屯敘記者：阿聰
8月初，專頁「青山散步」 貼了一張屯門新墟Neway清理雜物的相片，令一眾網民揣測其是否已結束營業。大批網民於專頁留言：有些人慨嘆「青春一去不返」；有些人惋惜「娛樂行業俾武肺玩殘」。本報記者收到Neway回覆指，新墟Neway已結束營業。八十後屯門街坊華女常常到屯門Neway唱K，她認為區內有「K房」，「唔擔心冇車返屋企」。
新墟Neway已結業 Neway：另開分店方面，還請期待
網民知道新墟Neway結業後反應甚大，大部分留言都感到可惜及不捨。在尚未確定它會否於屯門另開新店之時，新墟Neway是很多八九十後的集體回憶。
本報記者電郵Neway，查詢屯門分店是否已結束營業，以及會否在屯門另覓選址開分店。Neway客戶服務部回覆指：「屯門Neway已於較早時間結束營業。而於屯門另開分店方面，還敬請閣下期待，有最新消息本公司亦會盡快對外公佈。」
全盛時期進駐屯門
八十年代末，唱K文化從日本傳入香港，九十年代中期開始普及化，九十年代末至千禧之初進入全盛時期，多家卡啦OK公司的出現於當時構成爭霸之局。「新歌試唱」、「K房」、「K Buffet」、「K Lunch」等用詞成為了人們溝通交流（生活文化）的一部分，Neway也在這個鼎盛時期進駐屯門。自此之後，屯門人不用到華都商場卡啦OK房唱舊歌，不用離開屯門，都可唱新歌做潮人。唱K成為了屯門人文化的一部分，也是屯門與時並進的標記。
街坊：屯門有K房，唔使驚冇車返屋企
新墟有K房後，八十後華女感到興奮，因為可以「唱到好夜都唔擔心冇車返屋企」。她常常唱K，除了因為自己喜歡唱歌外，更重要是這地方是一個暫時放下身分的空間：「同我嘅仔女、細佬、表兄弟妹一齊瘋狂又唱又跳，好似忘記晒做人阿媽煩惱咁！生日又有蛋糕送，雖然唔好食但大家食得好開心。」她又指K房是挑戰的場所以及聯繫情感的地方：「揀首好難唱嘅歌俾人挑戰，好似關心妍、側田嘅歌畀人唱然後笑佢走音，都係難忘回憶。」
晚飯後的聚腳地
九十後居於新屯中的Kobe指新墟K場用來歇腳：「有時Weekend係市中心食完飯，又想搵個地方聚下，咪去唱貓頭鷹時段。」對他來說，唱K已是生活一部分，有很多難忘的故事：「記得上年一大班朋友唱K，我唱唱下歌訓著咗，之後班friend係度玩，有個女仔朋友扮訓係我旁邊，俾另一個friend影相 ，post左出嚟。我女朋友知道咗，到而家仲話緊我！哈哈﹗」可見，K房即使很嘈，不是一個常態的溝通空間，但它仍是建立人際關係的網絡之一。
屯門之後究竟有沒有K唱，還待時間來確定。然而，它在特定時代出現過的影響，以及它對屯門人回憶的建構，不用確定，也很清楚。