《點五步》講香港棒球，本身題材係正嘅，亦都想入戲院睇。但自從篇控訴文一出，完全無意欲。無他，因為消費熱血，賤賣夢想。套戲明明係講追夢，但係事實又係點？事實就話比班學生知，話比班臨時演員知，「追咩夢姐你，無錢比你架」。掛羊頭，賣狗肉，假熱血，真抽血。
拍呢套戲有200萬資本，點解導演就可以有月薪，學生演員就唔可以有？係咪導演特別高級啲？要知道，要成就一套電影，都唔好計佢成唔成功，台前幕後，根本就缺一不可。咩都唔洗講，單單係呢樣嘢，已經有問題。成件事其實同早前果單搵攝影師接Job唔比錢一樣，「幫你like同share啦」，真係皇恩浩蕩。
最大爭議就係所謂「係咪自願」，呢樣嘢永遠都係討論焦點，填詞人陳心遙出埋文去講點解義務，係，你係有心，但係咪代表件事應該係咁發生先？你有無諗過咁樣做一次，之後就會有人有樣學樣:「陳心遙都係免費幫《點五步》寫主題曲歌詞啦，點解你唔可以唔收錢做姐？」，呢啲咪就係好心做壞事囉。然後又會有人話:「200萬拍到電影啦，你睇下《點五步》，都係咁做咋嘛，搵啲學生演員，唔洗出糧架，之後套戲賣得咪分番啲錢比佢地囉!」。成日話要支持香港音樂，香港電影，乜呢啲就係大家想要嘅結果咩？唔好企圖將剝削包上糖衣啦好嗎？
既然講到套戲咁熱血，又有咁多學生演員，個個都有份參與其中，點解唔考慮出足糧比佢地，等佢地直接將呢套戲傳開去呢？咁樣唔係更加有感染力咩？唔係更有話題，更本土咩？ 搵媒體採訪都易好多啦! 浸大學生會自己都可以係學校宣傳，甚至聯同所有大學一齊推，效果唔會差囉。仲有，而家網媒咁強大，以學生會名義去搵輔仁容總傾下合作，啲錢仲洗得抵啦，總好過送錢比商台做廣告啦，香港人會睇呢套戲都唔會係因為商台囉。
《點五步》完美示範咩叫「一子錯，滿盤皆落索」。