電車5月12日加價，成人票價由現時$3.0加到$3.3 (+10%) ，小童票價由$1.5加至$1.6 (+6.67%） ，65歲或以上長者票價由$1.3加至$1.5 (+15.38%)。電車本身收得平，就算加價一成仍然「平絕港島北」。電車乘客量一路跌緊，單靠乘客車費難以維持收支。近年電車積極開拓廣告、觀光及消閒等非票務收入，對收入貢獻良多。電車依家面對緊乜嘢挑戰？又可以點應對？
電車營運面對乜嘢挑戰？
電車面對鐵路、專營巴士激烈競爭，客量自1980年代持續下跌。近年政府大力發展九龍東、新界北等地區，港島人口持續減少。1978年電車嘅日均載客量約38萬人次，1998年跌到去25.4萬人次。2014年底港島綫由上環延伸至堅尼地城後，對電車客量影響更大。2024年電車日均客量只得約13.8萬人次，比1978年跌咗六成。
政府於2012年推出「兩元乘車計劃」，長者及合資格殘疾人士搭巴士及鐵路只需兩蚊，搶走部分電車乘客。電車65歲以上長者嘅票價一直低過兩蚊，電車公司曾要求政府藉呢個計劃補貼長者免費搭電車，但遭到政府拒絕。當電車長者票價與其他公共交通嘅差距縮小，而高地台且缺乏冷氣設計或影響乘客體驗，部分受惠乘客轉為乘搭更舒適便利嘅交通。2022年政府將計劃受惠年齡由65歲降到60歲，電車先加入計劃，並開始從政府收取60至64歲、以及合資格殘疾人士乘客嘅票價差額補貼。
除咗客量下跌，請人難同員工老化同樣影響電車營運。近年各行各業都要「搶人才」，而運輸業因為工時長、上下班時間唔穩定、工作環境相對辛苦，加上需要較多技能同技術，請人已經好唔容易。唔少運輸機構會開出較高薪酬，提高職位吸引力。但近年社會更追求Work-life Balance，單靠高薪都未必吸引到新人入行。過去五年，電車公司嘅車長同技工人手持續減少，前線員工老化情況嚴重，有三分二員工超過50歲。電車公司規模同財源不及巴士或鐵路公司，薪酬待遇條件相對遜色，令請人更加困難。
電車收入來源
電車公司主要收入來源包括乘客車費及非票務收入兩部分，但收入結構於過去十幾年出現變化。乘客車費過往佔總收入近四分三，依家跌到去約四成。而廣告收入由2010年僅佔總收入兩成，大幅增加至總收入嘅約四至五成。2024年電車車費收入約1.29億元；而廣告收入受惠於一次性項目推動，達約1.54億元，較2023年增長33.7%。
電車乘客量持續下跌，乘客車費收入減少，近年對非票務收入更為依賴，並需積極開源。電車嘅非票務收入主要來自電車車身及車站上蓋廣告，亦包括企業贊助免費乘車日、包車服務、旅遊套票及紀念品銷售等。然而非票務收入容易受經濟環境、企業宣傳預算及消費氣氛所影響，具不穩定性。所以電車需要持續開拓多元化收入來源，包括旅遊產品、包車服務，品牌聯乘等範疇。
講到電車開拓新財源，一定要提「免費乘車日」。電車公司曾於訪問及，2022年嘅12個免費乘車日帶嚟共1200萬元收入，除返開平均消費約為100萬元，包括車費、車廠舉辦活動費用及車身廣告等宣傳費用，但未扣除活動成本。免費乘車日有助贊助企業或團體提升曝光度及形象，不過免費乘車日嘅日數由2022及2023年嘅12日，舊年得返6日。今年去到今時今日都係得由歌迷應援會贊助嘅一次。由此證明企業贊助嘅收入模式，容易受經濟環境影響，穩定性有待考驗。
電車勝在性價比高 歷史文化增旅遊價值
電車面對唔少挑戰，但除咗歷史文化外，票價及時間仍具備優勢，成為高性價比嘅交通選擇。
電車加價後仍然係港島北最平嘅公共交通工具，中短途路程電車更有機會快過港島綫。由於港島地下空間狹窄，港島綫車站大堂及月台相對較深，由月台行到去路面都要啲時間。至於2010年代興建嘅西港島綫，為咗同時服務山腳及西半山，大部分出口都要經過長通道或高速升降機連接，進出車站同樣需要額外時間。故此鐵路車程本身雖快，但計埋來往月台到出口嘅時間，其實唔快得幾多。相反，電車車速雖然較低，但由於乘客唔需要於地底上上落落，計返整體行程時間其實差唔多。
除咗日常通勤，電車仲有豐富嘅歷史文化旅遊價值。電車服務港島超過120年，歷史非常悠久。慢駛嘅電車沿住昔日海岸線行駛，途經多個發展成熟嘅社區，乘客可以感受港島發展嘅變遷。電車公司透過串聯旗袍店、文化活動等產品，提高旅遊價值；又提供「派對電車」包車服務，為用家創造難忘體驗。電車車輛係「香港製造」，舊年慶祝120週年時更特意跟唔同本地品牌聯乘，突顯支持本地產業精神。
應對營運挑戰 更要與時並進
面對激烈競爭，電車積極開拓非票務收入，如廣告、贊助、旅遊產品等。點樣讓公眾感受並傳承電車悠久歷史及「香港製造」等價值，係其中一個重要課題。唔少遊客會特登搭電車體驗慢活觀光，足證透過文化旅遊作宣傳嘅方針湊效。
但電車透過非票務收入開源之餘，都需要做好運輸本業，持續提升服務質素及創新營運模式，以維持電車品牌形象及社會價值。與此同時，點樣吸引本地居民揀電車，提升乘客體驗同樣重要。不妨考慮加強宣傳港島中短途路程一程直達、收費相宜嘅優勢。另外希望能盡快推出手機應用程式，提供實時電車到站時間等服務資訊尤其重要，有助提高乘客選乘電車意欲，提升服務體驗。
（本網歡迎各界投稿，文章內容為作者個人意見，並不代表本網立場。）