《馴龍記2》今（六月廿二）日有優先場，我去公投投票站之前先去睇。雖然話呢部係動畫，但竟然畀我發掘到好多隱藏訊息，我feel到呢套戲係想對住一班曾經對香港環境絕望，而唔想去公投嘅人說話。以下係我一啲體會：
1.
故事一開始，思噎仔無意中發現到一場陰謀大計，嗰場由一名叫渣高嘅大奸角策劃，目的係借黑色龍王過橋，消滅哂所以逆佢復仇旨意嘅龍同其他人。之後思噎仔返屋企話畀阿爸知，重表達佢想說服渣高，扭轉對方滅龍心願。不過阿爸唔單止聽唔入耳，反而實行鎖島政策，欲求與世隔絕。思噎仔唔妥老竇嘅逃避態度，決心隻身走入險境。
喺香港，有唔少人面對而家情況，一係唔理佢，抱住僥倖態度用其他嘢麻醉自己，一係就儲定錢去移民。我唔可以話佢哋錯，但見到自己成長嘅城市面對威脅，唔通真係學思噎仔老竇咁，「眼不見為淨」就算？
2.
思噎仔獨自冒險同時，搵返廿年前失散咗嘅阿媽。佢阿媽廿年前堅信龍族係有惻隱之心，唔忍心殺死入侵家鄉嘅龍，後尾佢被班龍族擄走咗，但並無因此而死心，重反而花成廿年時間醫治同照顧受傷龍族，並且好快將龍族巢穴打造成安樂窩，人龍和諧共處。
孟軻有云：「自反而縮，雖千萬人，吾往矣。」或許阿媽曾經猶豫過，但最後堅持信念，獨自把和平任務進行到底。就係一個對得住天地良心嘅思想，佢能夠無懼性命危險，力圖扭轉乾坤。佢獨自一人都可以做得到，更何況我哋香港七百萬人，簡簡單單噉樣，用一人一票表達政制意願呢？
3.
到咗渣高同思噎仔決戰時刻，思噎仔面對前所未有嘅挫折。當佢因為人、龍關係再一次大決裂，而一無所有嘅時候，佢有無因此而絕望呢？一班遺留响佢哋身邊嘅龍BB，向我哋表達出「希望在明天」嘅答案。
當一班成年龍族都乖乖投降嘅時候，好彩重有一班思想未成熟嘅新生代出現。呢班新生代，或許手腳笨拙而又無乜經驗，但佢哋無受到強勢壓逼，剩餘嘅只有赤子之心。我亦無諗過，呢班仔竟成為扭轉劣勢嘅關鍵。
當我哋相信响香港唔會再有曙光嘅時候，唔好忘記裡面重有一班好似龍BB嘅初生之犢，佢哋可能係我哋嘅希望。
4.
到後段，思噎仔騎住龍BB搵被渣高控制嘅冇牙仔。當然，佢都明知無乜機會說服到渣高，有違當初「和理非非」嘅意願，但佢起碼無放棄，重先救冇牙仔脫離渣高控制，以便重整旗鼓，轉說服為抗爭。
先唔講結果係點，我只係覺得思噎仔嘅毅力叫我哋好佩服。可能大家認為，大老虎打唔到，無乜可以做到；正如佔中公投根本無法律效力，邊個方案跑出，政府都會WFC，身水身汗走到票站投票，為乜？
雖然公投打唔到大老虎，但起碼將一啲本身唔關心香港嘅人一個一個蘇醒過來，呢啲嘢都係靠我哋嘅意志實行出嚟嘅。正如思噎仔堅信冇牙仔仍有良善之心，只係面對強權，身不由己一樣，佢依然把心一橫，拼死救對方。公投係喚醒港人嘅其中一個途徑。無錯，救人係可能帶唔到咩希望，但唔去救嘅話，就肯定無希望。戰鬥如此，公投也如此。
5.
無論「和理非非」之人，抑或「勇武抗爭」之士，如果我哋都能夠有好似思噎仔嘅堅定意志，能夠忍耐到底，同努力喚醒更多瞓緊同諗住逃避嘅人，終日就可以扭轉乾坤。公投仍然繼續，你準備好投票未？