新界鄉議局南約區中學這所座落於大嶼山，又是鄉紳居民籌辦的學校，趣聞很多。筆者上月撰寫〈梅窩的空置校信，復校還是建公屋？〉一文，訪問了曾在該中學教書的梁景輝及陳祿開老師訪談，聽說了很多師生趣聞及學校興衰故事，因此筆錄下來，希望給舊生重溫往事，也令大家更了解這座「神秘」的學校。
問＝余桐 陳＝陳祿開 梁＝梁景輝
問：你哋一開頭係點嚟南約中學教書㗎？
陳：我1988年開始教書，主要教附加數學。當時喺市區住，都唔知有呢間中臬學。第一次嚟到南約，覺得好靚、好peaceful（平靜）。舊時喺bBand 1學校教書，唔洗點教，啲學生都識㗎啦。但嚟到南約先發現應該點教書，要重新學教書。
梁：我1987年入南約教書，中間走過，所以總年期無冇陳老師咁多。開始時教科學，後嚟進修完就教經濟。初初嚟，有千幾個學生咁多，係因為要吸納整個離島區既嘅學生。
問: 你哋對南約學生嘅印象係點？
梁：南約學生同出面（島外）學生比嘅話，係比較單純啲，同講義氣多啲。老師對學生好啲，佢哋就會對你好。
陳：呢度啲細路係喺幼稚園已經識，一齊升到小學同中學。佢哋感情好好，彼此之間嘅義氣好強。
梁：其實學生自己都分幫派㗎，東涌幫，梅窩幫，坪洲幫，長洲幫。嗰陣時其中一個工作係防止幫派衝突，因為佢地鄉民意識好強，會打架交。
問：鄉民意識即係點？
梁: ：嗰時嚴格嚟講，嗰啲山頭主義都會有個細嘅地區。但都係嚟梅窩讀書，例如大澳、長沙、貝澳、水口、塘福等，好多區都會嚟南約讀。唔同派別之間都會盡可能避免衝突，但好多時避免唔到鄉村細路嗰種少少強悍，有時一啲唔經意嘅磨擦，同區就要幫兄弟出頭，咁就好容易變成區與區之間嘅學生衝突，所以當時要令佢哋無咁容易衝突。
問：當時係唔係成績好、家境好嘅學生就出香港讀，成績差、家境差就去南約讀？
梁：早年交通無咁方便嘅時候，讀書好定唔好都會嚟南約，雖然平均成績偏低，但有幾個係讀到書嘅。我哋有出過醫生，、工程師。
陳：佢哋成績唔好，唔代表佢哋操行唔好。有啲真係好乖，但真係讀唔到書。有啲因為係漁民家庭，佢哋覺得天跌落黎，應得。例如捉魚咁，因為係個天畀，得來太容易。雖然漁民好辛苦，但當時漁獲價錢好高，所以佢哋嘅仔女會覺得洗咩讀書啫？另外，有啲同學因為自己家庭喺地區嘅勢力好大，會覺得讀唔讀書都得，反正我有（土）地。所以要鼓勵佢哋讀書係幾難。
梁：其實當時嘅經濟活動會影響到學生讀書，我醒起兩個時期，第一個時期係好震撼咁起丁屋。原居民啲仔可以坐定粒六申請丁屋，我哋都聽過：「阿sir，我地洗咩讀書啫，我坐底有一座丁屋。」而另一個時期就影響大澳多啲，係改革開放初期，走私電器好好賺，啲學生放學就做part-time（兼職），去推啲電器上大飛。有筏可（佛教筏可紀念中學，位於大澳）教書嘅朋友畀人串：「我推電器都勁過你。」梅窩嗰時都有㗎！
問：南約點解後期愈來愈少學生？
梁：梅窩個轉捩點應該係有快船之後，好多學生轉出去讀，於是南約收生就開始跌。因為如果喺中環或灣仔返學，有快船就唔需要每日最少搭1小時15分鐘慢船。嗰時開始，就吸引家長揀出面嘅學校，唔洗局限喺梅窩讀。
陳：加上嗰時（大嶼山及離島）人口減少，通常父母出去搵食，零至六歲都係留喺梅窩，由阿爺、阿嬤、外傭照顧，等到後嚟子女會帶走啲細路出去讀書，梅窩就變成有好多零至六歲同七八十歲。而坪洲基於起咗愉景灣，成家搬咗去住，男嘅去起愉景灣，女嘅就幫愉景灣打工。愉景灣發展到差唔多，交通方便咗，所以好多坪洲人搬走咗。於是坪洲三間小學執剩一間。人口老化，年輕人覺得好難搵食，跟住又搬走。
梁：梅窩人口收縮同農業式微有關，後生一代唔再務農，咁佢哋會出去搵嘢做，唔再返嚟住。我睇返《鏗鏘集》先知，原來我其中有個學生嘅爸爸係最後一戶喺大嶼山種稻米嘅。
問：南約點解會被殺校？
陳：後期南約收生不足，會收中六、中七喺出面住嘅學生嚟讀。我試過教經濟科，一個人對兩個學生，而歷史科更試過一個老師對一個學生。由於畀人發現，教育局就命令南約執笠。其實當時教育局唔想執，但畀人質疑點解執其他（同樣收生不足嘅）中學，而唔執自己官校？所以無辦法，當時命令南約同沙頭角（即沙頭角官立中學，早於南約停辦）執，兩間都因為人數偏少，老師比例高，經營成本太貴所以執。
問：當時有無諗過其他辦法？
陳：嗰時無咁嚴，只要無人發現就無事。但因為有咗審計處之後，變咗解釋唔到。蔡崇機校長想繼續，試過搞宿舍，但都無用。我唔捨得，校長知道消息就安慰老師，畀老師選擇去留。而且對學生負責任，保證就讀中一可以讀到中三。最尾嗰屆同學都保送到筏可中學。
【結語】
訪談那日，筆者本以為與老師談及南約殺校一事，他們會充滿唏噓和遺憾，但言談間，他們卻只訴說了溫暖而豐富的回憶。相信「南約中學」的回憶，對該校師生和大嶼山人來說，一直佔着重要的位置，往事已矣，到底這所空置校舍，會迎來怎樣的命運？