請容在下老實說：追求理想的前提是承認現實，唯有面對現實，才有希望改變現實。
而家經濟好差，好多人失業，好多人水深火熱，自己就係其中之一。要說服普羅大眾為左政治理想放低生計攬炒（財政預算案十九有舒困措施和派錢方案），真係好難好難。
所以理想派不宜輕蔑溫和派的顧忌，現時民氣對 35+ 相當不利 — 尤其係理想派想告訴選民，原來攞 35+ 係想否決財政預算案，迫政府再一次選舉。好多民主派支持者真係唔明，明左亦好難接受。
對家打正名號以「反攬炒」作反動員，可見對家評估過當此時勢打穩定牌有勝算，加上「中間路線」瓜分紅利，民主派注定陷於劣勢，勝算極微。
但追求民主唔可以當選民係工具，要對選民真誠。無論佢地明唔明白，支唔支持，都有責任向佢地解釋清楚：我地已經無左份工，等緊政府救我，點解喺咁艱難嘅時候仲要去搏，去搏一個睇嚟虛無飄渺嘅希望。
民主派只能夠盡心竭誠回應人民。若果「攬炒」成為共識，請在選前準備一份屬於民主派的財政預算案，厚厚的一本，一定要比政府更厚更詳盡。
我們有責任說服人民，若香港真的有民主，當民主派真的執政，財政預算案點樣急人民所急。唔可以因為艱難而玩假，要認真。若果推動者心底其實覺得無望，人民更加唔會對你有期望。
有心人要清楚話畀人民聽，光復後嘅香港會係點嘅樣。重光後嘅香港會好似台灣咁優勝，唔同出身嘅人（唐鳳、林旭佐、賴品妤）都可以獨當一面從政；唔會面對疫症落得一罩難求；唔會放過奸商囤積居奇；唔會任由人民自生自滅；唔會縱容警察橫行無忌。
至於派錢，為彌補疫情損失，每人派三萬蚊理所當然走唔甩。選舉時要向每個選民派出那本厚厚的預算案，同選民講政府派得雞碎咁多，攬炒成功後我地每人派三萬，而且確認信上面會標註「三萬 Thx」。
仲有政府啲宣傳好垃圾，香港重光後所有部門都要好似台灣咁日日出梗圖。
＊ ＊ ＊
配圖來源：臺中市政府警察局「TCPB 局長室」
選圖前有過顧慮，擔心冒犯女士，誠心道歉，但必須坦誠自己睇到就忍唔住笑。
正因為台灣的民主政府給予下級極大自由度，才會出現各部門鬥玩梗圖的風潮。
現懇請所有看不懂梗位的男讀者 share 此圖，以示你們純潔清白。順便呼籲親朋仲趕得切登記選民，今日就係最後一日。
下面就係網上登記機！！！