呢兩日環保署喺官網同埋「大嘥鬼」page都發放緊一個消息，就係根據監測數據，香港二噁英一直處於低水平，過去20年一直下降，11月數據無異常提升。
環保署可能都講得無錯，數據上嚟講，但到底個數據有幾大參考價值？
數據嚟睇，11月中西區的二噁英濃度係每立方米0.033同0.049皮克，荃灣區係每立方米0.031皮克，雖然都比上兩個月升咗，但環保署仍然可以話係低於國際標準，即係每立方米0.1皮克。
但係，中西區監測站位於西營盤社區綜合大樓，荃灣區監測站位於荃灣大河道雅麗珊社區中心。位置同平時射tg嘅地方相距有幾近？有心可以自己google map下。
另外，睇返兩個站的量度數據，數據採樣基本上1個月得1日，11月好似畀面d？中西區度咗2日咁多多。仲要睇下採樣日期夾唔夾得啱係射tg啲日子。
之前問過環團，聽完之後嘅感覺就係，一來大家去追環保署d二噁英濃度數字，但呢個數字究竟有幾大參考性？呢方面我係存疑。另外，環保署想用兩個站的數字就去解釋香港二噁英濃度keep住處於低水平，又到底有幾能夠釋除到公眾疑慮？
上個月入Q問過環保署，其中有問過究竟兩個監察站足唔足以反映唔同地區的二噁英濃度，環保署的答覆是咁的︰「我們把量度二噁英的儀器設於中西區監測站及荃灣監測站，主要是考慮兩個地區人口眾多，而監測站有較大空間可設置相關儀器。事實上，過去5年兩個監測站錄得的二噁英濃度大致相若，反映本港的二噁英濃度分佈平均，設立兩個量度二噁英的監測點已經足夠。」
至於環保署官網咁樣去解話，能唔能夠釋除市民疑慮，就留返大家自己去判斷了。
題為編輯所擬