......
其實我係想話，我覺得世貿紀錄片上的人是活生生的人。佢地的方式，正正係一種不亢不卑的發問我地面對一個越黎越冇得玩的世界，我地仲可以點企、點生活的姿態。
其實我係想話，係一個以卵擊石的抗爭過程中，我地要試下自自然然咁，揮發出個粒卵的美麗。「每個市民都，這麼美麗。」這條可以做 banner。「撐韓農等如撐自己！」，都得，但要長毛自己渣番住。總之，今次世貿已經逼緊我地，製作自己的獨特的發聲板︰證明唔可以下下都靠蘋果，更證明民陣唔駛 side 錢印 label，畢竟你可以想像到幾多個獨特的市民的關懷丫。
其實我係想話，「馬迷的眼睛是雪亮的」，市民就更加啦，傳媒唔好以為講兩句「韓戰爆發」就有人會信。而市民就不妨好似我咁，寫下寫下，拍下拍下，亂咁記低一點一滴的心聲。等冇機錄睇到的朋友第日可以睇到。
韓人動容的鼓聲。差佬的騰雞與其悶得滯打牙骹對白。圍觀的心大心細好想落場支持的市民。灰心並覺得都係有錢佬玩晒但其實心底好支持的市民。千里迢迢游下游下的漁夫。在同一個城市跟我們過了十年同一個星期日但到今天才相認的菲傭。每一次身體好似驚心動魄其實只係小題大做的衝撞。極無辜咁成為左壞人工具的警犬。明天後天每一道封鎖線被衝破的一刻。
其實我係想講，我要逼自己記得，李京海的死唔係為我地帶黎痛苦的無力，而係行進與面對困難既勇氣。人地死左喇，我唔係撞兩下都要諗左右諗下話。
其實我係想講，我唔可以驚，驚只係身體唔熟習個氣氛，驚只係我唔記得韓農會保護我地，驚只係呢件事未發生。
其實我係想講，我要搵到個位訓下，人的身體一軟弱，就乜都會收皮。
其實我係想講，我諗緊聽日好唔好買個頭盔，我驚催淚彈，驚橡膠子彈，但星期六（？）都要在後面一面執雞一面衝。因為我要自己記得，我最驚既其實係，如果唔衝，有一日，總會連衝都冇得衝。