警察總部食堂經理因 612 辭職
為求立即離開，賠一個月人工抵銷一個月通知
食堂經理：我接受唔到做幫兇
＊ ＊ ＊
38 歲的 Ricky，原先經營生意，乃後從事物業管理，三年前加入飲食業。2018 年經引介到警察總部主理 canteen。在 612 出動的警察伙食，部分正由該食堂負責。
「我真係接受唔到自己再服務佢地。」
Ricky 在 611 通宵工作準備飲食，並騰出地方供警察休息。612 早上放工回家，便在新聞見到警察放催淚彈、揮棍開槍。
「好似我提供飲食喂飽佢地，等佢地有力出去打人。我接受唔到自己嘅工作。」
「大部分警察畀我嘅印象都係普通人，平時都算有禮貌。」但每當談到政見，分歧就會顯現。Ricky 在食堂耳濡目染，皆是對政府的支持。「我只係一個普通香港人 － 香港人有種特質，叫善忘，過得耐就會漫漫丟淡。」
但去到 612，Ricky 不再覺得工作和立場可以區分，「我有一種幫兇嘅感覺，好似係佢地一份子，我唔想再為佢地效力。」終於毅然請辭，辭呈上書離職原因：I refuse to serve evils。
613 早上，他將辭呈放在上司檯面，一位同事出於義氣追隨。「上司同老闆都打電話嚟問我咩事，叫我考慮清楚。佢地好想勸我返，因為我走左 canteen 真係會有啲麻煩。我老實同佢地講，佢地都明嘅。」
一般離職須預先一個月通知，為了即時生效，Ricky 賠償一個月人工達兩萬多元，不用再回去，「我唔想再對住佢地。」
「我由細喺香港大，而家嘅警察變哂質。」他解釋親戚中有長輩是警察，行將退休，對警察在 612 所為大感不滿，批評開槍違反守則。長輩並說從前警察敢違抗上司不合法的命令，「而家嗰啲。。。就算有唔同諗法，點會夠膽講呢。」
警察總部只有兩間食堂，兩名經理。Ricky 明白訪問出街，很多人都知道是誰。他並非毫不遲疑：「其實我都唔知自己點解會咁。我有兩個女，有屋企人要照顧，但我同老婆講接受唔到，唔可以繼續落去，佢明白我體諒我。」
「送中一定要停，係犧牲香港前途換取自己目的。」
＊ ＊ ＊
612 當日，警察用榴彈槍平射催淚彈，愈射愈密，民眾一度須爬上天橋逃生。圖片背景即警察總部。