太平洋運動會於早前閉幕，今屆焦點落在密克羅尼西亞聯邦U23國家足球隊身上，因為密克羅尼西亞聯邦U23國家足球隊於分組賽3場波共失114球，史上罕見。
密克羅尼西亞聯邦位處西太平洋，由607個島嶼組成，足球並非當地流行運動，密克羅尼西亞聯邦足協1999年加入大洋洲足協，首場賽事以1比4不敵關島，同年於Micronesian Cup 1999(密克羅尼西亞盃)壓倒北馬里亞納群島奪冠，奪取首個冠軍，2003年派隊參加南太平洋運動會(太平洋運動會前身)，結果4場賽事輸晒共失52球。
2015年密克羅尼西亞聯邦在次派隊參加太平洋運動會，由於足球設施及資金嚴重不足，一直未能齊人訓練，幸好賽前獲關島足協幫助前往當地集訓，此前球員來自唔同島嶼，大家互不認識，呢批球員部分更係接觸足球冇耐甚至第一次掂足球，連控球都未掂，真真正正志在參賽。
結果，密克羅尼西亞聯邦U23以0比30、0比38及0比46不敵大溪地U23、斐濟U23及瓦努瓦圖U23，3場波共失114球消息好快傳遍世界，密克羅尼西亞聯邦U23成為焦點，亦令唔少人對密克羅尼西亞聯邦感到興趣。
雖然被世人嘲笑，但如果以一班足球初哥計，面對一批訓練有素嘅對手一場波失40球甚至50球都唔奇，能夠完成90分鐘賽事，識尊重返場賽事其實已經唔錯，輸46球又有乜好笑呢？