上文講到「開曼群島」，再補多筆。網友搵番當年誠哥講「長實及和黃絕對不會從香港遷冊」固然值得嘉獎 （仲係now台添! 除左講恭喜我都唔知講乜好）。但人呢，有時記性太好真係唔多快樂。對，記得又點？鄭伊健要搵梁詠琪，你講番當年咩邵美琪甚麼又有何用？捉佢兩個浸豬籠？ Come on James， 成熟一點啦。
況且，另外有網友（真係完全人地諗到，我不敢居功）提出，語言藝術？至少關公講「降漢不降曹」 曹操講「我係漢相 降漢即係降我」 的各自表述比起台灣大陸早兩千年。正如克林頓強調，「我從冇同萊溫斯基發生性行為」。聽日人地都可以大條道理話你知……
「長實和黃冇遷冊呀！係長和同長地遷冊之嘛」
問你服未。
講番正題，「為股東增值」方面啦喎，contrary to common belief，誠哥咁多年，其實絕對對得住股東（對唔對得住顧客或員工就另一回事）。股票既野，升就企定跌就瞓低。咁多年黎你可以講 in KS we trust。 點解？因為佢都係股東之嘛，佢對得住你即係對得住自己。 而咁多年長和系冇話咩搵小股東笨出財技要你一供十三之類丫，頂多係股東會野食慳皮啲啫。關鍵係你要買啱佢既身家性命財產，就即係今次既主角長實和黃，而唔係佢既玩具。拎十幾二十巴仙既公司固然不重要，但就算佢拎75%既，若只係佔佢身家一細部份，又有何重要？
長和系的「折讓」同獨特架構等等，都唔使財技高手，一皮野人工一個大陸分析員都識寫幾萬字話你知點解A+B+C的市值實係細過ABC分別加埋。真人真事笑話一則係有球球聲人工既香港基金經理連長江hold和黃 定 vice versa 都未識分。所以買基金真係你買埋我果份。
當年小朋友黎公司interview，我最鍾意問佢地 「點解長江hold和黃要49.9X%？」。 完全唔知呢樣野既都算，人工要求唔高既都ok。答到話「因為係財技/有特別原因」係答左等於冇答，但有誠意講廢話，可以諗下。有次有個答「因為唔夠錢」的，足足比我在公司笑左幾年 （對，而家仲同大家分享埋）。
至於真正答案？ left to the readers as an exercise。 「咪都係財技/有特別原因咯」。都話呢個係分析員多過冧把既年代，求其google下都有人答到你啦。不外乎都係教番你一堆初等會計，講下subsidiary 同 associate 公司的分別， 話你知拎唔夠50%可以「隱藏負債」之類。 （但，連你都google到既，又有何「隱藏」呢，可？）
所以誠哥同霍生冇呃你的係，洗牌後真係應該可以「為股東增值」，仲唔使「買豬肉送豬骨」，鍾情長實樓盤的唔使再奉送屈臣氏蒸餾水同3仔台LTE。而問題同上面一樣，即係，點解又今日先做呢，可？唔通霍生浸浸下浴缸忽然好似阿基米德咁 「Eureka!」諗到呢條絕世發財好橋，然後就半夜打比誠哥，誠哥又好欣賞咁，「係喎，點解我咁多年都諗唔到既？驚檸你真係叻仔，抵我比咁高人工你」。
還是那句，成熟些小吧。
至於隻Husky（公司黎的，唔係狗）質多條狗尾入黎之類，都不再花篇幅討論，反正篇文都相當長，而又，好似只係提出更多問題。
誠哥點解而家先做？我都唔知。但我可以肯定既係。佢地好鍾意星期五做野。上次賣百佳又係咁。學我朋友話齋，「玩死你班sell side 分析員」。
而另一樣野係，其實呢單野出左黎後誠哥就在集團週年晚宴講。 即係，明顯係想在週年晚宴前搞掂呢壇野。下次記住問你做百佳或3仔台的朋友幾時集團晚宴啦。如果仲有下次。