立即捐款

體育

德國不敵墨西哥賽後評——罪人係路維,或者基迪拉

德國不敵墨西哥賽後評——罪人係路維,或者基迪拉
廣告

廣告

利申,just in case 有人唔知,我係德國球迷。有冇偏見你睇完自己決定。但我自己幾肯定,就算我對德國有偏見或偏愛,其實不及我鄙視主流嘅嗰種偏見或核心價值。同埋我相信自己都係夠客觀(個個都會咁講),因為德國輸波,我的確冇乜好大感覺。

場波好唔好睇?相當好睇。繼西班牙葡萄牙後最好呢場。爆唔爆冷?好冷。6倍幾,開幕到而家最冷呢場。你睇Elo分數,呢場亦係今屆最大upset。47分嘅交換,近年都少見。開唔開心?梗係唔開心啦。你咁問即係好似啲記者問人地老婆撞車死咗你而家咩感受咁

咁但,感覺真係唔係好大。首先,墨西哥真係踢得好好,針對性部署。亦都執行得好,防守上冇乜點犯錯咁滯,真係犯錯可能進攻上,有幾球處理唔係咁好。但即係,你咁勁你去踢啦,球球打機咁任擺咩。

但另一方面,唔係太大感覺,因為我覺得德國唔係踢得太差。可能我遲鈍要輸多場出局先知死啦。但你話好差?又唔係。特別係之前提過,德國熱身賽已經好唔掂,我就管理晒期望,一早都預踢得差,爭在原本以為踢得好差咁拎三分(大賽專家是也),而家係踢得冇咁差,但全失三分。

咁輸波,梗係搵罪人搵屌靶。但我唔會怪罪於奧斯爾(傳媒同好多球迷一路都對佢有偏見)或達斯拿。

以上係whoscored嘅評分,唔係主觀,係計很多很多的數。固然數字不代表一切,是肯定的。但即係,你信啲平時鳩到無論嘅球迷,定信人地專業團隊?你網友話達斯拿全場最差,但睇數字佢係全場最高分。你話呢?

講明先,唔敢講一百巴仙,但邊個會講「點解唔揀利萊桑尼」嘅,九成係球盲。借問聲桑尼在國家隊,有冇一場,甚至一腳好波?達斯拿根本唔差,你覺得桑尼會好過佢?就因為佢踢英超點勁點勁?咁點解國家隊唔得?

奧斯爾表現,好難話好,但亦唔係咁差。傳球近90次,成功率過九成,四次關鍵傳送。好叻唔敢講,始終佢甩好多波(但一向係咁)。但,好差?

真係比較應該鬧嘅,首先係梅拿。傳送係唔少,但有冇自己擔起埋入波責任?少咯,佢似乎寧願支援添姆雲拿。添姆雲拿亦係比較差,上半場有下非常獨食,如果肯交波畀隊友話唔定已先開紀錄(而你啲專家網友可以收晒皮忽然間德國又變得好勁),但唔用佢我亦唔知可以用邊個。甘美治你睇分數唔低,但踢出嚟幾難睇下,特別係上半場。你見墨西哥經用在佢個位進攻(咁啱墨西哥好具伊略性嘅球員亦在呢個位),佢亦都壓得太上,回防唔切,而又不見得助攻做得好好。但呢啲可能係路維指示,可能係可能唔係,我同你都唔知。至於左閘柏汀赫特,朋友幾鍾意佢,我直接佢唔夠班,踢出嚟認真麻麻—但原本只預佢係後備,正選嘅赫達感冒,令到左路攻勢幾乎癱瘓(所以達斯拿仲交到咁嘅數字真係冇理由要鬧)。但始終只係預佢後備,係咁上下。

真正嘅罪人,兩個,一個基迪拉,一個路維本身。真係唔使好專業嘅球迷,甚至唔同意我分析嘅,人人都見到德國輸反擊輸笑,係咪?上次篇文已經指出基迪拉個6號位係死穴。唔係認叻,而係其實根本好多人都知。我幾個朋友都會講,蔡子強都知

信報早幾日的蔡子強訪問

我的舊文

德國近年嘅死穴就正係6號位,其實同哥迪奧拿年代嘅拜仁幾似。防線推到好上,控球在腳玩鳥籠,用人數迫你退守。哥迪奧拿年代嘅拜仁輸反擊輸到笑,作客零比四大敗於皇馬固然係,但即使對阿仙奴對波圖都險象橫生。但拜仁至少有查維馬天尼斯或拿姆(雖然都成日出醜)。德國之前有小豬有拿姆,都仲頂得住。去到而家靠老化嘅基迪拉,就唔知邊個玩死邊個了。

所以我好詫異聽到比亞荷夫話墨西哥冇用佢哋預期嘅戰術!嘩大佬,you fucking kidding me?首先,真係球盲睇你最近幾場熱身賽(特別係對奧地利同沙特阿拉伯),都知你死穴在邊。另外,我唔敢講好熟墨西哥打法,但唔通你覺得墨西哥會唔打防反?我就當墨西哥出乎你意料,你冇plan B的?冇話定球員聽如果佢哋點點點你就點點點?我相信,係真係冇的。因為你見上半場真係球盲都知輸反擊輸死,但半場出嚟德國就似樣返好多—當然亦可能只係因為墨西哥一心求守。

無論如何,當然輸波講乜都假。但進攻上,德國造到好多攻勢。射門去到廿五次—係得三成中龍,但即使八次中龍,都唔係要狂鬧嘅數字。又中柱又中楣,好運少少,未必要食蛋。

所以問題就梗係因為路維冇選一個好嘅6號位球員。利萊桑尼選嚟多餘,有佢在陣只會輸得仲肉酸。係呀無從驗證我話嘅。但你話有佢就點點點都係一樣。真係應該選嘅,係防中嘅安利簡,或者卡拉馬達荷特懷高之類。但講呢啲已經冇意思。

路維第一個換走嘅係基迪拉,唔多唔少都覺得佢有問題,佢亦係評分第二低嘅一個。如果想轉人唔轉陣嘅,取代佢而比較似樣做防中嘅,只有魯迪一個,但國家隊佳作唔算多,卡士亦都麻麻地。或者諗哥利茲卡。哥利茲卡其實根本唔係防中,舊年對墨西哥佢入到禁區梅開二度添,佢踢法可能同基迪拉差不多—但至少活力上好好多。

補多樣:留意下基迪拉個企位。明顯地佢係偏向右邊嘅,應該係路維想佢補返甘美治壓得太上嘅空位,但佢做唔到,或者墨西哥好輕易咁用長傳bypass 咗佢。左邊位係冇呢個問題的,柏汀赫特冇攻到咁上,佢亦都唔係咁嘅材料,路維應該都冇叫佢。所以你見德國攻勢係在右路多,而畀墨西哥反擊亦都係在德國嘅右路。

另一個問題當然係,點解前場咁易失波。點解失咗波冇快手搶得返。呢個就可能關乎球員狀態,冇得搞。但至少路維冇必要在0-0時推到咁上進攻,真係以為人哋唔識反擊?墨西哥入波之前已經幾次反擊機會。球員應變不足,係一大問題

之前啲文咪話「永恒的4231」嘅?而家我轉定軚,費事你下場話我馬後炮。反正三分已失,本死無大礙,而經驗睇到,失利後路維一定會做啲嘢(會變好定仲衰就唔知)。如果想唔用基迪拉,但又覺得冇人嘅。就不如諗三中堅啦,推一個出嚟中場掃波。然後打個類似343咁。前線三拿達斯拿雲拿梅拿,中場左邊用赫達,右邊用甘美治,中間奧斯爾卻奧斯,直接叫基迪拉收工。

如果要飛機的話,西班牙2010一樣首戰失利,不見得比德國好,最後一樣六分首名出線,然後捧盃。但實際上第一場失三分當然極難打—特別係墨西哥教咗大家點擊敗德國(但,你做唔做到係另一回事,等於當年大家想學瑞士都學唔到)。比較現實係估德國次名出線,好可能硬憾巴西(寫文之際巴西打和瑞士一比一,又好似冇想像中咁屈機)。唔會一場定英雄,但德國咁嘅發揮,話入決賽,都真係有啲炆水。

負面地諗,其實除左巴西,所有其他大國基本上都試過首圈出局。意大利試過英格蘭試過阿根廷試過西班牙試過荷蘭試過(有呀可?)。德國未試過,破身亦唔係咩咁出奇。

反而我覺得最有趣嘅係衞冕魔咒。過去十二次世界杯,衞冕冠軍首戰12次贏得3次。過去五次就贏得一次。呢啲數字似乎不尋常地低。喂,冠軍喎,仲要一般都係pot1,唔會對強隊,係咪真係有原因呢?可能係輕敵?或者係唔敢唔用4年前嘅球員?

德國唔多唔少都有呢個問題,今日場上,七個係2014主力(我已經唔計達斯拿,2014佢有份踢,但主要係垃圾時間)。但明顯見到好多個都似乎不及當年勇—但路維或任何一個教練,亦唔敢大刀闊斧唔用舊人嘛。

多數要點?多數要輸鑊甘嘅。若果德國真係不幸分組出局,或者16強出局嘅—放心,路維仲會在位。但應該會迫到佢用一堆全新嘅球員了—對上一次其實就係2008年後,德國大換血咗一次。2010一代,奧斯爾基迪拉卻奧斯保定侯姆斯紐亞梅拿,其實2020甚至2022都仲可以玩,但今次去唔到四強嘅,應該要淡出了。

不過出面一向一沉百踩,已經有人講1998或2000,我就冇擔心過。始終德國個talent pool夠大。可能啲新希望有啲過譽,但就算掃走晒2014七件主力,隊新仔德國都仲可以係歐洲一線尾二線頭,遠非1998 2000咁大鑊可比。

題為編輯所擬

原文刊在作者 Medium
作者 Facebook Page

廣告