（6年半前嘅）上回提到，運輸司施恪（Alan Scott） 於1983年1月21日正式宣佈，政府未能與九倉就興建屯門輕鐵計劃達成協議，並開始與各海外財團洽談接手。點解最後會係九鐵承辦屯門輕鐵？當中又有咩考慮因素？
咁係因為九倉悲觀，政府睇到屯門起輕鐵帶嚟嘅好處
九倉集團退出屯門輕鐵計劃，部分原因係天水圍發展計劃縮減及物業市道衰落，導致輕鐵估算乘客量及預期盈利較早年磋商時為低。但政府唔係咁諗：施恪宣佈九倉退出計劃時，仍堅定地強調「最新的研究顯示，經營輕便鐵路運輸系統，在財政上是合化算的」。
政府選擇推展屯門輕鐵，係因為當時「仍有足夠時間」考慮計劃去向。施恪於1983年2月2日出席立法局會議時，提及政府早在1977年發展屯門新市鎮時，已預留土地發展輕鐵作為區內運輸系統。當時計劃輕鐵系統能於1986-87年投入服務，而輕鐵施工期約為36個月，所以當時仍然有時間「追落後」。佢又提到，如果呢個時候決定改用巴士或其他系統，需要花額外成本修改原來專為輕鐵設計嘅配套。
海外財團無人想經營 地鐵想接辦輕鐵但政府最後搵九鐵
九倉退場後，政府陸續接洽唔同財團，了解佢哋對屯門輕鐵計劃嘅意向。然而佢哋淨係對興建輕鐵系統有興趣，但無意參與經營。1983年1月24日《華僑日報》及1月30日《香港工商日報》曾引述消息，指當時有四個財團有興趣參與輕鐵計劃，包括「英國製造地下鐵路車廂之公司（英國都城嘉慕公司）、加拿大之市區運輸發展公司（Urban Transport）、澳洲禮頓機構工程公司與英國之通用電器公司等」 ，但「據報無一集團願意經營」。
時任地鐵主席唐信（Norman Thompson）曾經放話，倘若政府邀請接辦輕鐵計劃，地鐵樂意答應；但政府不曾考慮過「地鐵」呢個選項，主要基於其財務狀況以及成本效益。財務狀況方面，地鐵當時起完修正早期系統及荃灣綫，呢個時候起緊港島綫，財務負擔極為龐大，政府認為「較不適合」再承擔輕鐵項目。而從成本效益而言，基於新界西北地區運輸需求未達到興建重鐵系統需求，加上重鐵建造成本遠較輕鐵為高，故認為地鐵無需延伸服務範圍至屯門區。按運輸司施恪於1983年12月7日立法局會議引述數字，指區內運輸需求唔會超過每小時3.5萬人，毋須興建每小時運力達6萬人嘅重鐵系統；而重鐵系統每公里建造成本比輕鐵貴至少2.5倍；倘若行走地底，更唔止呢個數。
政府考慮大半年後，於1983年11月底決定邀請九廣鐵路公司，「考慮出任」屯門輕鐵系統嘅擁有人及經辦人。11月23日各大報章均提到，政府於外國財團接洽後，認為最好嘅辦法係「與一間公營公司合作」，而施恪表示搵九鐵係「理所當然」嘅選擇。政府邀請九鐵參與輕鐵計劃，主要原因係九鐵「有權借款」。九鐵公司於同年完成鐵路現代化及電氣化後，預期於八十年代末會有盈餘，比地鐵有能力繼續發展及承擔輕鐵。而公營公司營運輕鐵嘅盈利將「由公眾所有」，而並非歸於私人經營者。
政府無意強迫但鼓勵九鐵接手 准九鐵延遲攤還貸款 並按提供區內交通專營權
政府宣佈邀請九鐵考慮承辦屯門輕鐵後，九鐵表示需要6至8個月時間，決定是否承辦屯門輕鐵。半個月後，《華僑日報》引述政府高層人士，表示「無意強迫」九鐵公司一定要興建屯門輕鐵，但強調政府會負責出面收地，財政上對九鐵有利。而九鐵於1984年1月委託曾經參與屯門輕鐵系統研究報告嘅「史葛·區柳新·高柏力顧問工程公司」（Scott & Wilson, Kirkpatrick & Partners），協助九鐵董事局審核整個計劃，並準備報告以協助董事局作最終決定。
政府於1983年11月表明輕鐵興建費用要由九鐵跟佢選擇嘅財團自行籌募，政府係「不給予任何財政的支持」。研究完一輪後，九鐵原則上同意承辦輕鐵計劃，但仍希望政府澄清財政問題。《華僑日報》1984年4月24日曾引述消息指，九鐵董事局睇完顧問公司報告後，希望政府負責收地以及協助興建車站月台，原因係輕鐵車站商業價值不大，政府代辦可減輕九鐵經濟負擔。而九鐵總經理喬沛德（Peter Quick）5月9日於香港哈佛大學同學會演講時，提到九鐵正與港府研究透過包括修改法例等方式推展屯門輕鐵計劃。當中所指嘅訂立法例，就係於經營範圍上「以作保障」，包括後期大家所認知嘅「輕鐵專區」政策。
至1984年7月，社會傳出政府答允給予「優厚條件」，以鼓勵九鐵承辦輕鐵計劃，而九鐵最終於7月16日召開記者會公佈有關決定。喬沛德當日提到，港府同意九鐵可延遲攤還十億元貸款，以免因該公司興辦屯門輕鐵而負債更大。據7月26日《華僑日報》引述消息指，則提到「優厚條件」包括：（1）將九鐵欠下政府十億債務延至1993年償還，（2）沿線土地必須補地價，以及（3）減低小巴與巴士造成的激烈競爭。所謂「減低競爭」就係讓屯門輕鐵成為屯門各區唯一的交通工具，巴士及小巴將不能於輕鐵服務範圍內提供服務。
社會大眾點睇呢種幾乎「壟斷屯門及元朗新市鎮公共交通」嘅保護政策？輕鐵計劃有邊啲推手？輕鐵能否成功落實又跟信心危機有咩關係？我哋之後再講。
（本網歡迎各界投稿，文章內容為作者個人意見，並不代表本網立場。）