紅磡係一個好特別嘅地方，一條火車軌之隔，嗰邊舊紅隧收費廣場上面諗住起大酒店，呢邊前貨場碼頭上面就計劃起住宅同遊艇泊位。發展局向立法會發展事務委員會提交文件，交代紅磡站一帶海濱用地嘅發展方向，預計2037年前完成所有發展。紅磡作為重要交通樞紐，於香港交通發展歷史上別具意義，但初步發展方向見唔到有任何著墨。「發展就是硬道理」嘅同時，市民大眾嘅感受，先至係最重要。「站見鐵路展」開幕一週年之際，能否讓退役列車獲得可以「長見」嘅永久展示空間？
紅磡站變大商場 真．大酒店
紅磡站周邊用地諗住點發展？由北到南嘅初步發展方向如下：
一）商場、酒店平台及公共運輸交匯處（紅磡站以北）
現時紅隧巴士轉車站（港島方向）上方建議興建平台、商場、兩幢酒店及其他商業大樓。平台地面層將會重置現時過海巴士轉車站；平台上方則建議重置現時紅磡站巴士總站，方便乘客於同一大樓內轉乘唔同巴士，並設置空調候車室。
現有紅磡站巴士總站，則計劃改劃為綠化休憩空間，發展成「車站廣場」。
二）旅遊巴士上客區及休憩空間（紅磡站以南）
紅館旅遊巴上客區建議由現時紅磡站以南位置，遷移至紅磡站以東近紅館位置；原有旅遊巴上客區計劃改為公共休憩空間。
三）50層地標性商住兩用大樓（紅館前方）
建議興建「地標性商住兩用大樓」，最高層數考慮提供「獨特並刺激吸引」嘅休閒娛樂設施，例如空中步道、滑梯、滑索、觀景台及高層室內餐飲。另外建議設置遊艇會所設施，並邀請私人機構建設及營運。至於樓下樓層則建議作住宅發展，連同部分臨海地帶將提供約1300個單位。
四）前貨場碼頭用地（紅磡海濱）
建議興建「具標誌性綜合娛樂商業設施」，採用「階梯式建築物輪廓」，提供餐飲及「娛樂型零售」體驗。前碼頭最南端將發展為「打卡和活動廣場」，稱可以近距離睇煙花。
五）遊艇停泊設施（前貨場碼頭以西水體）
建議設置高端遊艇停泊設施，可以容納約200艘遊艇。
六）水上休閒設施（前貨場碼頭以東水體）
建議提供浮台等水上休閒設施，可以進行水上娛樂活動或戶外表演。
七）新行人通道
建議興建三條新行人通道，包括 (1) 橫跨紅磡繞道嘅天橋、(2) 連接紅磡站大堂同紅館嘅新天橋，以及(3) 連接尖沙咀同紅磡海濱長廊嘅行人板道。
紅磡印證交通發展歷史 交通文化歷史值得傳承
近年政府積極推廣「香港無處不旅遊」，提倡「以文塑旅，以旅彰文」，希望將香港獨有嘅文化融入旅遊體驗。運輸及物流局局長陳美寶早前喺「站見鐵路展」九廣通列車進駐儀式講過：「我認為有陣時我哋去諗呢啲旅遊點，就係要利用返我地自己喺我哋嘅交通運輸基建。我們嘅鐵路就係我們嘅本錢、我們嘅底氣。大家要多啲發掘呢啲我哋本身存在已久、一啲好珍貴嘅資產。」
交通文化本身就具有極高嘅旅遊價值，只要好好發揮，一樣可以吸引遊客。紅磡站周邊用地嘅未來發展，除咗推動遊艇旅遊外，我哋更加希望可以融入交通文化嘅元素。遊艇同鐵路都係運輸工具，兩者並無衝突，反而可以互相輝映，突顯紅磡一直以嚟作為交通樞紐嘅歷史地位。因此，政府同鐵路公司應該把握今次機會，喺未來紅磡站周邊嘅發展項目入面，預留空間俾退役列車作永久公開展示，將交通文化融入社區，吸引更多遊客，同時保留香港嘅集體回憶。
紅磡印證首條海底隧道通車，過往係城際直通車總站以及鐵路貨場所在地，依家更係兩線鐵路匯聚嘅重要轉車站。呢片土地絕對能夠說好「香港運輸物流故事」，而唔係淨係得高樓大廈同商場。
（本網歡迎各界投稿，文章內容為作者個人意見，並不代表本網立場。）