放工後，同事問大家：「一齊去維園？」
本來打算今日自己一個去，但見同事問起，唯有一齊去。
大約7點幾，對比過去幾年，人數明顯比較少，無咩點塞之下好快就入左去大會球埸前面，如果去年依個時侯黎嘅話大概都入唔到球埸，只可以留喺草地到。有同事第一次黎，問我：「心情有啲緊張，知唔知我地要做啲咩？」
我唔知今年大會點安排，但我就好似攪手一樣咁講：「首先都係唱返幾首歌，叫下口號，之後播下片，搵人講幾句野，之後又唱下歌舉下手上燭光就完。」同事見到我咁講都呆左一呆，然後大家繼續前進。
進入維園前，同事又問：「點解咁多政黨嘅旗幟插係到嘅? 又咁多捐款箱嘅？」我諗左一諗，然後答佢：「其實我都唔知架，不如咁諗，佢地唔插支旗係到，你又點會知佢地有做緊野呢？」
同事見到我咁講又呆左一呆，然後大家繼續前進維園安靜咁坐低等待。諗起幾年前讀緊書時侯，自己上網睇Youtube，Google去了解六四係咩一回事，亦都第一次參加六四晚會，當主持大叫口號時，我出哂奶力嗌破喉嚨咁大叫口號，當唱起自由花時更覺得傷感，現埸氣氛都令我想流淚嘅感覺，總之情緒好易被牽動。
一年六四又一年，開始帶一班未去過維園嘅人一齊去，比佢地知道六四係咩一回事，亦可以一齊悼念。一年六四又一年，開始失去第一次黎嘅熱情，心中對於支聯會每年都做同一樣野感到有好多疑問。
一年六四又一年，直至今年，當主持大叫口號，當所有人都唱住歌時，我卻靜靜咁望住手上燭光，靜靜咁悼念六四死難者。因為我好清楚我今日黎嘅目的，係悼念，別無其他。望到某埸刊寫住佔領中環，除左得淡笑之外，都無其他感覺。
當舉起手上燭光時，望向天空，做緊大學生時，都好想當年「你地」一樣，做自己認為岩嘅事，為社會出一分力，但依一刻心中曾經有一團火，已經一早熜左。
有得揀，真係想一世做學生。
毋忘六四
但有一個夢，不會死，記著吧
無論雨怎麼打，自由仍是會開花
但有一個夢，不會死，記著吧
來自你我的心，記著吧