立即捐款

體育

技術文:唔講戰術人腳,純數字分析世界盃分組同奪冠

技術文:唔講戰術人腳,純數字分析世界盃分組同奪冠
廣告

廣告

呢篇係純數據估波同分析,唔吹水。咩球員咩陣式咩教練我一慨唔理。球評家實憎死。正如在股票上,我最初係學院派,CFA嘛,當然信基本分析,咁自然鄙視啲技術分析睇圖嘅

但做嘢耐咗,覺得講到尾,捉到老鼠就好貓。技術分析或睇圖點解有用?或者基本分析點解冇用?因為你基本分析嘅嘢已經in the price。正如唔使你分析話我知英格蘭勁過沙地阿拉伯,我完全唔睇波唔知沙地阿拉伯在邊都可以知 — 因為,有賠率,有排名。

咁啲煩膠拗餐死嘅,就梗係話排名唔代表「一切」,賠率代表「一切」。費事拗。從來冇人覺得係「一切」。只有人嘅愚眛先係「一切」。講到尾,講咩戰術陣容打法,睇落當然有趣,如果係球迷嘅仲會學到好多嘢 — 但如果唔係球迷只係想知勝算呢?咁其實分析文章,係幫唔到乜嘅。

排名,有兩種,國際足協FIFA ,即係大家平時聽開嘅世界排名,同埋匈牙利佬命名嘅Elo排名。賠率就當然好多唔同莊家,但以馬會為準。咁呢三種系統,邊種應該會最準?有乜局限?更有趣係,幾時會打交?即係三個系統都話你知英格蘭勁過沙地阿拉伯,冇討論價值。但如果打交時就有價值,會睇到邊種準啲。

其實係2016歐國盃寫過嘅舊文翻炒,但用新收據,有興趣嘅可以睇咗舊文先。當時01搞估波,我在第一階段係冠軍(決賽就唔好提了)

馬會賠率

簡單介紹下,賠率大家知係乜,但留意,《驚天十二小時》有話你知,熱門未必多人捧,只係多錢捧。無論如何,真金白銀最有說服力。意見調查你可以話沙地阿拉伯拎硬冠軍,但,不如買一萬蚊落去先?

國際足協排名,不詳解,鍾意嘅自己睇點計

32隊FIFA排名,留意係舊的,貪張圖靜。應冇大變動,但想搵最新嘅去

呢套嘢成日比人批評,容易game the system.挪威94年排過第2,美國06年排過第4,佢哋自己都笑。大賽主辧國例牌排名低,因為只踢友賽,巴西2014排22(後來輸1–7後話),法國2016排第9,但賠率都係超熱。亦都有隊(羅馬尼亞?)特登請顧問,研究點樣約友賽谷世界排名。

但FIFA排名有冇用?好有用,因為佢有無上權威,分組分pot分種子都係靠佢。今屆世界盃英格蘭西班牙就因為排名唔夠高,跌咗去pot2,要同啲pot1一齊同組。好彩冇抽中巴西阿根廷之類,但中萄葡牙比利時都唔多好玩。意大利就因為一場友賽輸波,搞到排名跌咗,2018外圍賽跌落pot2,然後抽中同西班牙同組,埋下出局伏線

Elo 排名,複雜少少,可以睇我舊文,或者睇返人哋點計(但我估你都唔會睇)

Elo 排名,想睇最新請去

一般嚟講,呢個系統係準過FIFA好多。特別係弱隊爆冷,會加好多分,反之亦然。仲有佢嘅好處係,佢係一個relative measure ,你可以將今日嘅德國同98年嘅法國比睇邊隊勁啲(唔係真係唔同時空比實力,係指佢哋嘅得勝率同贏乜人等等),甚至拎英格蘭同皇馬比 — 甚至係拜仁慕尼黑同芝加哥公牛比。只睇兩個分數,就知兩隊對碰大家贏面如何。

上次2016歐洲盃做過分組賽第一輪統計,16場,結果Elo 排名估輸贏估中12場,馬會中11場,FIFA排名中得10場。科學精英>群眾智慧>官方。幾咁好嘅結果。

正題前,比埋啲資料你,記得開住慢慢睇:FIFA排名,Elo排名,馬會賠率

1)講咁耐,講返今屆。先講冠軍。首先比個Fact 大家:世界盃冇乜爆冷,亦都唔存在咩扒冷。個別一兩場,當然有,大把。但買冠軍嘅,你買沙地阿拉伯即係倒水落海。02年巴西奪冠,7倍。06年意大利啲人話爆冷,但其實都不過9倍。10年西班牙6倍,14年德國又係6倍。共同點係乜?未必係大熱,但全部係10倍之內。對上一次爆冷正係20年前,法國13倍捧盃 -仲要係主辦國。講咩凡事皆有可能,但你輸到破產都未見到。反而歐洲國家盃就有希臘之類超級大冷 — 所以睇今屆,冠軍不外乎五隊,巴西德國西班牙阿根廷法國。比利時葡萄牙英格蘭可以請早。咩烏拉圭克羅地亞嗰啲基本上係倒錢落海。

2)做咗個表,講解下。分組賽抽簽,係跟FIFA排名,pot 1,2,3,4.東道主俄羅斯例外,排名極低,但預設係pot1。

本人創作

每組你見到有三個 column,FIFA就係世界排名高低,Elo就係Elo排名高低,以我寫嗰日(即係上週末)為準,所以可能爭啲。賠率就係馬會賠率,望過下外國網,冇好大唔同。唯一比較唔同就係E組塞爾維亞,馬會排第三,外國排到第二。

FIFA排名同Elo打交嘅,用紅色表示。Elo同馬會賠率打交嘅,黃色表示。呢啲就係你要留意嘅東西。至於巴西大熱首名出線,或者沙地阿拉伯包尾出局呢啲,係眾望所歸的。

仲有留意,理論上,越少打交嘅組,代表局勢越明朗,人人都覺得係咁。點睇都係。所以照咁睇,德國嘅F組(利申:德國球迷)大家認為最明朗,德國首名墨西哥次名冇難度。英格蘭嗰組G組好似最亂 — 但睇你點定義亂,之後會再講。

最後,FIFA排名同Elo排名順序一樣嘅,有三組。法國嘅C組,阿根廷嘅D組,德國嘅F組。但更多時係Elo排名同賠率(即係大眾智慧)一樣,共有四組。烏拉圭俄羅斯嘅A組,巴西嘅E組,德國嘅F組,同埋波蘭哥倫比亞嘅H組。至於FIFA排名同馬會賠率一樣嘅? 只得兩組,德國嘅F組同英格蘭嘅G組。

最後遂組講下:

A組:烏拉圭最勁,沙地阿拉伯包尾,冇乜懸念。問題只係次名出線。FIFA排名話埃及勁啲 — 但當時沙拿未傷。馬會同Elo都信俄羅斯勁過埃及 -而Elo仲未計入東道主因素。似乎俄羅斯可以次名出線。留意馬會俄羅斯個賠率都帶出埃及好多的。

B組:比較亂嘅一組。但亂嘅只係一二,同三四之爭。二同三係唔使爭的。鐵定係西班牙葡萄牙首次名,伊朗摩洛哥出局,爭在排名。FIFA話西班牙勁啲,但Elo同馬會都信西班牙勁啲-相信多數球迷都咁估,一於信西班牙首名,不過賠率老實唔爭好遠。三四方面,兩個排名都話伊朗勁啲,但馬會信摩洛哥。唔識揀了。反正都無關重要。但你睇Elo,其實伊朗領先好多下,真係二選一就伊朗第三。

C組:同A組局勢差不多,法國首名澳洲包尾,不用討論。二三秘魯丹麥之爭。排名兩個都覺得秘魯勁啲,但馬會信丹麥。真係極難揀,但要揀,揀秘魯做黑馬!

D組:似乎強弱幾分明,三大系統都貼阿根廷首名克羅地亞次名,又係第三第四之爭。兩個排名都話冰島勁啲,但馬會信尼日利亞。我就當然信冰島,個排名都爭相當遠下,加上啲托布嘅鬥心……

本人創作 .貼多次方便你睇

E組:似D組,但冇咁明朗。巴西首名就梗。三大系統都估瑞士次名 — 但瑞士個次名未必好穩。睇賠率瑞士同塞爾維亞其實好接近,換位都唔奇,之前都有講外國網甚至貼塞爾維亞第二添。同樣地,馬會同Elo都覺得塞爾納亞勁過哥斯達黎加,但FIFA唔係,咁當然信Elo啦。即係巴西第一,,哥斯達黎加包尾。第二真係要我估,都係揀瑞士。

F組:應該最層次分明,三大系統全不打交,一二三四大都一致。當然韓國係明顯地不及嘅,德國明顯帶出。但二三兩隊又係難揀。排名同賠率都睇好墨西哥,我就照跟好了

G組:好似好亂,系統打晒交。但同B組一樣,分開兩層踢。出線就英格蘭比利時,爭在邊隊首名。突尼西亞巴拿馬就實出局,爭在邊隊包尾。呢組一二,極少有地FIFA同馬會一樣,而同Elo唔同。FIFA同馬會都覺得比利時勁啲,但我當然信英格蘭首名啦(但其實Elo排名都好貼)。至於包尾一樣,FIFA同馬會覺得突尼西亞勁,Elo信巴拿馬 — 我也信巴拿馬,雖然總統同我冇交情

H組:都幾明朗,塞內加爾出局,日本就包尾。FIFA話波蘭最勁,馬會同Elo覺得哥倫比亞勁啲,我都係。睇好哥倫比亞首名波蘭次名。

廣告