【獨媒報導】2019年7.21元朗事件中，前立法會議員林卓廷與6男被控暴動罪，今（14日）踏入第29天審訊，林卓廷接受控方盤問。片見林對閘內市民表示「兄弟，唔好埋去！」，高級檢控官程慧明問：「點解稱呼佢哋兄弟？」林解釋：「一般我哋喺街，見到市民都會叫『阿哥攞張單張睇睇』；見到閣下（主控）你，都會叫『阿姐睇睇』。唔通話『前面咁多位先生』？」法官陳廣池指：「前面都有女仔，點解唔叫兄弟姊妹？咁樣唔公平，性別要平等。」林回應：「法官閣下你嘅觀點係啱，卿姐（劉慧卿）成日都話性別觀點主流化，呢樣係要改。」控方追問：「白衣人技術上都係市民，你有冇叫兄弟唔好打？」林激動反問：「我叫佢兄弟，你咪告多我一條！我點會叫佢兄弟呀？佢打緊我，會唔會太荒謬？」
另外，控方指出林加入人群叫「香港人加油」口號會令對抗情緒升溫，林不同意，稱：「係幫自己打吓氣囉。」林亦不同意控方指，他在場稱「你班黑社會惡晒呀？」，以及閘內人叫「黑社會唔好走」，屬於挑釁白衣人行為。陳官追問：「知唔知如果你唔係黑社會，畀人鬧你黑社會有咩感覺呢？」林回答：「覺得係笑話囉。」陳官續問：「你會笑？」林表示：「唔會笑，係人都知我唔係黑社會啦！」林表示其現場直播有數十萬人觀看，陳官問：「你開唔開心呀，有幾十萬人睇你直播？」林激動稱：「我一啲都唔開心，發生咁嘅事，多人睇有咩好開心呀？」
控方質疑無致電催促警方 林：直播幾十萬人睇，通晒天啦成件事！
林卓廷第6日作供，控方高級檢控官程慧明繼續盤問。控方指，林在出發期間聯絡元朗警區警民關係組警長時，元朗實質未發生任何事。林驚訝稱：「吓？」，並指白衣人已集結數小時，由於出現威脅公眾安全的刑事案件，林作為市民及議員要聯絡警方。
林期望警方數分鐘後會到場，也相信港鐵得知有乘客受傷後，會聯絡警方。控方問既然林擔心白衣人打人，為何不再次報警。林解釋當時要與市民對話。控方質疑：「你有時間拎電話打999，但係你冇？」林嘆氣指：「因為一路處理緊件事。」控方又問，林有否嘗試叫同事冼卓嵐或莊榮輝報警，林解釋冼正進行直播，莊則協助處理事件。
控方指，既然警方沒有如林卓廷期望在數分鐘內到場，「你打多次電話催催佢哋，有咩壞處？」林回答：「我分身不暇，同埋白衣人衝入嚟，唔使我再通知警方喇啩⋯⋯我個直播幾十萬人睇，通晒天啦成件事，我仲要去報警？咁大規模，相信好多人都會打999。」他補充，事後警方公佈當日有兩萬多個報警電話。
官問：你開唔開心呀，有幾十萬人睇你直播？
法官陳廣池追問林，其直播有「幾多十萬」人觀看，林不記得僅稱：「係好多人睇。」陳官問：「你開唔開心呀？」林回應：「我唔開心，呢件事唔應該發生，我個嘴畀人打穿咗，流緊血。」陳官再問：「你開唔開心呀，有幾十萬人睇你直播？」林激動稱：「我一啲都唔開心，發生咁嘅事，多人睇有咩好開心呀？」陳官又指：「你可以對鏡頭大聲同啲人講：『快啲打999，我哋好危急』？」林表示：「我諗唔使，咩情況有眼睇，唔使我講危急啦！」
林稱要求警方保護市民包括自己 官：你唔係一般市民？
控方問，林是否同意與警長通話期間，沒有要求警方保護自己。林表示有要求警方確保市民安全，而「我都係市民」。陳官指出林當日並非一般市民，「你係市民，但係仲有頂帽好大，係立法會議員，你唔係一般市民？」林同意當日在場有公職身份，為監察角色。
控方指林無透露行蹤會阻警力：警方要花精力保護你
林早前稱，故意不向警長透露自己將前往哪個站，避免警方只到某一站行動。控方遂指出：「你唔確實話去元朗邊度，萬一你身陷險境，警方要花精力睇下去邊度保護你，阻礙警方更有效動用警力？」林不同意，強調當時無想過有如此大風險。控方再向林指出：「你從來冇打算向警方透露行蹤，你根本唔希望警方制止你同付費區嘅人集結？」林表示：「絕對唔同意⋯⋯如果我要隱藏行蹤，點解要同警長講？點解一落車就直播？我6呎4吋高，博人哋唔認得我咩？會唔會太荒謬呀？」
林否認挑釁白衣人：當時我面對死亡好接近
控方接着指出，林希望火上加油挑釁白衣人，林強調：「當時係我面對死亡好接近嘅時刻，咁嘅場景仲想火上加油？唔好講笑啦⋯⋯點可以調轉嚟講係火上加油？」陳官問：「點解話係面對死亡時刻？」林表示目睹站內多人被打傷，直至見到「懵良」持棍走到閘機，覺得有很大死亡風險，「如果佢哋捉到我圍毆，係死得㗎！」他反問：「仲點樣諗點挑釁？我都自身難保！」
控方其後指出，林一直呼籲人不要出閘，目的是想聚集更多人支持自己，令場面人多勢眾。林不同意，並指：「我都唔知白衣人會衝入嚟，我點樣可以好似諸葛孔明咁，算到晒有咩行動？你將因果次序全部調轉咗嚟講。」
控方指事後警方到場卻遭市民逼使離開，並問：「你知道有公眾不歡迎警方到場執法？」陳官認為問題不恰當，因林當時不在場，又指社會並非一致性：「有人憎警察就一定」，他舉例指：「世界有好人，一定有壞人。」另外，林提到：「咁嘅環境唔相信有任何人，會叫警方唔好嚟。如果有人咁講，我會鬧佢囉，係咪傻㗎？」
控方指閘內人戴頭盔築傘陣 加強對抗情緒
控方其後舉出示威者6.12佔據金鐘、7.1衝擊立法會等例子，指出示威者經常穿黑衫、戴頭盔口罩等保護裝備，亦會築起傘陣。林同意。控方遂指，7.21當晚付費區內部分人戴頭盔及口罩，林表示非常少數。控方再指，付費區內部分人組成傘陣；林稱：「我唔會叫傘陣，唔係咩陣式⋯⋯因為付費區外有人掟嘢，所以開遮擋。」控方問林是否同意閘內人士的裝備及傘陣等，會加強雙方對抗情緒；林不同意。
控方指叫「香港人加油」令對抗情緒升溫 林認為僅打氣
另外，控方指出林卓廷曾作出挑釁行為，例如片見他加入人群一起叫「香港人加油」口號。林解釋，過去兩三個月在街站叫過上千次這個口號，「有人嗌，自然反應接。」他指叫第一句之後認為不適合，擔心有人「做文章」，因此將聲音收細並停止。林強調沒有帶領人叫口號。林不同意控方所指，叫口號令對抗情緒升溫，他理解叫口號是「幫自己打吓氣囉」， 表達「頂住呀，唔好畀白衣人襲擊」的意思。控方指白衣人聽到有人叫口號後隨即折返，林認為兩者無因果關係。控方又指出，林曾向白衣人稱：「拉晒你哋班仆街呀！你夠膽唔好走！」林不同意屬挑釁。
控方質疑林叫其他人「兄弟」林解釋：唔通話咁多位先生？
控方指，片段見林曾在付費區表示：「兄弟，唔好埋去！」控方追問：「點解稱呼佢哋兄弟？」林解釋：「一般我地喺街，見到市民都會叫『阿哥攞張單張睇睇』；見到閣下（主控）你，都會叫『阿姐睇睇』。唔通話『前面咁多位先生』？」陳官指：「前面都有女仔，點解唔叫兄弟姊妹？咁樣唔公平，性別要平等。」林回應：「法官閣下你嘅觀點係啱，卿姐（劉慧卿）成日都話性別觀點主流化，呢樣係要改⋯⋯」林同意「兄弟」包括女士。
控方問有否叫「兄弟唔好打？」林：我叫佢兄弟，你咪告多我一條！
控方追問：「白衣人技術上都係市民，你有冇叫兄弟唔好打？」林激動反問：「我叫佢兄弟，你咪告多我一條！我點會叫佢兄弟呀？佢打緊我，會唔會太荒謬？」控方續指：「用你嘅詮釋，市民要稱兄道弟？」林表示：「都要睇環境。」控方質疑：「你有分自己人同對抗嘅人？」林解釋：「唔係咁樣分。」控方追問：「點解一啲叫兄弟，一啲叫唔到？你從頭到尾都係對抗心態，分兩批雙方對壘？」林反指：「（閘外）咁多精壯男子，點對壘呀？（閘內）咁多市民，有阿姐⋯⋯」控方亦問林：「你有冇問閘內兄弟，係咪住元朗？」林表示沒有，「冇啦啦咁問會唔會好怪呀？」
控方指有人特意到場支持 林強調無作呼籲：啲人點樣心靈感應？
另外，控方指出付費區部分人是「專登嚟支持你」，林強調自己從沒有呼籲集結，自己亦是臨時決定入元朗，「啲人點樣心靈感應，支持林卓廷集結？」控方指市民可以透過直播得知林身處元朗，並前往找他。林認為起初元朗場面並不激烈，市民只集中留意中西區情況。
官問：如果你唔係黑社會，畀人鬧你黑社會有咩感覺？
控方指片段顯示林曾稱「你班黑社會唔好走，警察嚟緊拉你」，其後付費區多人叫「黑社會唔好走」。控方問林：「在場人士模仿你講法？」林表示不知道。林又不認為這句說話有問題，因出發點是阻嚇黑社會，故此不需要制止。陳官問：「點解佢哋話對方黑社會？」林表示不知道。陳官追問：「知唔知如果你唔係黑社會，畀人鬧你黑社會有咩感覺呢？」林回答：「覺得係笑話囉。」陳官續問：「你會笑？」林表示：「唔會笑，係人都知我唔係黑社會啦！鬧我黑社會，搞笑真係！」
林不同意叫「黑社會唔好走」屬挑釁
控方指人群叫「黑社會唔好走」會挑釁白衣人，林不同意。控方質疑，叫「黑社會唔好走」與希望白衣人散去的意願相違背，「點解唔直接啲，仲講反話？」林表示：「如果叫黑社會快啲走，警察嚟緊拉你，咁好似同黨咁喎！」他又解釋「會講反話係好正常嘅一件事」，而且白衣人不會遵從其說話。控方指，林稱「你班仆街惡晒呀？元朗飛！你班黑社會惡晒呀？」是挑釁性說話。林不同意，稱當時指斥對方打人，他不滿控方「抽片言隻語去演繹」。
控方指林稱「企落嚟幫手頂住」因知道兄弟隨時支援
控方又指，林稱「頂住佢，我哋一齊頂住佢，企落嚟幫手頂住佢」，是因「知道月台上有你啲兄弟隨時支援你？」，林不同意。控方指林目的是令現場人多勢眾，與白衣人對抗。林否認指：「如果你話月台上有兄弟支援，咁唔使我叫，佢哋自己都衝咗落嚟啦！根本就冇咁嘅事情！」控方指出，林「發號施令叫大家唔好退」，林強調僅呼籲公眾留站內確保安全，認為控方不能斷章取義。控方再指，付費區內人數過百，而林與本案6名被告製造對抗情緒，挑釁白衣人；林不同意。
控方指林無做「和事佬」行為 林：做唔到唔代表冇嘗試
林早前指民主黨支持和理非，雖然他不同意武力行為，但不會與勇武「割席」。控方指基於上述原因，林見付費區人士想與白衣人衝突，仍選擇留在原地，不會因想法不同而放棄他們。林不同意，認為當時並非示威場面。控方又問林有否勸喻白衣或「兄弟」一方冷靜，林認為「兄弟」只是當刻稱呼，認為控方用字有誤導性，「你講到全部人同我好熟咁。」
控方指出，看不到林做過「和事佬」行為，林不同意並強調「做唔到唔代表我冇嘗試」，又形容調停屬「與虎謀皮」。控方最後指出，林所稱的保護市民只是開脫藉口，他沒有阻止付費區人士挑釁反而留守加入，以鼓勵及壯大聲勢，亦與其他被告參與暴動；林一律不同意。
控方完成盤問，辯方開始覆問，案件明續審。
7名被告均否認暴動罪，包括：時任立法會議員林卓廷（43歲）、庾家豪（35歲）、陳永晞（37歲）、葉鑫昇（31歲）、鄺浩林（26歲）、尹仲明（48歲）及楊朗（26歲）。
案件編號：DCCC 1106/2020、1132/2022（已合併）
審訊第28日
控方質疑林卓廷無能力：警察未到，你手無寸鐵憑咩保護市民？
控方質疑林卓廷「冇試圖同白衣人和談」 亦無聯絡何君堯平息事件
審訊第27日
控方指林卓廷入元朗挑起事端 令警方疲於奔命 再攻擊辦事不力
審訊第26日
林卓廷：遭白衣人指罵「最衰都係你」、被打至嘴流血及手臂骨裂
審訊第25日
林卓廷稱未完成保護市民故無離開：點可以喺危難之中，自己走咗去呢？
林卓廷稱閘內市民射水為救傷者 官問：你有冇喝止佢哋？