立即捐款

足球說故事

你看足球,我說故事。 網誌

體育

假如將蘇亞雷斯今季發生嘅事寫成劇本

假如將蘇亞雷斯今季發生嘅事寫成劇本
廣告

廣告

蘇亞雷斯成件事真係峰迴路轉到直頭成個電視劇本咁,假如最簡單將佢分做起、承、轉、合四部份嘅部份,劇本應該係咁↓

起:

事源2013-14季季初,如日方中嘅蘇亞雷斯因為嫌棄球隊無得踢歐聯而公開嗌走,嗌到阿仙奴都願意出動到4000萬+1磅咁嘅「天價」,利物浦都無所動容,到最後只能屈服留係利物浦。當初嗌走嗌到反晒枱嘅蘇亞雷斯態度突然轉軚,指會同利物浦共同進退贏得冠軍,希望球會會願諒當初不智。聖誕節個陣仲動筆同利物浦續咗4年約,加薪到20萬鎊週薪,成為事件大贏家,「4000萬鎊+1」嘅轉會費從此成為球壇笑柄。

承:

同利物浦重修舊好之後,表現更加成熟。先係自己在球場上嘅表現令到所有球迷都讚不絕口,繼而帶領利物浦重登英超榜首之位,甚至有機會助隊長一圓捧起英超冠軍嘅夢想。正當一切都順風順水,氣勢如虹時,卻難料隊長一下嘅錯失,將自己夢想親手粉碎,到最後只能黯然地得到聯賽第二。蘇亞雷斯亦不禁在鏡頭面前落淚。雖然無法助球隊贏得英超冠軍,但仍然為球隊爭取到參與來屆歐聯賽事嘅入場劵,自己亦得到一個英超神射手嘅安慰獎。

英超結束之後,就來到世人期待已久嘅世界盃。賽前傳出受傷,但最後仍能趕及參與世界盃。對陣英格蘭時,更加把握謝拉特嘅利物浦式傳球,保住烏拉圭出線機會,同時一腳將英格蘭踢入出局邊緣,成為球隊英雄,入球後更哭成淚人。

轉:

正當眾人紛紛討論蘇亞雷斯係世界盃嘅表現係充滿大將之風,以一人之力帶領烏拉圭贏波,但到對陣意大利時,卻因為其「無定向喪心病狂間歇性全身機能失調症」發作,令他又再一次上演咬人事件,成為當時球壇上轟動一時嘅熱話。

合:

本來不承認,但大禍臨頭,不認不認還需認,最後都認錯,但仍然阻止不了FIFA對他作出嘅嚴重判罰:禁賽九場,停賽四個月,不得參與任何足球活動。天之驕子一下子跌落谷底,「咬人事件」令他成為犯眾憎,人見人踩,甚至被踢爆出愈黎愈多前科,聲討一發不可收拾。就算寫埋道歉信,出動烏國足總幫拖都無用,一切經成為眾球迷嘅飯後話題,甚至成為恥笑對象,兼商家嘅生財工具。

朋友走了,廣告商也沒了,天子從此變成凡人。

反高潮:

正當大家以為這個「壞人」最終得到應得懲罰,卻估唔到原來仲有下文。係世界盃進行期間,佢已經同利物浦達成共識,甚至已同巴塞傾好轉會。不過一切都係傳,但傳下傳下就會成真。2014年7月11日晚上唔知幾多點,巴塞隆拿終宣佈以7500萬鎊轉會費成功羅致蘇亞雷斯。最終同利物浦和平分手。(相傳因為親手踢英格蘭出局而成為英格蘭口中的仇人,避免回國內聯賽成為眾疾之的.所以轉會。)

沒有BBQ,但有HAPPY ENDING。UM.....算係HAPPY嗎?BTW,個劇本有冇得諗先?

廣告