（獨媒報導）沙田富東閣海鮮酒家日前（6月15日）於Facebook 公布，將會於本月底結業，指「今日一別，可能後會無期」。《獨媒》昨日（6月18日）到訪富東閣，下午茶時段店內座無虛席，門外亦有10多名街坊輪候入座，有顧客讚點心價格相宜又好食，惟認為「街坊茶樓」無可避免被新式或連鎖茶樓取替，慨嘆「舊茶樓都係要out㗎啦」。
經理對結業感不捨，指同事形同一家人，良心老闆亦常關心員工，但透露富東閣月蝕數十萬，明白結業的決定，老闆已經妥善安置所有員工。她對近日招不周的顧客感到抱歉，稱「我哋個個都想大家開心，可以食到想食嘅嘢滿足」，盼未來有機會重開富東閣。
平日下午茶時段座無虛席 部分點心低至8.8元
位於沙田瀝源邨平台的富東閣海鮮酒家於2014年開業，至今11年。富東閣在馬鞍山耀安商場的分店早前已結業，在瀝源店結業後將暫別香港餐飲業。
富東閣價格一向親民，部分點心與早市及下午茶時段均有優惠，如花生豬骨粥售$7.8、香煎三色糕售$8.8、潮州蒸粉果售$9.8、鮮菰雞包仔售$10.8，而其招牌菜式扁皮鴨同樣深受大眾歡迎，疫情期間曾跨區團購送外賣。
《獨媒》記者昨日下午2時到富東閣下午茶，店內坐無虛席，坐滿約50張座數4至12人不等餐枱，門外亦有10多位街坊排隊輪候入座，當中不乏為長者。門外有張貼優惠告示，部分點心與早市及下午茶時段均有優惠，如花生豬骨粥售7.8元、香煎三色糕售8.8元、潮州蒸粉果售9.8元、鮮菰雞包仔售10.8元。
店內有不少食客特意用手機記錄富東閣環境，另有顧客與友人自拍留念。酒樓職員不時向顧客道謝：「多謝支持，多謝支持」，有「搭枱」顧客笑稱「我都未試過咁樣搭枱㗎 ！」又與其他顧客即興交換微訊聯絡方法，相約日後去旅行。臨近落場的下午四時，有職員「推車仔」叫賣鳳爪排骨飯。
有食客大讚點心好味、價格平 惟無可避免新式酒樓取替
與妹妹到富東閣用膳的Happy姐每日都會到香港不同茶樓用餐，曾數次光顧富東閣。她認為富東閣整體雖較其他新式酒樓遜色，例如要走樓梯才能到廁所，但認為富東閣點心美味，與搭枱顧客「個個嗌十碟八碟，係咁食到打包添。」Happy姐慨嘆「舊茶樓都係要out㗎啦」，結業後會繼續去香港不同茶樓飲茶。
Happy 姐 （左） 華娃 （右）
富東閣常客郭太對結業感可惜，指富東閣菜式合乎其口味，「又有菜食，我哋想食菜，又有飯，啱我哋」。郭先生指富東閣是「街坊」茶樓，價格相宜，估計原址有機會由其他連鎖式酒樓頂手，「禾輋邨半年前又係執咗一間，跟住有另外一間取替咗，開返一間新嘅，咁我諗呢度都係：特別係而家連鎖式嗰啲酒樓呢，好多時舊嗰啲撤退咗，新嗰啲呢，連鎖式嗰啲，就會取替。」
經理透露月蝕數十萬 良心老闆已妥善安置員工
富東閣開業入職至今，現為人事經理的吳小姐向《獨媒》表示，對酒樓結業感不捨，指同事間感情猶如一家人，「佢哋都好唔開心、好傷心，始終見屋企人都無見長時間，大家起埋一齊好似屋企人咁樣，包括啲客，個個都老街坊嚟。」她印象最深刻的是疫情期間，不少街坊及跨區市民對片皮鴨支持，「可以令我哋富東閣全心全力去做」。
提到富東閣老闆時，吳小姐大讚他是「良心老闆」，透露現時每月虧蝕數十萬，但公司開業11年來從未有拖欠員工「一分一毫」薪金，「只有早無遲出糧」。她表示老闆非常關心員工，員工生病會親自買感冒藥、必理痛、藥油給同事，又指老闆就結業決定「掙扎咗好耐」，顧及員工要養活家庭，「所以先至拖到今時今日，真係頂唔順，你無理由要個老闆個個月幾十萬。」所有員工亦已獲妥善安置。
經理吳小姐
吳小姐提到富東閣的食物中，招牌片皮鴨故然受歡迎，而燒味在沙田區亦有口碑，冰鎮咕嚕肉則深受年輕人喜愛。富東閣的點心，皆是師傅手工製作而非廠房預製。
談到一班街坊，吳小姐一度傷感流淚，稱「我都好傷心，朝早好多客叫我哋同老細講下啦，我哋支持撐你哋㗎，支持落去開返」，但理解老闆結業決定，僅盼未來有機會重開。
經理籲大家留港消費 稱：香港人始終都要靠自己多啲支持
吳小姐明白現時香港經濟不佳，各行各業生意皆欠佳，加上租金高企、人工及成本上漲，收入難以抵銷開支。此外，通關後大批港人北上消費，亦是其中一個影響生意因素，認為「自己香港人要支持返香港人」，籲大家「留港消費多啲，北上消費個個都有，但係香港人始終都要靠自己多啲支持香港，大家各行各業有飯食有工開。」
距離結業餘下十多日，吳小姐指一眾員工希望「呢段時間十幾日幫公司好好做到呢月尾，多謝返咁多街坊，同埋跨區支持嘅朋友。」他指近日晚市及下午茶時段爆滿，為招呼不周的顧客感抱歉，稱「我哋個個都想大家開心，可以食到想食嘅嘢滿足。」她亦透露員工早已知悉月底結業，但老闆不想在父親節前公布，影響客人心情，故日前才宣布於6月30日正式關門。