黃店討論有好多，有「一直黃」有「忽然黃」，當然唔怕你「偽黃」，但唔係下下要幫你宣傳用真金白銀懲罰丫嘛？所有筆者心內會有尐標準可以同大家分享下。
有無貼文宣？
大家記唔唔記得點解商店內有連儂檣？就係因為手足出的文宣俾撕紙狗清得好快，所以就有老闆空出店內當眼位做連儂檣，俾手足貼文宣而且無得清。
今時今日偽黃扮黃為左生意搞連儂檣，係俾人寫心聲定幫手宣傳先？如果keep住update文宣，一直支持運動，咁就真係值得長期懲罰啦。
區選有無貼過民主派海報？
今屆區選雖然過左，大家有無發覺過住貼滿候選人海報的街市今屆一張都無貼？如果有留意過街市有檔口貼過民主派參選人海報，明顯就係良心檔主，賣菜尐菜都特別靚，豬肉又零舍新鮮，緊係要長期支持啦。
搞社會運動有時真係唔需要一直係你身邊做野，最怕係關鍵時刻唔幫手甚至出賣你，好多所謂民主派都有關鍵時刻賣香港的記錄，所以真係要寫落小氣簿，記著佢。
有無俾員工罷工？
成個運動日日都「XX要人」，到要集氣的時候嗰嗰要返工，成日要前綫等到1900先開始有人，真係超人都俾你打死。所以一個肯俾員工隨時走左去的老闆真係抵罰，最好罰佢罰到收唔到工。
留意返，我唔係要求罷市收工，我唔想黃店有損失。六七月時好多大行大機構話道路塞返唔到工可以唔返，如果無扣員工AL的可以計埋。
有無譴責黑警同保護手足？
成個運動經歷咁多野，6.12、7.1、7.21、8.31、10.1、11.11、中大理大，有無出過post講？有無講明唔歡迎黑警？甚至有無俾手足入鋪保護手足的記錄？呢個真係好明顯，唔需要多解釋。呢尐鋪筆者某日係尖沙咀都真係見好多，多都唔記得，總之再有就再罰。
有無真金白銀撐運動？
有時做蟻民真係唔識咁多，乜野買物資又唔知邊度買，買左又唔識俾人？買左飯券又唔知點派？想幫法律支援團隊又知俾邊個好？支持黃媒工作又唔識捐錢？
唔好咁煩啦，如果有商鋪肯捐收入，大家咪直接提高佢的收入囉。如果有律師樓咁樣捐錢，真係瘋狂離婚再結婚都無所謂，順便可以益埋早排一班話唔做黑警生意的婚禮籌辦人。
有無支付宝收錢？
呢個真係最簡單的分辨？我當八達通真係搣唔甩，不過支付宝同微信支付真係唔同，擺明係出賣港人資料同直接入錢去共產黨，咁你都用真係前面做足都無情講。
邱騰華講「黃藍經濟圈」係值得諗架
其實香港搞顏色經濟圈真係好初步，大家諗下港英時期點解有左派學校、左派戲院、國貨公司、左派影星。其實當時真係搞到，仲好成功添。
黃色經濟圈要搞得成，最緊要真係對個極權有幾討厭，你討厭就會唔拎回鄉卡，進而連中資都少用，可以品質唔會咁好都接受。但我唔係叫大家用劣質貨，大家參考下韓國點抵制日貨，然後慢慢係電子、汽車、娛樂圈都追上甚至超越日本，就知道一定搞得成。香港過住亦有「made in hk」的品牌保證，要真正發展自己的經濟圈唔難，最緊要係俾時間俾錢俾耐心支持，咁先至有真正對抗到極權的經濟支柱。