依家電腦網絡流行微博，香港獨立媒體都用咗 twitter 廣播 71 嘅消息，而微博內容精短，短網址就都處都係。短網址嘅保安風險事宜並唔係新嘅學術研究，而我亦唔係專家，但作為微博嘅使用者，呢個問題避已經無可避。
首先，講講短網址令使用者面對乜野風險：
- 來歷不明嘅網址：短網址嘅好處係將長長嘅網址收埋，但同時亦可以將來歷不明嘅網址收埋。短網址伺服器好多時都會提供方法畀使用者預先知道原有網址內容，但係，第一，個個伺服器嘅方法都唔同，有啲放個「+」或「?」喺短網址後面，有啲要用唔同嘅網址（例如 http://preview.tinyurl.com/XXXXXX），家下有咁多個短網址伺服器，邊度背得咁多（好彩，有longurlplease幫手）？第二，如果你用電話上 twitter，你會唔會逐一驗查先？
- 來歷不明嘅網址有乜問題？實在數不勝數，但最經典嘅應該係個幾月前，據聞有 gmail 戶口被人 crack 咗。當然，單單點中可疑網址唔一定會令你 email 被盜 [參考 2]，但係配合到系統漏洞，就分分鐘可以秒殺。事實上用 adobe flash 而夠膽一個月都唔 update 一次嘅人又真係好多。有片自己睇： http://www.youtube.com/watch?v=CCq52MnnC4U
- 其實短網址伺服器都好努力阻止高危有害或可疑嘅短網址嘅使用。我高興有人做研究去睇短網址伺服器現成有某兩類有害網頁[參考 1]，但係，如果使用者無預先查看網址內容就睇落去，中咗釣魚網站或有古惑 XSS 網站都唔知道。事實上，用 noscript 插件（或其他減少 XSS 傷害嘅插件）上網嘅人都好少數。
- 比較少人留意嘅係，短網址伺服器，甚至短網址製造者亦可能追踪使用者嘅使用習慣，例如短網址製造者可以响原有網址加入 HTTP referrer，令短網址伺服器與原有網址伺服器知道係「邊個」介紹使用者進入。具體內容請細閱 [參考 1]
之後我再介紹以「安全」宣傳嘅短網址伺服器。有個電腦病毒防護公司都推出咗短網址服務，我自己都有用。我先講講佢（McAfee）話佢可以保護乜野：
- 惡意程式
- 電腦病毒
的確，惡意程式同電腦病毒都係互聯網嘅重要危害，但係，呢兩個並唔係短網址主要危害。短網址主要危害始終係：釣魚網站（我估計 McAfee 都可以防止，但最好係從瀏覧器上開始阻止），系統缺陷（例如 adobe 上述問題），XSS 攻擊與及私隱問題，我估計 McAfee 無乜野可以做。
所謂盡信書不如無書，如果大家以為一有咗「McAfee」個標誌就可以信賴，唔需要自己判斷，咁就大錯特錯。例如陳大文部落（注意係短網址，但可以去 mcafee 反查原網址）就一度被 McAfee 視為高危嘅色情網站，用咗 McAfee 短網址就入唔到。近來 McAfee 已經畀使用者入去陳大文部落，但上面仍然有「Categories: Pornography」的標題，唔知係唔係陳大文嘅仇家特別多咯。
另外短網址有「短上短」，呢個亦加重短網址服務者檢查短網址嘅困難（私隱風險當然亦增加了）。所謂「短上短」，以圖中「http://t.co/8TWFZhf」為例，其實佢原本係「is.gd/KI21Uv」，但係，呢個都唔係真身，唯色個網址先至係真身（蝦，終於都知道係可靠嘞）。咁樣，twitter 要知道個網址有無問題，是否真誠可靠就唔係咁容易啦（嗱嗱嗱，佢係專家，我唔係，可能佢有啲秘方我唔識攞）。相同嘅問題，當然一樣會出現喺其他短網址提供者手上。好彩，主流短網址提供者都知道「短上短」係好危險嘅，有政策禁止唔俾咁做。
雖然有短網址服務可以阻止互聯網電腦病毒與及惡意，短網址嘅原有風險始終無法消除。所以，最基礎嘅方法係唔好用。
- 如果你用 plurk 嘅話，你可以回覆你自己，喺回覆中加入原有網址。在原噗講明，原有網址會列入回覆之中
- 如果你用 twitter，老實講，我暫時唸唔到有乜好方法。Twitter 自己都有短網址服務，但我唔敢膽博膽（但我又唔知 twitter 個方法係唔係唔得，只係唔知佢可以用乜方法檢查「短上短」，唯有用 longurlplease 去預先查看原網址）
遇到有需要用短網址嗰陣，為咗短網址衛生：
- 除非你引述其他人講嘢（RT 或 RP），否則，千祈唔好轉載由其他人製造嘅短網址。當你貼一條短網址，你要確保條短網址係你製造嘅，而且你親身試過，你要知道負責任。
- 對於唔肯堅守上述原則嘅人，又或者你唔知對方乜頭乜路，千祈唔好直接開佢地嘅短網址，一定要預先查看。記住 [考參 2] 個故仔，遇上其他系統缺漏，一噤即瓜。
參考：
[1] Security and Privacy Implications of URL Shortening Services
http://w2spconf.com/2011/papers/urlShortening.pdf
[2] 點樣利用 Abode 產品缺陷和 XSS 攻擊，令你個 gmail 授權畀其他人
http://web.nvd.nist.gov/view/vuln/detail?vulnId=CVE-2011-2107
http://www.adobe.com/support/security/bulletins/apsb11-13.html
http://www.youtube.com/watch?v=CCq52MnnC4U
[3] 後來加一點，有關 http://longurl.com 使用。舉例（請點擊）。