「由治及興」嘅好處唔知大家有無幸見證到，但可以預視到嘅係，當消費物價指數及運輸業名義工資指數於過去一年有明顯增長，今年鐵路票價加價在所難免。若考慮「延後加幅」及用作封頂嘅「負擔能力上限」，而鐵路公司並無作任何特別扣減的話，估計今年加價幅度最多高達3.09%。
(1) 首先由「票價調整機制」公式講起，每年都會根據上一年12月嘅數據，得出呢個年度整體調整幅度，公式為：
0.5 × 綜合消費物價指數按年變動 + 0.5 × 運輸業名義工資指數按年變動–生產力因素
若按公式得出 +1.5% 或以上，鐵路公司可按機制加價。
＊現時已公佈數據僅有2023年12月綜合消費物價指數，為+2.4%。
＊運輸業名義工資指數則於三月底先公佈，而2023年首三季數據分別為+5.3%、+6.0% 及 +6.0%，各個選定行業名義工資指數之中長期「位列前茅」，證明運輸業要大幅加人工先有得「搶人才」。
＊去年檢討「票價調整機制」時，「生產力因素」被重新定義為「香港物業發展利潤」，按特定利潤水平而得出0.6% 至 0.8%嘅票價減幅。然而舊年地產市道不似預期，估計「生產力因素」為0.6%嘅機會甚高。
＊假設「生產力因素」如大家所料為0.6%，只要2023年12月運輸業名義工資指數按年變動大於或等於+1.8%，就會達到加價門檻。
(2) 假如鐵路公司今年能夠按機制加價，另一個需要處理嘅項目係自2019年開始滾存嘅「延後加幅」。舊年票價調整機制檢討以後，延後加幅於2024/25年度嘅可用餘額為+1.85%。
(3) 鐵路票價嘅「封頂」加幅，則受「負擔能力上限」所限，亦即係「家庭住戶每月入息中位數按年變動」。2023年第四季數字為+3.09%。
如果經(1)提到嘅公式運算出嘅數字高過+3.09%，餘下應加未加嘅幅度會滾存至下一年度。若運算幅度低於+3.09%，則會加入(2)提及嘅「延後加幅可用餘額」。但追加幾多都好，(1)及(2)合計嘅最終加幅都只會係+3.09%。
今年加價結果如何，還看3月底公佈嘅2023年12月運輸業名義工資指數。只要該指數大過或等於+1.8%，咁可以肯定今年鐵路票價又有得加。當啟動加價程序後，假如鐵路公司並無作任何特別扣減或自願延後加幅，相信都會選擇加到最盡3.09%。
（本網歡迎各界投稿，文章內容為作者個人意見，並不代表本網立場。）