立即捐款

體育

德國死,西班牙頹,傳控足球已死?但贏波球隊控球仲係多過輸波嘅

德國死,西班牙頹,傳控足球已死?但贏波球隊控球仲係多過輸波嘅
廣告

廣告

德國潰敗,友人亦講起傳控打法(或各種Tiki-taka)嘅已不合時宜。除咗德國三場贏晒控球傳波但包尾出局外,友人亦提到西班牙似乎都狼狽不堪(但我唔同意的,我覺得西班牙打得相當好)(執筆時未踢西班牙對俄羅斯一場)

係真係假?其實,真係計過數先知。我亦覺得呢類問題適合用數字答。一場波的確太多變數,用數字好難睇到大局,亦有太多非數字嘅嘢。但如果講成套打法,應該睇數字睇到。Simon Kuper講過足球比賽其實運氣佔相當重,至少比其他運動重。欖球籃球之類,基本上控球多嘅一方多數贏。足球就難講。

所以其實個問題幾簡單,就係:控球越多係咪越大機會贏?或者掉轉講,勝方嘅控球比率,係咪高過負方?定根本係掉轉?如果認為傳控足球已收皮,快速反擊先係王道,咁應該見到控球多嘅隊反而唔掂 — 例如德國咁,比人打反擊打到笑。反之亦然。

有咗呢個假說,之後就係搵數據去測試。其實唔難,世界盃官網有齊。係花我時間去入啫。自己入架。入晒咁多場,請鼓掌

反正入開,咁除咗1)控球比率,唔爭在一次做多幾樣嘢。我仲測試埋2)傳球成功率,3)傳球次數,4)跑動距離(distance covered),同埋5)平均高速

頭四個冇乜特別,大家易明。5)呢個比較麻煩。首先在世界盃官網,頭四樣係同一頁,呢樣係另外在第個地方,花多我好多時間。而到底其實點計架呢?我都唔係好清楚。但好可能係用十一個球員本身各自達到嘅最高速度,再除返平均,唔計守門員。後備點計?加權計返時間掛。我冇詳細對,有人知道不妨話我知。

而之所以有5)呢樣嘢,亦係因為睇到好多講法話「唯快不破」,加上德國今屆畀人印象係跑得慢,特別係第三場對韓國出局。所以睇下係咪真係跑快有著數。

至於1)2)3)其實講緊差不多嘅嘢。而4)呢,就睇整體體力好唔勤唔勤力之類。呢個其實亦同球員真正平均速度成正比 — 畢竟大家都係十一個人,九十分鐘。

其實都唔係搞好耐,搞一個鐘左右啦

好啦,整出嚟,就係咁嘅東西。基本上照入數字,然後睇下各樣標準,勝方係咪高過負方。然後再數。例如墨西哥勝德國一場,好經典,墨西哥控球比率,傳球次數同成功率,跑動距離,平均高速,全部都輸比德國。但好有說服力咁贏波。隔離右邊,就係五個零。伊朗贏摩洛哥一樣,臨尾一個烏龍搞掂。但同時間,亦有好似英格蘭大炒巴拿馬咁,五樣都高過對方。其實德國贏瑞典都係咁。

有咩局限?首先,我只係入咗分組賽。其實入多兩場十六強好閒,但唔記得咗。相信唔會好大影響。第二,和波嘅我全部冇入,因為唔識點搞。第三,有啲數字係官方一樣嘅,例如大家都係跑110km — 官方就畀到整數,我見有其他網會比到小數,但我唔得閒慢慢玩。我試過呢啲平手嘅當每人0.5,對結果影響不大。最後,第三輪有啲波明顯係hea住踢,亦會影響結果。

好啦,出到嚟,係咁嘅情況。

咁多場分組賽,勝方負方控球傳球等等數字
答案係:39場波入面,23–24場係勝方控球較多,傳球成功率較高,傳球次數亦較多嘅。係咪好顯著?又唔算。但話傳控打法已死,應該唔多準確。當然好多呢啲波係出現在啲強弱分野幾大嘅賽事,例如英格蘭大炒巴拿馬,日本全場十一打一對哥輪比亞咁。

至於跑動距離,原來優勢更加不明顯。睇完韓國踢贏德國一場,德國一如所料控球傳球次數及成功率都高過對手,但踢落好似好唔掂咁。而其實韓國跑動距離反而仲多過佢地。令我有個諗法,係咪輸嘅隊跑動唔夠多?但數字出嚟,又未必好大關係。

速度方面,更加係反常識。跔得快嘅反而輸波多。但當然只用十一個球員最高速嘅平均,未必代表到快同慢。況且有啲可能係一早入波,可以縮後摶打反擊,快都變慢。落後嘅就要谷,慢都變快。

另一個角度睇,勝方平均控球係53%,高於負方嘅47%。所以話防反先係王道,傳控過時,我唔多同意。而勝方嘅傳球次數,同傳球成功率,都幾明顯高於負方。跑動呢,其實亦係勝方多啲嘅。反而你話平均高速,就係負方仲要高啲。

又係時間關係,唔得閒做。樓上話比你知,勝方係控球多啲,傳球多啲,傳球成功率高啲,跑動多啲嘅隊。但優勢唔算極明顯。其實我幾肯定(都唔使試都知),xg高嘅隊咪會贏 (唔知咩係xg請睇舊文)。但xg其實係賽後先知嘅嘢。一隊xg高嘅隊,遇到識封殺你嘅對手,好快可以變好低。同埋呢個數字亦唔易搵。但同時,我估射門中框率,應該係個幾準嘅indicator。射門中框比率較高嘅,應該幾明顯係勝方。即係,把握埋門能力先最重要。所以射手咁值錢。所以德國死得咁慘。咁但,點改善中框率?就唔係話咁易了。不過見德國咁多浪射,明顯係唔夠耐性吧。第一場輸壞咗個頭

最後講幾樣有趣嘅數字

1)勝方最低嘅控球率係30%,正係韓國踢走德國一場。咁相反,負方最高控球係德國嘅70%。另外伊朗對摩洛哥呢場怪波,伊朗36%控球下贏波,多得最尾一球烏龍。

2)做到最高控球比率嘅又係德國,71%,贏瑞典一場。唔算話好漂亮,但算係巨說服力的。留意德國尾段仲打少件。你比較呢兩場,就發現未必控球多係好或唔好(當然瑞典打反擊慢又係事實)。你話瑞典唔識反擊?又未必,對墨西哥一場佢哋控球得35%,照贏。

3)勝方最低傳送成功率係低到66%,伊朗對摩洛哥一場。呢場好多奇怪數字,而摩洛哥真係最後先畀烏龍波收死。

4)至於做到最高傳球成功率嘅,係英格蘭,對巴拿馬,94%。當然因為對手太差就咁高傳球成功率

5)至於輸波傳送成功率最高嘅有五隊,但有兩次係德國,輸比墨西哥同韓國,成功率都係極高嘅。當然亦因為好多似乎係啲冇乜意義嘅中後場互傳。

6)但講傳球次數最多呢?德國對瑞典一場只係去到第三,699次傳球。第一位係西班牙,對伊朗805次傳球。巴西對哥斯達黎加亦有732次。而呢三場,都係傳球極多嘅贏波

7)睇跑動距離最少而贏波,最叻係波蘭勝日本,80公里,但大家都知日本已經放棄。另外,英格蘭對巴拿馬,其實跑動距離都好少。因為一早搞掂

8)至於跑動得多而輸波,德國都有份。對韓國嗰場,佢地唔係唔跑,但韓仔比佢哋更跑得咁解。德國115,已經好誇張。但韓國去到118。就唔知食咩藥了。

其實都無乜結論。固然德國三場都係控球為主,畀人打反擊。

9) 最後睇返德國呢3場,控球當然係多過對方,但贏瑞典一場正係控球最多嘅,係咪控球已死,又難講。留意德國頭兩場平均高速都高過對手,但去到最尾一場低過對手,亦都比自己之場兩場為低,可能就真係主力太累,或者老化吧。

結論:其實呢,都真係冇乜結論嘅。德國冇錯係三場波都高控球然後出局,但同樣地,三隊九分出線嘅,克羅地亞比利時烏拉圭,九場有七場都係控球多過對手嘅。又點計?講到尾,廢話一句,睇你對咩隊咯,同埋睇你啲球員適唔適合咯。德國球員係咪唔適合?又難講,至少2014佢哋都係咁踢。可能而家年事已高吧。但都係幾難解釋,點解外圍賽十戰十勝嘅一隊波,話咁快走晒樣。我知外圍賽唔代表乜,但,十戰十勝變到世界盃第一輪出局,個反差都係太大吧。

原文刊在作者 Medium
作者 Facebook Page

廣告