今屆香港電影金像獎，《桃姐》贏了五個大獎，國內網民勁鬧香港金像獎小圈決定，絕大部份網民對劉青雲得唔到最佳男主角替他不值，但都無去挑戰金像獎的小圈。至於香港嘅社運圈，焦點反而放咗係黃秋生在頒最佳女主角時，對「小圈選舉」嘅調笑。
八方係香港電影業嘅支持者，大部份參賽片都睇過，包括幾部呼聲最高嘅猛片：《奪命金》，《讓子彈飛》同《桃姐》，最鐘意喺《奪命金》，次之係《讓子彈飛》，所以對《桃姐》攞晒啲大獎都覺得有啲誇張，最佳男主角應該俾劉青雲，葛優都ok；而《奪命金》嘅劇本真係無得頂，將香港金融中心嘅矛盾同張力，於爆發後再 cover-up，形成一股暗湧，而唔係好似《桃姐》咁和諧，將人倫關係嘅矛盾，透過主僕關係淡化，再以旁觀的目光夾硬夾落嚟。
阿陳輝嘅描述都幾精準：
最佳電影三條窄路：奪命金是本土製作的純淨港產片，没有合拍片的制約；桃姐是大陸資金港味濃郁的港片，邏輯像是「食窮民建聯票投社民連」；讓子彈飛係完全大陸片，但對大陸政治的揭露批判不費吹灰之力，可惜這非土生港燦導演能模仿。
《桃姐》喺一開頭，無端端安排劉德華去北京傾生意，同洪金寶、徐克喺老闆面前做場戲，然後食大餐，好明顯係呢部片嘅策略。不過，民建聯係食唔窮的，而且要還，一連攞五個獎，還凸俾佢啦！
呢種小圈和諧政治，國內同胞完全唔明。詹瑞文喺微博度呻兩句話對《讓子彈飛》攞唔到獎感到沮喪，換來國內網友嘅迴響，不過有香港本地薑則鬧佢做咩要去支持國內片：
姜文+《讓子彈飛》是我在2011年看過最厲害、精彩和牛逼的電影，在昨晚的香港電影金像獎頒獎中，什麼獎也拿不到，令我感到極大的沮喪。沮喪是「標準」在那裡？如果獎項只是種商業和政治的遊戲，那香港在玩什麼？
其實我覺得本地薑係唔應該鬧詹瑞文的，因為《桃姐》得獎嘅小圈操作，真係同香港選特首有得 fight，係呢個局底下，土產《奪命金》，同國產《讓子彈飛》都要行埋一邊。
係呢個電影嘅格局下，黃秋生吋小圈選舉一席話，可謂針針到肉。再加上佢係特首選舉時，同CY企埋同一陣線，令人更加搞唔清佢究竟係以咩身份立場發言。佢成段說話有幾個 points：
１。吋金像獎小圈子內定但又唔認；
２。吋2017民選但係到時會繼續內定俾 deanie 姐；
３。若是公開公平公正就要俾 deanie 姐；
４。無形的上海仔教佢講；
唔同人對佢呢段說話都有唔到解讀，究竟佢喺度吋邊個？游清源鬧佢變身「民主鬥士」：
好多人讚秋生，我就不敢恭維！
別忘記，他是支持思歪的！而且不是精神上支持，而是跟思歪一齊落區派小冊子的呢！
關於電影界以至整個演藝界的忽然轉軚，我只想起八個字，正是：「婊子無情，戲子無義！」
從這個角度看，秋生倒是打從一開始就撐思歪的。
問題是，他昨晚又變身「民主鬥士」，實在受不了。
對不起，秋生，我們雖是朋友，但有些話，實在不能不說！
陳輝則認為佢係調侃唐唐同支持民主嘅人：
大家係唔係搞錯左D野？！黃秋生根本係在調侃唐唐和支持民主嘅人，佢嘅意思根本就係：「有D野眾望所歸，根本唔駛公平公開公正決定，就算2017真係有民主，佢一樣係贏」。他一直支持梁振英，並以葉德嫻為例撐屍歪，簡直侮辱桃姐！呢舖真係盧海鵬試咪－－X你老母西！
Denny To 則覺得演藝界肯調侃政治都係好事：
其實真係好誇張。或者咁諗，姑且降低期望，長期去政治化的本地演藝界，（終於）有人大大聲嘲弄民主、支持當權者，也算是好事一樁？總好過大家擺出一副「政治唔關我事」的模樣，繼續假裝演藝同政治無關，繼續蒙騙社會大眾。
老實講，八方係睇嗰段片時都笑爆咗嘴，佢呢段話一野踩晒全世界：小圈選舉（金像獎，特首選舉，唐英年），反小圈選舉的人（選中心目中的人就係公開公平公正），無形的台詞撰寫人（西環／神）。呢啲咪虛無囉，咩都係假，咩都攞嚟笑（其實骨子裡，八方都係一個好虛無嘅人...... 一日係咁剝花生），以笑嚟掩蓋自己放棄價值嘅追求。香港人喺呢個無話事權下嘅虛無狀態生活咗百幾年，黃秋生只喺成咗精。問題係，我地點樣走出呢個虛無嘅圈套？？？