立即捐款

政經

你今日轉咗 7 號仔 Propic 未?

你今日轉咗 7 號仔 Propic 未?
廣告

廣告

今次立法會補選,支持民主既香港人面對兩個選擇。7 號楊岳橋以守住泛民立會否決權為綱,6 號梁天琦以暴力抗爭為綱──無論尚有幾多其他細節、不同政策立場,在此不談。

年初一旺角騷亂後,部份人基於支持或同情本民前,選擇在補選中支持梁天琦。雖然不少證據顯示楊岳橋勝算超過梁天琦,但撐梁論調在網絡上依然強勢:反正泛民咁多年一事無成,補選比周浩鼎嬴、輸掉否決權又如何?孤注一擲撐 6 號,壯大支持暴力抗爭既聲音,隨時有賺。

尚餘半年會期,建制派可以利用 supermajority 通過幾多惡法,好難估計。但有一樣野值得討論:究竟泛民議會否決權、以至議會路線,同街頭暴力抗爭有咩衝突?

今時今日,香港民主運動陷入僵局,不少暴力抗爭支持者歸咎於過去三十年泛民不思進取,墨守成規,太多妥協,去得唔夠盡。於是,近年來,越激烈既行動,就可以得到越多掌聲。例如雨傘運動後,一般和平示威,參與人數已經遠低於前幾年。

無錯,有時「衝唔衝到入去」、「擊退警察防線」,係好有戰術作用、抗爭指標意義。不過,宏觀黎講,越激進行動就對民主運動越有幫助?恐怕要睇實際情況。有時低調、溫和可能好 D,有時激烈可能好 D,有時兩類行動分工合作可能好 D。

點解咁講?因為,暴力抗爭者大概都唔相信單靠香港抗爭,就可以成功擺脫中共魔爪。「支爆」預言,大概暴力抗爭倡議者口中更常會聽到──香港抗爭要成功,始終要寄望中國經濟崩潰,中共自身難保時,香港民主/獨立運動從中可以如何周旋,脫離中共控制。

呢個抗爭前提,反政府陣營中,無論主張穩守陣地定主動出擊,都好難反對。係咁既前提下,能保留民間反抗實力,等待「支爆」來臨時,港人有足夠籌碼同中共講數既抗爭手法,都值得支持。呢個意義下,泛民「溫和抗爭」多年仍陷僵局,就唔應該理解為一事無成,反而係透過穩守陣地,減慢了香港被中共侵略既速度。當然,泛民有好多野做錯或做得唔好,但大方向上並無偏離。

即使呢一刻有人覺得應該支持暴力抗爭,都無理由視穩守陣地派為敵人,更無理由視對方既戰略目標(例如議會否決權)同自己暴力抗爭有矛盾。由一向固守既陣地撤出(所謂焦土政策),會否令更多市民覺得要投身暴力抗爭,遠遠未睇到;但直接減低政府在議會推行政策阻力、直接增加建制派在地區接觸市民機會,最終增加任何形式抗爭既成本,就顯而易見。

更甚者,若然暴力抗爭推動過急或當中有意外,致令暴力抗爭陣營被政府一網打盡、或完全失去市民支持,咁民間抗爭實力儲備,完全可以不增反減,未等到「支爆」來臨已自我收皮。反政府陣營中,有相當部份繼續穩守陣地,反而係暴力抗爭既後盾,減低反政府陣營被一次全滅既風險。

講咁耐,得啦,轉 Propic 嘛!係,支持暴力抗爭無需焦土,立法會否決權對所有派別來說,同樣重要。還記得僅僅三個月前,人人都話要「回到地區,深耕細作」嗎?每個陣地守多一陣,對幾十年民主運動,都係功不可沒。

香港人要贏,民建聯要輸!

7 號楊岳橋民調僅輸周浩鼎一個馬鼻,228,不作他選。

廣告