今年會有幾個超級社工學生畢業，我期待佢哋畢業已久，佢哋係社福界嘅寶藏，明日之星，年紀輕輕已結合知識、價值觀、態度、技術與社會視野。我一直好期待，佢哋會去邊度發光發亮。
點知，佢哋不約而同表示，在畢業之後暫時唔會加入社福界。原因係兩次實習過後，反送中事件中，感到對NGO失望。佢哋有一啲其通點：
一，佢哋都有喺民間團體做義工，都會自發搞一啲線上線下嘅行動。
二，佢哋喺實習過後，加上與自身業界Network交流後，佢哋不約而同地覺得業界服務有啲滯後。服務雖有意義，但已遠離社會嘅需要，更為一啲先有服務後有需要嘅現象慨嘆。
三，佢哋都擁有社會結構嘅視野，認為社工應該執著社會公義同在工作中與服務對象關心社會。佢哋可應付現時社工嘅工作，但現時社工工作同佢哋心中理想社工形象相距甚遠。
我早前有同過一啲同行分享，佢哋嘅回應係：「咁佢哋畢業可以試吓做民間團體。」
「哎...我覺得佢哋嘅出現係帶出咗業界一啲問題呀。」
「但個現況真係咁，冇辦法喎，民間團體會接近佢哋Value一啲，或者，出去搵啲義工做啦。」
「呀...要做義工先可以做返社工嘢，唔係好有問題咩？」
「唔好咁講呀，陣間俾人話你覺得社工做緊嘅唔係社工嘢呀。」
「我唔係（完全）咁嘅意思...」
鏡頭一轉，反送中，琴晚嘅自殺事件，唔知大家有冇喺工作中做啲咩呢？
琴晚報道出街後，有幾間機構社工趕去現場支援。但更搶我眼球嘅，係兩個鐘頭之內，一班有心社工同社工學生喺Telegram開咗個「樹窿Group」，喺各大Telegram招募有情緒需要嘅入Group，去分享去聆聽，然後再分工進行單對單個別支援及識別。嘩，係網上外展呀，內容到肉㗎喎，係由需要出發嘅服務呀。
兩小時，個Group已經有七百人，到今日中午已經有950人。呢件事，我覺得係一件社福界嘅重要小事，因為年輕嘅力量值得鼓掌，同時亦訴說緊我哋好多問題，帶俾我哋好多啟示，教我們一班中層、中年、老鬼、機構深刻反省：
我哋忙碌嘅工作中，服務需要何來？機構與員工，機構與服務資助者嘅權力位置點樣影響緊服務？
我哋有冇理解年輕社工嘅抱負、俾年輕社工發揮佢哋嘅力量？