話咁快又到左「春秋二祭」既尾聲，相信唔少「社會運動員」都在密鑼緊鼓籌備，無覺好瞓，七一亦會有唔少人咁大個仔／女第一次出黎示威。今年七一前仲有六三零呢單前奏。
胡錦濤六二九來港，七一前一日六三零已經有團體 call 遊行去會展回歸晚會抗議，警方如臨大敵，會展依家已經擺曬水馬陣。今日警方就開記者會，有記者問點解擺曬水馬陣，警方發言人就話避免有太多的情況出現在「保安區」，又有記者問點解十五年前領導人訪港，示威區可以設在消防局，今次卻要擺到去中環廣場。警方就話因應內地、鄰近地區及國際形勢，特別是九一一的恐佈襲擊，從而訂立保安計劃，記者問警方是否收到有恐襲情報，定係當香港市民都係恐佈份子，有記者追問上年李克強訪港也沒有這個安排，又問警方可否舉例講下有咩新形勢，警方就呢幾個問題都無正面回應，話屬保安機密資料喎。
警方又懶係開明話會設立「遞信區」，記者問佢是否會限制大型道具，警方就話佢地定義這個遞信區進行既活動只係遞信，如果有大型標話就話去示威區喎。記者問佢遞信區只限五至十人，是否只容許友好團體入去，警方就話唔明。但講講下原來發現呢個所謂「遞信區」，原來是領導人衫尾都見唔到，會係特區政府人員代為接受信件喎。
上年七一拉左近200人，今年梁振英當選既三二五示威同埋去中聯辦的四一遊行，示威者都與警方發生衝突。今年又有團體呼籲七一遊行的示威者到達新政府總部後繼續遊行到中聯辦。
衝突難免，有團體今年就特意出版小冊子，講下遊行示威時點樣保護自己。喺六四社記去中聯辦遊行果陣，已經有人塞左本野比八方，叫做《行動者手冊》。八方收果陣都諗，我行動多過食生菜，駛你教。點知一睇，都真係覺得本野唔錯。裏面有教見到其他朋友「中椒」點算、喺行動現場點做記錄，記錄完放唔放上網好、示威最好帶啲咩野、比人拉左既話有啲咩注意事頂、等等既行動者須知。最正o既係有篇文講點樣係示威果陣團結到周圍既人， 係香港呢個咁唔習慣同陌生人傾下既環境下，八方相信篇文唔多唔小都會有啲鼓勵作用。
見到「行動者手冊」既Ｑ＆Ａ，八方諗起上年七一晚見到，喺干諾道中有個示威者同差人講「可唔可以比我走」，果陣八方仲內心笑佢，而家諗返真係好衰仔。
八方見到本野咁堅當然要八下喇。原來本野係自治八樓出o既，話十年前已經有人提過想出，直到今年終於出到。同埋見到最近有唔少人比警察告，又有唔少新人出黎參加行，就想出本野比初入門既行動者。自治八樓既人話，見過啲示威者中左椒，之後越沖越衰，刺激o既範圍由額頭沖到變左全塊面，真係聞者傷心聽者流淚。所以，有啲基本野真係唔講唔知。
另一本手冊就係最近Facebook都幾多人Share既《七一遊行手冊》，本野係高登人集體創作，本野比較似啲遊行裝備書。用參與者心態黎分類，有分行完就算既建議裝備、行完會留係政總、想喺大會宣布遊行結束後留至比警察驅趕等。八方認為本野最精華既部分就係緊急關頭果Part，叫有外國護照既人喺「緊急關頭」可以去領事館。讀到那part，真係想講一句：「認真你就輸了」。
總之今年示威遊行，記得攞本手冊，一路行一路嗌口號一路睇熟佢就實無死。
到於上文講果兩本手冊係邊到有呢，行動者手冊會係七一當日既獨立媒體、FM101、同民間電台既攤位可以囉到。
《七一遊行手冊》就可以上網下載。