今日Indonesia Soccer Championship A(印尼足球錦標賽 A)有兩場波踢，早場由PSM望加錫對Perseru Serui(佩西路)，呢場波係中游球隊嘅較量，本來冇諗住睇，但對賽馬會場社區盾興趣唔大所以決定留返喺屋企搵Live stream睇印錦賽，結果呢場中游大戰比我想像刺激，二十秒都冇就有PSM望加錫球員受傷，而個位''兇手''係一位身高大約到陳肇麒肚臍嘅中場球員，雖然佢好矮細，但幾乎主宰咗佩西路嘅中場，佢個名叫Septinus Alua(艾路華)，今年二十七歲，身高156cm，細細粒粒但踢法卻非常兇殘。
講起印尼球員，好多球迷對佢哋嘅印象離不開矮小靈活，即使現今新一代嘅印尼球員可能吸收營養好咗及生活習慣改變平均比以往高大，但唔可以忽視有部分印尼球員身高比一般東南亞球員更矮細，特別係踢中、前場嘅球員，現時被公認為印尼職業足壇入面最矮細嘅球員應該有三位，分別係效力佩斯普拉嘅Lukas Mandowen(文杜雲)(156cm)、Yohanes Pahabol(巴哈保)(157cm)及效力Perseru Serui(佩西路)嘅Septinus Alua(艾路華)(156cm)，司職翼鋒嘅文杜雲來自巴布亞省北部一個叫Sarmi(沙米)嘅縣，同樣踢開翼鋒嘅巴哈保就係來自東部Yahukimo(雅胡齊摩)，而中路球員艾路華就係來自中部瓦梅納高原，佢哋都係喺印尼東部巴布亞省出生嘅島民，印尼人多數叫佢哋做巴布亞人。
巴布亞人平均身高比印尼主要民族爪哇族更要矮細，唔少活躍於印尼職業足壇嘅巴布亞球員都喺165cm以下，可以達到180cm以上嘅巴布亞球員為數不多，過分矮細喺足球場上確實冇咁多著數，但身型規限無阻佢哋對足球嘅熱愛，上天都好公平會畀返啲優點你，文杜雲有強勁嘅爆炸力，巴哈保就有優秀嘅盤扭技巧，艾路華傳波嘅成功率出名高，所以佢哋面對比自己高大嘅敵人都冇有怕，因為足球並非高大就玩晒，如果高得嚟又唔係好頂得冇技術又笨重，即係得個高字啦。