（左起）Farm28李先生種的農作物、Winnie the Farm負責人Winnie、O farm老農田有機農場負責人葉先生
（獨媒報導）農夫一向「睇天做人」，但2025年的夏天天氣特別反覆無常，單是7、8月已發出破紀錄的5次黑雨，踩入9月更發出了今年內第二個十號風球。《獨媒》在上月採訪3位本地農夫，分享今個極端夏天，他們是怎樣走過。酷熱天氣，田間溫度可以高達40度，會令農作物灼傷；雨後立即變烈日，農作物也會難適應容易死亡。連場暴雨更易理解，即使將幼苗收起或墊高，出動水泵，但地處低窪加上民間水泵不是身價百萬的「龍吸水」，逢遇黑雨必然水浸。
既然選擇了與天地「共事」，或多或少農夫也有心理準備，這位「同事」陰晴不定，很自然地想出各種「超前部署」應對。但有時「人」的因素更不可測，例如市場、棕地污染、移民潮、無人入行等， 對行業而言更是致命傷，其中一名受訪的有機農場負責人葉先生說，移民潮帶走一班中產，新一批中產「上流」或者要十年八載，但他們對香港有無歸屬感？畢竟本地農業是一樣很「local context」的生意，若對香港無感情，就難有共鳴。
樺加沙襲港，28號農場多個溫室被大風吹至損壞（相片由28號農場負責人李先生提供）。
連場暴雨 損失「真係唔識計」
《獨媒》在7、8月連場黑雨後分別採訪3名本地農夫，Farm28 (28號農場)位於元朗錦田逢吉鄉，佔地約十萬平方呎，但地勢偏低，今天夏天連場暴雨再加十號風球，令農場多次水浸，負責人李先生形容，今季的農作物幾乎全軍覆沒，農場內多個棚架都比強風吹倒，已種植逾一年的兩棵木瓜樹亦無倖免，「如果用數字去計真係唔識計呀，我哋上次黑雨嘅時候基本上全個場啲嘢都冇曬」。
28號農場中部分農作物受暴雨和曝曬影響而枯死。
李生表示唯一可以做的應對措施，是事先把農作物的幼苗收起或墊高，並預備水泵把水抽走，「呢個就地理問題啦，因為本身我哋呢個場個地勢係偏低嘅，咁紅雨黑雨就一定浸，我哋可以做嘅措施就係儘量泵水走」，但水泵的抽水速度始終有限，無法抵抗暴雨級降雨量，「如果係黑雨嗰啲環境呢都抽唔住」。
樺加沙襲港，農作物被吹倒（相片由28號農場負責人李先生提供）。
超前部署避免total loss
除了近日熟悉的暴雨，其實今天的炎夏酷熱同樣令耕作愈見艱難，農夫在暴曬環境，「分分鐘喺啲棚裏面係超過40度」，另一方面，農作物亦未必能夠抵抗酷熱天氣和曝曬，特別是關鍵的培苗階段，若果天氣異常，「喺苗嗰個階段已經枯咗，一係熱死，一係水浸浸死。」
在梅窩經營休閑農場已8年的Winnie，指今年連場暴雨加上曝曬，導致部分農作物失收，「落完雨呢就出猛太陽，咁啲嘢呢就好容易死」，「嗰啲矮瓜本身種咗一年幾兩年㗎啦，一路都有得收嘅，但係因為今次嘅雨都死咗囉」。
為了避免全部農作物total loss，Winnie會分開播種時間，即使前一批死去，也可以用後一批補上。另外，她亦盡量在風雨到來前收割，盡量減輕損害，她坦言「損失呢就預咗㗎啦」。她以往打風「超前部署」就是清理排水渠以減少淤塞，但這些「入門級」防災措施，對近幾年的極端暴雨已無甚作用，Winnie自去年起將部分農作物種入盆栽內，並把盆栽的四分之一部分藏進泥土內，再墊高農作物。她表示雖然亦未必能完全避免農作物的損失，但此方法可減輕水浸的影響，「咁用盤種呢就，生存率好高啦，如果咁樣計返起上嚟呢，我嘅收成係多咗」。
Winnie自去年起把部分農作物種入盆栽內，並把盆栽的四分之一部分藏進泥土內，墊高農作物。
有農夫指天氣縱壞 非行業沒落主因
葉先生的O farm老農田有機農場則比較幸運，因為所處地勢較高，農場較少出現嚴重水浸，不過他同樣感受到天氣劇變，對收成有很大影響，「有時田間溫度係37、38度至40度，農作物灼傷個問題係明顯啲，或者啲農作物係差啲」，氣候轉變對他帶來的反思，是為何行業出現問題。
「我覺得環境係咪有影響？係有影響。但係你要諗一諗，咁點解同樣廣東做到我哋做唔到，台灣做到我哋又做唔到差唔多」，想深一層，若果是技術問題，「就唔可以賴天氣」。葉先生認為，香港的農業技術仍然停留在80、90年代，「係冇乜改變過」，部分新技術的成本未必需要大量資本，例如在使用地膜覆蓋農田表面，可以防止雜草生長，減輕除草成本；另外他亦嘗試改變冬瓜種植技術，結果今年產量創新高，他直言「天氣對香港農業影響梗係有嘅，但係我覺得，唔係一個決定性，令我哋呢個行業會唔會沒落嘅主因」。
葉先生指，在農場中使用地膜覆蓋農田表面，可以防止雜草的生長，減輕除草的工作成本。
葉先生今年改變種植冬瓜的技術，產量更創新高達6000斤。
農業和其他行業一樣，也是一盤生意，歸根究底也要人肯買，才可以細水長流，如何令農場收支平衡，是三名本地農夫的共同煩惱。
28號農場的李先生在機緣巧合下於3、4年前接手農場，本來視之為一個興趣，後來發現放貨、營銷、維修都牽涉成本，若果維持不到自負盈虧，「唔通每個月貼錢出嚟養住個農場，冇可能咁，我有幾多錢貼出嚟？」幾年累積的經驗，李先生指有機菜只可以用質素取勝，「冇得同人鬥平」，他亦希望市民體諒有機菜要按季種植，正所謂「夏天吃瓜，冬天吃菜」，「有啲客問，點解你成日都冇菜心賣㗎，即係佢用大陸菜同我哋比較囉」。近一兩年生意愈來愈難維持，用不同方法開拓客源，例如在荃灣街市擺檔，又設網店，與有機產品商店、祼買小店合作，在 Instagram 和 Facebook 等社交平台做網絡營銷和宣傳，希望接觸到更多人，「得閒出吓post、刷吓存在感呀，即係目的是等多啲人識我哋」。
28號農場
流失率高 「可能初學時肯嘅，嘩好開心呀我種咗菜」
Winnie the Farm則是一個休閑農場，經營模式是以舉辦導賞活動、售賣花茶等加工製品為主，直接售賣農產品則只佔生意約一成，Winnie說正因如此，極端天氣對農場收入不算嚴重。她在8年前因傷患退休，本來承租一塊「格仔田」消磨時間，後來哥哥一次過租了約三萬呎的田予Winnie，她「誤打誤撞」下開始種田，不斷模索經營模式，「開頭種一啲常規嘅菜，第一年已經覺得冇意思，人哋冇興趣喎」，其後改種蝶豆花，將蝶豆花和金盞花加工，售賣花茶、花油及潤唇膏等加工製品。
她其後在支援農夫的團體「好老土」協助下，開始開班教授種田技巧，組織導賞團參觀農場，成為農場的重要收入來源。
Winnie
O farm老農田有機農場的葉先生是綜合型農場，一半收入自於租「格仔田」予會員，賣農產品的收入佔總收入的一至兩成左右，他認為經營模式雖然有助分散對極端天氣的風險，背後面對的是比天氣更棘手的問題，就是人離開農業、離開香港。
一代中產離去 下一代未必對香港有感情
葉先生坦言，務農工作辛苦，而且無法提供可觀收入，難以吸引年輕的新血入行，「即係你廿幾歲你肯唔肯？可能啱啱學嗰陣時肯嘅，嘩好開心呀我種咗菜，跟住你發覺你啲同學，嘩你做教書，兩萬八一個月」。他在2018年集合10位有志學習耕種的年輕人，開班教授他們種田知識和技巧，乘著近10年代土地運動和本土意識加強，一度效果不錯，後來部分人體驗到汗滴禾下土，後來亦有移民潮，現時只餘低兩個當初的學生仍在種田。
隨著新界北東發展，愈來愈多農地被收回，他認為行業萎縮固然因為政府缺乏支援，不過更殘酷事實是愈來愈少人入行，「就算政府唔支援，都係有農地，但係點知無人耕，即係現實真係無人想耕」。對他而言，土地是一種與大自然的連繫，他難以解釋自己已對耕作的熱愛，「點解你愛你母親，情感連結喺邊度？唔知㗎嘛，好多嘅係經驗」，他說小時候在打鼓嶺農村長大，一踏出家門盡是農田，「嗰個環境係我，係我本身」。他認為或正因為這種背景，就是行業邁向萎縮的原因，「因為所有農青都唔係呢個context長大㗎嘛，已經冇年輕人有呢個背景去承繼呢種技藝」。
移民潮亦加劇「人」和「地」之間的脫勾，葉先生指一班支持本地農業的大多是三十多歲的中產，「你諗下嗰班係就係走曬嗰班，如果而家要培養返呢一班（中產）出嚟，可能又要花10年8年」，而一班新中產對香港有沒有歸屬感，亦是一個疑問，他指本地農業是一個很local context的生意，「你對香港有一定感情，咁耕田喺呢度耕，但無呢個感情，我唔會耕」。
葉先生
棕地擴散影響 荒地變露營車場
在逢吉鄉的Farm28李先生對行業前景的不確定性亦有另一番觀察，附近的棕地擴散，加上土地開發項目進軍，除了擔心被納入收地，亦擔心棕地胡亂開發會加劇水浸，他舉例農場旁邊的一幅地，幾年間從荒地發展成露營車場，除了擔心污水排放外，他亦認為旁邊被石屎填高的土地，有導致水浸情況加劇，「即係佢升高咗呀嘛，啲水咪流落嚟。」「咁你落大雨啲水向低流呢，就變咗係過曬嚟我哋呢邊」。
周邊棕地擴散，令他感受到收地的威脅，亦使他難以決定應否在農場作長遠的投資，「我根本都唔知仲有幾耐嘅嘢喺度做，個難處變咗係，譬如我租約到2027，咁有啲基建嘅嘢，即係你揾錢出嚟搞㗎嘛，搞完跟住你個地主話收返呀，咁樣點算呀？」
28號農場內有水泵把水抽走，但水泵的抽水速度有限，無法應付暴雨時的降雨量。