（獨媒報導）由前荃灣區議員陳劍琴創辦的「文具同香會」開業4年，但因不獲西九龍中心續租，周日最後一日營業。不少熟客特意前來告別，見證檔口熄燈收檔一幕，又與陳劍琴拍照留念。陳向《獨媒》表示，一方面很感觸，因為是被逼離開，但另一方面見到很多人前來支持自己，慶幸能「同香港人一齊經歷呢個時代」。陳笑說，相信日後會再見：「會滿血復活！」
周日晚上，西九龍中心的車仔檔陸續收檔。但在2樓的同香會檔口，四周站滿熟客，見證著陳劍琴最後一次「收檔」。在眾人包圍下，陳收拾好同香會檔口物品、丟去垃圾，然後熄燈、收起貨架、再拉起黑布蓋住檔位。熟客們一邊拍攝，一邊開玩笑：「哇你拉布，仲要係黑布！」陳就笑著回應：「未試過被咁多人望住收檔！」離開前，她向熟客們承諾，會找到新舖位與大家再相見。
2021年，陳劍琴因宣誓風波辭任區議員，並創辦「文具同香會」，於深水埗的西九龍中心出售各式文具、線香等。今年六四，陳原本打算在檔口售賣印有「記憶不滅 良知不息」字句的蠟燭，但檔口遭海關「放蛇」，亦有不知名人士在四周徘徊，最終她改為只賣無字的白蠟燭。至8月，西九龍中心通知她檔口不能續租，但未告知她原因。
Last day前夕有警員來「傾偈」
在最後一個營業日，陳劍琴忙於招呼接踵而來的客人。她說，自從宣布不獲續租，生意一直很好，很多熟客前來之餘，亦有由友好商舖介紹的新客人前來光顧，成功「清走」近八成貨品。此外，在Last day前夕，亦有「沒穿制服」的深水埗區警員，前來檔口了解其結業情況：認得部分人在6月亦出現過，「佢哋話嚟傾吓偈、了解吓，睇吓你會拎咩出嚟賣，呢度完咗會去邊啊，會唔會附近搵地方？」
慶幸能「停一停」回望過去艱辛 再繼續前行
談到心情，陳說一方面很感觸，因為是被逼離開，「感覺不忿、不公義」，另一方面亦慶幸生於這個時代：「呢個時代做咩都好難，比以前難好多，例如以前喺香港開舖頭，唔會有咁多審查，唔會因為你個人名字或者曾經嘅社會參與而無咗空間。但呢樣嘢宜家擺喺眼前，例如有好多不知名嘅投訴煩住你，要密集應付。但都好慶幸自己冇缺席到，能夠同香港人一齊經歷呢個時代，幾壞我哋都一齊面對。然後你會發現，當（情況）幾壞都一齊行到落去，原來又可以行多啲喎。」
在last day這天，陳劍琴回檔口的路途上，一邊思考「我為咩要繼續呢？」，一邊在腦海中浮現爬山時的畫面：「行山係好辛苦，但你都會繼續向前行，然後到某一個位，你擰轉頭望，就會發現乜原來咁難行嘅位，自己都行過咗啦！然後你就會有力量繼續行。我好慶幸喺呢個時候，被逼要終結一個地方，咁我可以停一停，望一望之前嗰四年行過咩路。咁我就發覺，『哇，乜原來咁難行都行咗落去喎！』我覺得呢個暫停、回望，會令自己有力量繼續向前行，尤其19年之後，大家都覺得無力、唔做好過做啦，我反而覺得咁樣會feel唔到自己嘅energy，但係原來當我哋繼續行呢坐山，呢個過程會見到好多人一齊同行，原來我建立咗咁多連結。」
不少熟客在光顧同香會之餘，亦帶來月餅、蛋糕、曲奇、章魚小丸子等小食送給陳劍琴。
熟客盼「同香會」早日重開 會繼續幫襯「良心小店」
熟客黃小姐就是她這幾年的「同行者」之一。在同香會結業前一周，黃小姐已經來過一趟，但在結業當日，她再度前來，買了些線香，為陳送上「四喜麵包」的蛋糕仔，並逗留至收檔一刻。黃小姐住在將軍澳，搭一程巴士就到深水埗，她說自同香會開業後不時光顧，買過紙膠帶、手工皂、日本線香等：「賣線香又良心嘅小店，除咗呢度都冇乜第二度。」
黃小姐在結業日買了兩套線香。
對於同香會結業，她嘆不捨得：「我可以去邊？呢度交通方便、有冷氣，佢（陳劍琴）又咁好傾。」她希望陳能早日找到新舖位，重新開業。對於近年不少小店經營困難，黃小姐說雖然「良心店」數量比以往少，但都會繼續盡量幫襯：「一日仲會營運，我都會支持。變通吓囉，例如手搖店少咗，咪買花茶茶包，沖一大杯帶出街飲，總有辦法嘅！」
