（獨媒報導）屹立沙田瀝源邨逾十年富東閣海鮮酒家周一（6月30日）最後營業。在「最後一夜」，樓面坐滿九成，街坊無需預約亦可進入用膳。女團COLLAR成員蘇雅琳（Ivy So）與友人前來撐場時，一度引起大批人圍觀及排隊要求合照，Ivy亦有耐性地一一與他們合照。此外，前香港沙田瀝源區議員岑子杰與友人包廂食飯，岑子杰步出包廂時亦和一眾街坊食客「俾心心」合照。
不少枱客均點了富東閣「名菜」如片皮鴨、冰鎮咕嚕肉、大蝦伊麵等，並紛紛拍照留念。伙記們一如以往忙碌招呼客人及推車仔傳菜，不斷進出廚房及樓面。8時過後，吳經理開咪「截單」，指仍有少量片皮鴨，即時起半價88元出售，並向顧客致謝：「代表公司多謝咁多位支持我哋咁多年，後會有期，多謝街坊、朋友、跨區朋友支持我哋，嚟緊就順順利利，大家身體健康，後會有期，希望大家江湖見。」
有街坊帶孫子及一家人與吳經理（黑衣者）合照
Ivy So稱結業可惜 愛飲早茶欣賞酒樓環境及片皮鴨
Ivy向《獨媒》表示，自己是第一次到富東閣吃晚餐，很期待食冰鎮咕嚕肉，又分享以前與朋友來沙田踩單車前後都會前來飲茶，但較常飲早茶，對於結業感到非常可惜：「好 chill 呀呢度，同埋朝頭早見伯伯婆婆，佢哋好早嚟食。」她指朝早的富東閣環境清靜，不像其他酒樓會播音樂或食客大聲交談，侍應哥哥姐姐亦待客有禮，並大讚片皮鴨抵食：「出面片皮鴨最貴賣緊1,000蚊一隻，呢個可以唔使200蚊、300蚊就食到。」
街坊自2019年起幫襯 指是「全港食客最年青」酒樓
沙田街坊翠兒在過去兩星期為富東閣員工拍下菲林照留念，並將相片沖曬後送給他們。翠兒表示，自2019年開始光顧富東閣，並曾幫手辦「片皮鴨團購」。對於酒家結業，她感到不捨，笑言「呢個地方好特別，一定係全香港平均食客最年青嘅酒樓」。
她又嘆，香港雖仍存在不少傳統酒樓，惟未必是大家想光顧的：「唔係播緊TVB嘅酒樓，可能出面唔會搵到啦。」她提到，一些紀錄良心小店的地圖已經消失，唯有用心記住：「然後幫襯到嘅一間就一間，同埋繼續提身邊嘅friend、主動約佢哋。」
翠兒（綠衫者）
總經理最難忘「片皮鴨團購」 向員工稱「希望有緣再會」
總經理傅先生亦稱非常感激一班街坊支持，「我哋好頭好尾做埋佢」。他指10年來最難忘的是疫情期間的「片皮鴨團購」，並嘆「我哋唔係感觸，係失敗，經營到不善先至結業」。傅先生又代表公司請在場記者食片皮鴨及幾道小菜，見記者未埋枱進食，不斷籲「唔好做住先啦，啲嘢食凍晒，快啲走食」，旁邊樓面姨姨亦叫「凍啦！凍啦！快啲食啦，唔好客氣」，又著記者「鍾意飲咩汽水自己拎」。
臨近10時，富東閣在歡送所有顧客後正式關門。老闆大開6圍，送上最後一餐員工飯，大家紛紛舉杯及合照。女員工合照時笑言「我哋富東閣全部美女喺晒度」，傳經理向他們稱「做到今日係大家嘅努力」、「答謝老闆對我哋不離不棄，現在咁嘅情況下我哋都仍然生存到，希望我哋大家努力，希望我哋有緣再會！」話畢一眾員工拍手叫好，並大唱《友誼之光》作落幕。
