攝：獨媒記者Gundam Lam
之前打咗好大段講大台同勇武派嘅矛盾，但諗諗吓廢事分化就無POST 出嚟。估唔到又搞單咁嘅嘢出嚟。
先旨聲明我同意升級嘅，但今次衝立會係on9 之中嘅on9。
我諗勇武派都無謂再俾藉口自己，係做錯咗，係搞散咗個你哋鍾意叫革命又好運動又好嘅雨傘XX 就死死地氣認咗佢。無謂搵埋啲垃圾藉口去合理化自己嘅行為。升級行動之前龍和道都有做過，佔咗幾個鐘就收咗皮，仲搞到無埋特首辦據點，但有無黃絲帶鬧過呀？無。因為大家都明你哋當時嘅理念，大家亦都客觀地明白成功嘅機會唔大。所以唔好再講乜乜成王敗寇去意圖淡化自己on9 嘅行為，承認自己嘅失敗先係有勇氣嘅承擔。
匹夫之勇係最貼切嘅描述。我真係諗完再諗都唔明點解你哋會諗係星期二晚一點幾先嚟衝。呢個係警察清場嘅時間多過佔領者行動嘅時間。你哋有無諗過幾百友即使衝到入去，係咪真係有能力守到第二朝市民嚟增援？入到去係唔會再有記者，唔會再有鏡頭保護你，更加唔好諗有過萬市民同你反包圍。
第二，係衝都唔係衝立法會啦。依家嘅政總係全香港最多警察當值嘅地方，過嚟都唔洗三分鐘，你哋真係覺得有足夠時間佈防？打咁多機，聲東擊西都唔識？你要針對個政府嘅可以佔灣仔政府大樓甚至去禮賓府緝拿梁振英，你要影響大嘅可以佔領隧道，佔領港交所，打突擊仲要去人哋防線最堅實嘅地方？傻的嗎？
第三，係衝都好，係咪應該等有事件引發出嚟先衝呢？毫沒由來嘅升級事件，俾人感覺就係"我CALL 咗啲人出嚟，點都要做返啲嘢先走"。點解唔再俾多啲耐性，等政府再有動作再犯錯先升級呢？中信門口佔領者嘅回響唔大，但如果禁制令清旺角又會唔同講法。點解唔等多兩日部署再行動呢？我好怕啲勇武派成日講"到時雙學左膠一定叫散水再俾啲掌聲自己"，根本係全無事實基礎嘅抹黑，佢哋講咗話會留守到最後一刻，點解唔相信吓同路人呢？(屌金鐘大台嘅後面再講，我唔係話雙學左膠啱哂)
自首/被捕唔係示弱，而係真真正正嘅公民抗命。你哋話坐係馬路無用，影響唔到政府，咁點解要係咁屌人提議自首？自首/被捕去癱瘓司法制度就正正係可以影響政府而影響唔到市民，呢個係公民抗命嘅核心。馬丁路德金叫黑人"塞爆個監獄"都係想搞到政府運作唔到，呢個應該係升級行動而唔係示弱搵下台階，當中嘅勇氣大過你衝完之後走咗去千倍萬倍，你哋明唔明呀？
我只係想寄語一句勇武派，唔好鬧點解群眾唔跟你走。由幾年前七一後嘅堵路俾香港人狂鬧，到今時今日嘅雨傘運動，中間係有大量你哋睇唔起嘅洗樓、街站、文宣等嘅dirty job，唔係你哋口中果個廢柴戴耀廷不停講完又講煩過唐僧，係唔會有928 市民義無反顧嘅堵路。與其衝完之後大罵港豬唔幫手，不如問吓自己準備好未？
你準備好向香港市民講述你哋嘅理念未？
你準備好面對非法入侵、刑事毀壞等等唔係罰幾百蚊就可以了事嘅刑責未？
你有有示威者因為你嘅帶領而受傷甚至死亡嘅心理準備未？
不顧後果嘅衝係容易，但如果你想要嘅係成功，就請唔好沉迷小圈子嘅自HIGH。面對群眾，爭取支持。今時今日我相信有武力衝擊嘅成份政府先識得驚，但我唔相信依家呢個規模可以動搖到政府半分。
講返大台，我唔反對有大台，但依家呢個大台對激進派嘅意見其實係充耳不聞。唔評論某主持人道歉唔道歉嘅言論，但佢哋對反對佢哋嘅人嘅態度係非常不智。
點解要用"解釋嚟都嘥氣"嘅態度嚟面對批評呢？點解你要事先預設人哋唔會接受你哋嘅解釋呢？時時刻刻想同呢班人切割，老屈人哋係嚟搞事嘅熱狗，呢個係搞社運嘅態度咩？即使道不同，但目標一樣嘅時候，點解唔係諗合作而係諗對抗？如果你真係覺得熱狗係鬼嘅，就更加唔好推班激進網民去佢哋度，乜呢個唔係常識咩？點解會咁愚蠢諗住趕走佢哋就算？點解要話班不滿嘅就一定係鬼呢？今日呢班友仔唔識協調亂咁衝，金鐘大台起碼要負返三成責任。
其實路線不同係常態，甘地又好，馬丁路德金又好，都唔係佢話哂事嘅。Malcolm X同馬丁路德金都係爭取緊同一樣嘅嘢，但佢哋唔會一齊搞活動。與其兩班人夾硬係埋一齊，不如分開兩個理念俾群眾選擇。唔好再標榜沒有大會，搞好啲文宣等支持嘅人自動歸邊，兩個運動互相影響，咁起碼唔會做乜都縛手縛腳。