立即捐款

政經

領展又一滅口事件:黃大仙街市

領展又一滅口事件:黃大仙街市
廣告

廣告

大年初一至初三元朗良景夜市,包租商「建華集團」一反官仔骨骨西裝畢挺嘅資本主義必要形象,聘請黑衣管理員,粗暴以各式各樣嘅方法阻止小販開檔,唔知何來嘅權力(或者關果D髮型統一、帶住差佬手套既哥仔事啦)可以用鐵馬禁錮繼而拉入街市打柒市民,仲會有軍裝警察形成人鏈幫忙封鎖入口。後來民間媒體開始揭發領展有幾個街市都俾左一間叫「建華集團」既公司做,管理嘅街市包括香港仔華貴邨街市、小西灣街市、東涌逸東邨街市、天水圍天瑞街市、沙田隆亨街市、馬鞍山耀安街市,同時決定呢D街市嘅租金。

根據《壹週刊》2015年,建華集團在全港有五百個零售點,賣豬、牛、魚、雞。建華集團一方面做領展街市的管理商,控制租金上落,一方面引入其集團持有的肉檔進駐,以「又做管理又做商販」的一條龍模式主導價格及租金,例如小西灣街市有五檔賣肉的,原來有四檔都由文卓培及凌偉業以不同公司名義持有,雖然它們表面上各有不同招牌(包括:冠華鮮肉、利豐鮮肉、新界佬、牛丸哥哥)。

同期,2月15日到21日,青衣長發街市發起罷市行動抗議領展「賣豬仔」,私下將長發街市交俾新嘅承判商,而領展不知廉恥再搵流動小販霸堆租戶舖位外的位置,無視租戶訴求。罷市完了,領展對租戶更加苛刻,聽聞連因為舖位細要佔到小小公家路擺貨嘅空間,都要同租戶計較。

仲有好多好多街市都被領展逼得生計難續,其中一個係黃大仙街市,領展聲稱黃大仙街市人流少,決定將黃大仙街市改建為商場一部份,日後黃大仙中心將不再有街市,而多了幾個舖位。領展合約寫,街市要裝修/倒閉的話會早半年通知,11月時領展向租戶發出通知,但商戶當中大多合約到預定關閉既時間(2016年5月)都未完約,大多無奈接受領展為其找到的其他領展街市舖位,零補償。當中亦有個案係傾好左去邊個街市後,領展又再反口。實情黃大仙區內的其他街市,包括大成街街市、竹園街市走路均需要十至十五分鐘方能到達,更莫論領展旗下天馬街市、彩雲街市、東頭村街市。住近黃大仙中心嘅居民,根本無可能去到咁遠去買餸,變相生意又係附近百佳、佳寶擔負得起貴租嘅連鎖店做哂。搬遷舊客會大量流失,小生意需要重新建立,入到新街市又要面對原駐店舖競爭,舖位大多都係人流少嘅冷門舖位。重重難題都會到來,但領展卻一直不改高租金惡管理的壓逼。

根據對上一次人口普查(2011年),18區中觀塘長者數目最多,佔長者總人數的10.8%。而如按長者與各區人口總數的比例來說,黃大仙區排第一,達17.6%。我自己婆婆就住在竹園,年時已高且要提著菜來回竹園和黃大仙並非一件易事。

黃大仙區內有個大成街街市,為食環署街市。根據食環署2016年1月的公開競投文件,以牛池灣街市為例,一個13.4平方米的鮮肉攤檔,另附2.56平方米的劃定貨物陳列區或地台,起標標價只為1820元。而黃大仙中心街市的店租大概以幾千到兩萬不等,以7平方米舖位為例每月租金約12000元。

11月時,大多商戶都非常不滿,12月有區內區議員落過街市一次,之後就無聲氣。面對領展霸權,商戶想做生意都只好接受依家領展安排嘅其他街市。

另外,領展上年透露2016年共有9個街市會進行翻新,至於租金升幅方面,吳鴻揮稱,平均介乎7%至8%。據新聞講,領展於2015年9月底止半年來自街市租務收入共3.9億元,升2.9%。有關黃大仙街市新聞好少,所以特此打一篇note同大家講講呢件事,無好好地寫有怪莫怪。至於其他領展街市新聞,呢排其實好多,請各位自行搜索參詳。

圖為70年代的黃大仙。

參考資料:
領展來年翻新9街市
配合港珠澳大橋落成 領展翻新新界北商場
香港2011年人口普查主題性報告:長者
食環署九龍區空置街市攤檔公開競投資料(25/1/2016)
領展霸權,豈此外判!街市被「殺」,禍及全港?
良景打架以外:領展‧外判商‧社團
長發街市關注組
隆亨街市明年關閉三個月翻新 商戶轟領展零補償

廣告