我有諗過今日寫依篇定寫比卡超好，最後都係覺得比卡超留返聽日先寫。
噚晚睇睇吓曼聯就由容總果度得知Facebook終於唔再只喺得一個「LIKE」掣，而家你可以「更好」咁表達自己情感。雖然我話過睇多啲書識多啲嘢冇壞，但「多」依個字對Facebook嚟講唔係樣樣都好。當一個社交網站功能愈多愈繁複，其實對用戶嚟講就愈難上手，最後就會令到用戶流失。Facebook搞咁多，為乜？
我明好多人對依樣新功能好有興趣，因為淨喺睇返自己個Page都見到好多人用唔同表情去代替最基本個LIKE。但點解我去表達一件事都要諗「我應該用心心丫嘩丫哈丫嗚丫定嬲，再唔係用返最普通個LIKE」呢？我覺得比你考試做MC四選一仲難。而家依種表情風氣只係「新屎坑」，並唔係代表依個功能真係咁受歡迎，個個玩一排就會厭。你望下啱啱嚟香港嘅一蘭同半熟芝士撻係幾咁受人追捧，但宜家仲有人會去排隊食咩？風氣一過，好多香港人就會自然揀返間就腳嘅垃圾味千，依個係香港，甚至世界嘅不變定律。
其實一直以嚟最多人不滿嘅係Facebook只有「LIKE」，當你遇到一啲激氣或者傷心嘅近況或者新聞就唔知LIKE唔LIKE好，而要解決依個方法最簡單加個DISLIKE（或者UNLKIE，是但啦）就搞掂。兩個掣有齊正反意思，好事就讚，唔好就彈，其實已經可以好完滿咁解決依個問題。我有朋友話因為DISLIKE會影響出文條友，因為評價唔好而搞到佢唔會再寫或者放新聞上Facebook，所以Facebook咁堅持唔加DISLIKE掣。其實如果你喺要鬧我嘅用留言都得啦，唔通得LIKE掣果陣就會冇人話粱振英同建制派咩？唔會架，而且宜家啲人咪又喺將嬲嬲豬當DISLIKE咁用，唔通Facebook又要刪左個嬲嬲豬咩？
Facebook用戶唔止接肯接受新事物嘅後生仔，仲有好多上年紀嘅世叔伯，你搞咁多嘢佢地要消化其實好難，何況社交網絡不嬲都係愈簡單實用就愈好，兩個掣比起六個掣點都方便啲。將一件簡單嘅事複雜化做乜先？LIKE同DISLIKE依個咁完美嘅組合唔出，就好似考試是非題係要加埋咩部份正確、部份錯誤、無從判斷咁多鬼餘嘅選擇。如果Facebook你真係咁關心用戶，我嘅要求真係好簡單：
你加一個Dislike掣比我就得。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/