（獨媒報導）立法會內會副主席馬逢國昨日以代主席身份，主持會議期間瞓覺。馬逢國事後解釋指「其實瞇埋咗眼」及「呢輪瞓得唔好」：「我其實醒嘅，只不過因為⋯⋯佢一講我都噏得出嗰個人嘅名，我自己知道好短時間，其實係瞇埋咗眼，唔係瞓著，自己知嘅。」
馬逢國在會後被記者追問
立法會昨日下午二讀討論《2023年罰款及定額罰款（公眾地方潔淨及阻礙）（雜項修訂）條例草案》即店舖阻街，多名議員陳凱欣、廖長江、梁子穎、狄志遠輪流發言，主席梁君彥因事離席，由內會副主席馬逢國以代主席身份主持會議。
在狄志遠完成發言後，直播畫面顯示馬逢國正低頭瞓覺，期間約10秒，立法會秘書在旁連叫三聲：「主席、主席、主席，馬生！」此時才一言驚醒夢中人，馬逢國回過神來後，喚下一名議員林振昇緊接發言。
立法會秘書連叫三聲：「主席、主席、主席，馬生！」（直播截圖）
馬逢國回過神後喚林振昇發言（直播截圖）
馬逢國指近日太忙 涉立法會及人大工作
在會議後，多名記者問馬逢國：「點解瞓著咗嘅？」馬逢國稱：「你哋睇到我呀！呢輪瞓得唔好囉！真係唔係好夠瞓。」記者再問：「呢輪忙緊啲咩呀？」馬逢國就稱：「點講呢？好多嘢。幾十樣嘢忙緊。」
記者隨即表示「講一兩單嚟聽吓」，馬逢國表示：「講唔到咁多啦，上面一大咋啦，立法會又有，人大又有。」
稱三年瘦四十磅 曾立法會用膳後瘦七磅
有記者就關心馬逢國的健康：「唔係話唔舒服，所以嗰吓有少少⋯⋯？」馬逢國稱：「瘦咗好多啦，Fit 咗好多嘛，有啲人話你瘦咗好多嘛，我話係呀，瘦咗加埋成四十幾磅。」
記者再問：「因咩事瘦咗咁多？」馬逢國稱：「我瘦咗三十磅就係兩、三年嘅事啦，嗰個係刻意減嘅。最近一次呢就唔好講啦，講咗又是非多。我有一次喺立法會食完晏晝，喺樓下，一日唔見咗七磅，一個月度啦，跟住嗰個禮拜再瘦多五磅，都有關。十幾磅，但我唔想賴。」
下次食刺激食物提神 飲咖啡「唔一定有用」
有記者問馬逢國，下次會如何提神及避免，馬逢國稱：「好容易㗎啫，食啲刺激啲嘅嘢咪得囉。或者唔係咁晏食飯，我諗我好晏先食飯，成三、四點先喺自己寫字樓食飯。」
記者最後問馬逢國會否飲咖啡提神，馬逢國表示「唔一定有用」：「總之盡量第日開立法會瞓好啲，我瞓得唔好，半夜我起咗三、四次身，一醒咗搞一輪睇手機先瞓。」
翻查報導，馬逢國有開會期間瞓覺的前科。在去年12月，梁君彥被列為新冠密切接觸者，未能主持會議。馬逢國同以內會副主席代主持會議，期間亦曾「閉目養神」。