最近鐵路公司換晒站內車費告示板，唔再show晒每個站嘅價錢，淨係列出車票種類，然而有乘客發現票種少咗「屯門－南昌全日通」。《明報》3月29日曾經引述消息指，鐵路公司「正檢視取消」呢款全日通。到底呢一款自2004年推出、旨在鼓勵大家搭西鐵嘅日票，去到2025年仲有幾多人會買呢？周末去新界西北嚟個「輕旅行」，又或者屯元天Slasher，呢班全日通嘅用家，又有冇其他合理替代優惠呢？
🤔全日通 乜東東？
「屯門－南昌全日通」依家賣$30，買咗嗰日可以無限次搭屯馬綫屯門至南昌沿線車站、輕鐵同埋行新界西北嘅港鐵巴士。另外仲有全日通「十換一」優惠，儲夠十張過期飛，就可以換一張新嘅全日通。
呢款飛嘅前身，係2004年底九鐵推出嘅「西鐵節日通」，為咗谷起載客量麻麻嘅西鐵。嗰陣唔止包西鐵、輕鐵同九鐵巴士，仲有接駁去尖東站嘅K16、去旺角嘅新巴701線、去深水埗嘅新巴702線，仲有接駁荃灣站嘅專線小巴95K線。 後嚟「西鐵節日通」改名做「西鐵自悠通」，喺2007年1月1號開始，取消咗免費搭新巴701、702線同埋專線小巴81K、95K線嘅優惠。 兩鐵合併之後，呢款飛又改名做「西鐵綫全日通」；到西鐵綫由南昌伸延至紅磡之後，就改到依家個名，仲取消埋免費搭K16嘅優惠。
👍偶爾跨區乘客：屯門南昌日票仍然最抵搭
參考《明報》3月29日報道，鐵路公司強調「隨着乘客出行模式及市場環境等轉變，屯馬綫常客亦可用全月通，這些乘客一般可省三成或以上車資，並可享連接車程七五折，更能照顧常搭港鐵的中長途乘客需要及負擔能力。」但事實上最常用全日通嘅，唔係日日都要跨區返工返學嘅人，而係間唔中要跨區去新界西北嘅乘客。
講個真人真事，敝站清潔姐姐以前住海壇街嗰邊，成日都會入去新界西北一日遊。所以站長跟清潔姐姐好多時都會特登行去南昌站買全日通，因為一個價錢包埋任搭輕鐵同港鐵巴士：去元朗大馬路掃街又好、去屯門蝴蝶灣散步，再去青海圍食雞煲都好，行程彈性又抵用。以成人八達通計，南昌至屯元天各站單程$17.8，來回$35.6，即係買$30全日通已經回本，仲未計屯元天入面搭輕鐵同巴士車費。
調返轉，住喺屯元天嘅街坊，如果得閒先出去荃灣或者九龍，全日通同樣抵玩。即使目的地唔係荃灣西、美孚或南昌，只需要喺目的地車站，補返由美孚或者南昌接駁車程嘅八達通車費就得（以較低者為準）。以來往屯元天同旺角為例，全程八達通車費要$20.8，來回就要$41.6；但如果先用$30買全日通，再補接駁車程（南昌－旺角）嘅$4.9，來回就係$39.8，平$1.8。當然咁樣搭仍然貴過搭巴士，但起碼喺張飛適用嘅範圍內，可以靈活規劃行程，隨時上落車。
🙅♀️全日通唔可以完全被取代 「發現號」套票未必啱乘客需求
「屯門－南昌全日通」最大嘅賣點，係畀間唔中去新界西北嘅乘客提供彈性及選擇權，其他票種並唔能夠完全取代。鐵路公司若以「乘客出行模式改變」取消全日通，理應提供更多靈活多元的票種，而唔係一刀切減少選擇。全日通用家可能少咗，但某程度上係因為鐵路公司近年無乜點宣傳。如果賣出嘅日票真係少咗，都應該提供相關數據出嚟等大家參考下，並提供合理嘅替代方案。
鐵路公司今年年初推出推出周末及假期限定嘅「屯門發現號」套票，盛惠50大元，可以一日任搭輕鐵，但唔包屯馬綫任何路段同港鐵巴士。貴過全日通三分二，但搭得嘅範圍細咗。而且套票送嘅優惠券又未必啱用：e-Store門市$50優惠券，未必搵到啱心水嘅鐵路精品；指定車站便利店$10折扣券，要買夠$20先用得；至於咖啡同保健產品買一送一優惠券，啱唔啱用就真係見仁見智。但最令人唔明嘅係，鐵路公司明明喺屯門區有三個商場（新屯門商場、恒福商場、海趣坊），而推出「屯門發現號」旅遊專線又話要「推動地區鐵路遊」，「為地區經濟帶來新機遇」，但點解呢個套票唔順便帶旺下呢三個商場？
全日通用家最需要嘅始終係交通彈性，派優惠券根本補償唔到。鐵路公司舊年9月取消「輕鐵個人八達通積分優惠」嗰陣，曾經喺其應用程式提供搭輕鐵15次或以上送3000積分嘅特選優惠嚟補償。如果鐵路公司真係要取消「屯門－南昌全日通」，又有無咩補償方案畀相關嘅日票乘客呢？「屯門發現號」又貴又多限制，點稱得上係替代方案？
屯馬綫全線通車後，連接新界及九龍東西多個新發展區，更貫穿啟德體育園。政府日日講話要「無處不旅遊」，與其取消全日通，不如考慮將全日通適用範圍延展到屯馬綫九龍區所有車站？有旅遊網站於發售本地受歡迎「曲詞編監」歌手演唱會門票時，提供一款包括演唱會門票及任搭巴士72小時嘅套餐；鐵路公司不如參考下，將全日通定位為本地居民適用嘅多程車票？但就算最後揀「屯門發現號」作「屯門－南昌全日通」替代，最少都應該擴大套票適用範圍、下調票價，甚至提供「十換一」等長期回贈，先至可以滿足出行模式改變下乘客嘅真正需要。
（本網歡迎各界投稿，文章內容為作者個人意見，並不代表本網立場。）