【獨媒報導】《施政報告》諮詢期開始，商界業界連日掀起「夜市經濟」的討論，港九新界販商社團聯合會主席陳錦榮今早在電台節目獻計，提醒政府要抱「救市」態度，「思維要開放嚟」，對店舖阻街及車輛違泊「寬鬆啲」，不應「成日講住環境衞生啊、治安啊，或者點樣影響人」。陳錦榮另外建議政府派發只准入夜後使用的「晚市消費券」，亦建議參與深圳珠海夜市模式，在尖東海傍擺過百檔熟食，營業至凌晨4點，他認為可以吸引不少旅客，亦令香港人「一諗起就夜晚出嚟食嘢」，是「一個好好去處嚟㗎」。
陳錦榮一直活躍於廟街，任廟街販商商會主席逾30年，他今早在港台節目《千禧年代》中形容，與疫情前相比旅客數上有上升，不過購買力未復蘇，廟街生意「差咗一半有多」，很多檔販「吊鹽水」正在等待政策。他又稱現時被網購「打得好慘」，旅客買手信僅是「象徵式」，不如昔日大手購買。
籲政府「搞啲嘢」總比坐以待斃好
對於「夜市經濟」的討論，陳錦榮認為「唔知成效有幾大」，但亦樂見政府嘗試，「好過坐以待斃」，他形容現時佐敦及油尖旺一帶，「未見過條街咁冷清，一到11點後已經無咩人行街，覺得好似變咗咁樣」。陳錦榮認為政府應「搞啲嘢」，要從「旅客鍾意乜嘢、本地人點解要出夜街」的角度切入，建議戲院可以推出夜晚30蚊睇戲優惠，交通工具營辦商亦以推出各類優惠；政府亦可以再派消費券，不過限制夜間消費，或者只限派給旅客或「某類人士」，總而言之官員需要思考「諗點樣令條街旺返哂」。
他續提出建議，認為「旅客最鍾意坐出邊門口」，政府應「放寬啲做露天茶座，本地人渣車出嚟，到咗某啲鐘數，唔阻交通就寬鬆啲啦」；另外「擺啲枱出面，唔阻街嘅畀佢少少」，增加10至20%座位，「等營商環境好啲」。
反對18區設夜市 集中搞好油尖旺廟街
但陳錦榮反對18區都設夜市，因為「再搞無意思，根本上唔夠客」，他認為「搞好現有嘅店舖」方為成功之道，「唔係話整多個市集，整多兩條街道，咁係唔實際，試過係會失敗㗎」。
他認為成功的模式可參考珠海的「夏灣夜市」，他謂「既然香港購物天堂暫時無法扭轉頹勢呢，咁我哋要諗好美食天堂方面，我諗香港仲有優勢嘅」。他已經向政府官員游說珠海「真係好成功」的經驗，暫定建議在尖東海傍，容許晚上9時後「畀有一百檔熟食檔」營業至半夜4點，他相信可以吸引不少旅客，亦令很多香港人改變想法「肯出街」、「一諗起就夜晚出嚟食嘢」，他相信會令尖東海傍成為「一個好好去處」。
主持人反問，他的種種建議會否影響民居及附近環境衞生，陳錦榮即表示不同意，政府官員應「思維要開放嚟」，要一心「救市」、「非常時期有非常手段」，不能「成日講住環境衞生啊、治安啊，或者點樣影響人」，他指維園過百檔花市都可以清潔到，「完全可以用其他配套」，例如政府向檔主徵收的費用用於清潔及治安。