鐵路公司於剛過去嘅週末（4月8日及9日）推行首輪「感謝日」，乘客可以用半價乘搭除機場快綫及東鐵頭等外嘅車程。然而當香港全面放寬出入境防疫措施，市民等咗三年終於迎來清明及復活節長假期，選擇走去離港外遊，大家難免質疑鐵路公司「真係識揀日子」做優惠。鐵路公司回應傳媒查詢時，則指4月8日及9日嘅客流量與疫情前復活節假期相若，比疫情期間嘅復活節更有所回升。咁點解鐵路公司會無啦啦做感謝日？乘客又係咪真係能夠受惠？
「感謝日」（正式名稱係「特別車費日」）源於剛於3月完成嘅「票價調整機制」檢討，用以提供半價優惠嘅款項乃由舊年嚴重服務延誤嘅「罰款」所撥出。按檢討後嘅「服務表現回贈」安排，鐵路公司需要就2022年嘅事故撥出1.03億元「罰款」，以每2500萬元為一天「特別車費日」去計算，前後需提供四日「特別車費日」。
至於點解特別車費日一定於週末進行？主要原因係週末乘客量相比平日來得平均，即使半價乘車能夠吸引更多乘客使用鐵路，鐵路系統亦能應付到額外人流；若於平日進行，繁忙時間本已擠迫嘅鐵路系統，難以再有容量承受半價所帶嚟嘅乘客。鐵路公司首輪「感謝日」定於復活節長假期進行，相信係希望讓乘客及早受惠於票價調整機制檢討後嘅新回贈安排。但乘客係咪真正感受到機制檢討後嘅「成果」？咁就視乎大家能否盡用「感謝日」嘅半價乘車優惠。
火車未到站圖片
＊＊＊
2023年度票價調整機制檢討引入「特別車費日」，被取消嘅就係過去六年、為期至少半年嘅「程程3%車費回贈」。「3%車費回贈」優惠款項除咗源自當時稱為「服務表現安排」嘅「延誤罰款」外，亦包括根據鐵路公司基本業務利潤水平作對照而定嘅「分享利潤機制」。
不過今次檢討，直接將票價調整機制公式嘅「生產力因素」，改以鐵路公司香港物業發展利潤掛鉤，直接降低票價調整幅度0.6%至0.8%，亦間接反映設立「分享利潤機制」嘅原意。若票價公式已直接反映物業利潤並用作下調票價調整幅度，再要鐵路公司繼續推行為期至少半年嘅3%車費回贈，相信鐵路公司未必能夠接受於機制中以此方式為利潤表現作 「Double Count」。
＊＊＊
若要知道大家係咪能夠於「感謝日」真正受惠，咁就需要一齊計計數。以一個住深水埗、打中環工嘅打工仔為例，每日來往深水埗及中環嘅八達通單程車費為$12.5，九七折後折實車費則為$12.1。於「程程3%車費回贈」推行半年嘅情況下，以一個月返20日計，呢位打工仔前後慳咗$96。換句話說，呢位乘客如果要真正受惠於半價乘車，就需要於4日「感謝日」中慳到超過$96，先叫著數咗。
咁$96又係咩概念？就算呢位住深水埗嘅乘客，於兩輪感謝日都經羅湖/落馬洲返深圳一轉，來回一次可以慳$42.4，兩轉都只係慳咗$84.8。又或者呢位乘客於四日感謝日唔遠唔去，去屯門、東涌親近大自然，再去埋迪士尼同海洋公園兩個主題樂園，合計都只係慳返$67.4。更實際情況係，打工仔週末真心想抖下，佢選擇唔出街的話，慳到嘅車費就係$0。所以，除非乘客於「感謝日」不斷遊車河，仲要有咁遠去咁遠，先有機會叫打個和。
＊＊＊
搭得鐵路嘅乘客，無非都係希望車程穩定、時間可控，絕對唔希望見到出現事故，特別係繁忙時間。但「感謝日」偏偏要係鐵路嚴重延誤過後、累積至每2500萬先向乘客提供。大家期望鐵路公司能夠提供更多車費回贈嘅同時，唔通又希望鐵路經長故障而提供更多「感謝日」咩？再者乘客於繁忙時間因服務延誤所導致嘅損失，亦非單靠「感謝日」就能夠補償。既然如此，做返為期至少半年嘅九七折優惠，雖然每程回贈幅度較低，乘客嘅獲得感亦無半價優惠嚟得明顯，但至少九七折優惠大家都能受惠，來得實際。
（本網歡迎各界投稿，文章內容為作者個人意見，並不代表本網立場。）