冇保障嘅，攝影隊亦需要拍咁多年，即係已預咗6年，後面變咗10年，即係知道嗰啲footage可以用嘅，係有咁嘅權利。」
她形容當時的協議是「幾廣義嘅嘢」，即是以後可以在戲院、任何公眾場合、電視各種渠道公開放映，「因為我哋有好多唔同團體界別，有教育界、電影界、青少年界、同學、學生，個個人對所有嘢理解唔係一樣，中間可能有啲理解上落差囉，就係呢個問題我哋覺得應該要正面去處理，所以我哋一定會同啲女仔坐低慢慢傾，呢個一定會做。」