（獨媒報導）職工盟於銅鑼灣的街站被警方禁止，其屬會香港物業管理及保安職工總會及清潔服務業職工會今午3時在旺角東行人天穚設置街站，逾20名警員三度以橙色封鎖帶圍封街站，並指其口號「民生即政治，基層要公義」涉煽惑及仇恨政府，若再喊口號將會拘捕兩名職工盟成員。
職工盟組織幹事杜振豪
下午近3時半，逾20名軍裝警員，以橙色封鎖帶包圍負責街站的兩名職工盟成員，並抄下身份證。約下午3時40分，兩人接受傳媒訪問後，現場警員突上前詢問有否申請懸掛橫額，得知他們未有申請後，隨即要求他們拆除橫額與旗幟。雙方一度發生口角，職工盟組織幹事杜振豪反問：「放地下得唔得？」警方稱若放地方則當垃圾處理。
5分鐘後警方拆除橙帶，但5分鐘後又再次圍封，稱兩名成員的言語涉及違法，杜振豪與警方爭論：「即係做咩都唔得啦！」警方於數分鐘後解除封鎖，退至一旁。
職工盟幹事：條街掛咁多國旗又唔查
獲解封後，兩人分別手持橫額及旗幟，繼續發言。杜振豪斥責警方，「條街掛住咁多國旗，你又唔去查吓人哋有冇申請」，質疑警方針對性執法。
杜振豪又表示，「今日發生嘅嘢就係『民生即政治，基層要公益』最好嘅詮釋」，表示「我都好想大家愛自己居住嘅土地、愛自己嘅國家」，惟政府解決民生問題不力，重申職工盟是為民生而發聲，但民生與政治密不可分，「如果我哋唔講，基層工人點會明白到自己點解人工咁低嘅真正原因，縮短工時、增加工資係同政治息息相關。」
約4時許，兩人表示街站結束，稱會繼續「講應該講嘅嘢、做應該做嘅嘢」，重申今次事件乃口號的最好詮釋。