（獨媒特約報導）觀塘區一直被視為「紅區」，不少選區均沒有民主派政黨派人參選，反送中運動，大批素人填滿所有「白區」，阻止建制派自動當選。在藍田的「平田」選區，就讀中大政治及行政學系的「學生哥」陳易舜 Eason，以「保民生、撐經濟、反建制」的旗號，擬挑戰其師兄、畢業於中大體育運動系的現任議員姚柏良。
Eason 並無任何政治背景，於今年5月起開始社區工作。他形容自己只是一名「學生哥」，缺乏資源。然而他表示根據過去一段時間的落區經驗，街坊對他的觀感都不俗，打趣指自己勝在「有魄力、有拼勁、有滿腔熱誠、赤子之心」。
Eason 的旗號亦十分特別：「保民生、撐經濟、反建制」。觀塘區議會強行通過以一億興建音樂噴泉，Eason 期望改變這種資源運用不當的弊病，「政府嘅錢應該用喺人民度，應該用得其所，而唔係去起咩噴水池。當然每個基建都有佢嘅意思，但係咪個個都針對到居民需要？」。他又表示，自己一直對社區有美好想像，認為社區發展的硬件及軟件同樣重要。硬件是指社區設施、交通配套、環境衛生等政府資源能夠解決的問題，而軟件則是居民對社區的認同感，「一旦社區出現問題，我哋要去處理，咁我哋點樣動用成個社區嘅人，去同政府反映意見？」。
他考慮參選，是期望能打開另一條路，「唔一定要上街遊行。聯署、文宣，都係可以做嘅事」，「民眾都係有佢哋嘅力量。如果大家一齊做，可能最後區選結果又會唔同呢。」
由建制派主導的觀塘區議會
Eason 有五兄弟姊妹，他排行最小，所有兄弟姊妹都比他年長十幾年。基於代溝，Eason 笑言小時候「無理由同佢哋（兄長）講數碼暴龍」，於是就開始留意時事，「細細個成日睇新聞、睇大人睇嘅嘢，因為要同佢哋傾計」。由於在「大人圈」長大，Eason 自小就培養了關心時事的習慣。升讀中大後，Eason 指自己在課堂中真真正正了解到自由、民主等價值理念，「既然理解到，就覺得要實踐」。
他認為現時本港的政治氣候，仍然停留於百多年前歐洲大陸學術圈子的自由主義，甚少提及實踐理論，「（我）覺得香港而家實踐唔到民主社會」。他表示香港或可參考歐洲國家的民主政制，「例如英國嘅審議式民主，有地區討論、放映，係work嘅，係咪可以試吓喺香港實踐？」Eason 形容現時香港的政治氣氛較滯後，所以想於未來的社區工作加入新元素，最重要是「唔好讀死書、要面向社會」，實踐自己二十多年來所學的知識。
Eason 居於油塘，那為何選擇在藍田服務？他表示自己的生活圈在藍田，全因藍田食肆選擇較多，笑言「藍田有吉之島，有炸薯格、燒春雞。細個好為食，成日叫媽媽帶我嚟藍田」。到藍田用餐，是 Eason 從小到大的習慣，所以對這一區特別有情感。亦因為自己經常到訪平田，所以留意到不少社區問題例如鼠患。他認為，現任區議員雖然有做相關工作，但效果並不顯著，「呢個時勢如果無人出嚟講嘢嘅話，就好可惜。既然在任議員處理唔到（社區問題），我覺得自己可以盡一分力，幫忙將聲音帶到議會」。
對於區議會的資源運用，Eason 以觀塘區所屬的九龍東聯網為例，「例如聯合醫院，醫療人手同服務人口比例係全港最差。政府最近有提擴建醫院，但其實觀塘區好大，周邊地區啲支線交通未必方便去聯合。會唔會撥資源，喺油塘呢啲周邊地區起健康院，去舒緩返聯合嘅壓力？」
Eason 亦認為現時區議會欠缺公眾監察，變相助長了建制派於議會「一言堂」的情況。他指香港的政治氣候較為忽視區議會事務，自己到觀塘區議會大會旁聽時，也沒有看到任何傳媒在場記錄。他強調區議會往往要處理龐大的資源分配，「批緊億億聲嘅工程」，但卻欠缺公眾監察，「無居民理、到區議會發現無記者監察、無主流媒體報導，睇唔到任何相關新聞，無市民知區議會發生咩事。」當建制派於議會只按政府吩咐辦事，在缺乏公眾監察的情況下慣例式批出過億工程，最終蒙受損失的只會是普羅大眾。
Eason 打著「保民生、撐經濟、反建制」的旗號落區，他指「反建制」並非政治立場，而是希望議會能有多元聲音，構思對社區更有益的方案，令社區更美好。
Eason 參政的另一重點，是期望協助居民主動發聲，他多次提到對社區「軟件」的想象，「一旦社區出現問題，可能係藍田突然老鼠問題好嚴重，我哋要去處理，咁我哋點樣動用成個社區嘅人，去同政府反映意見？」。他指要動員街坊就社區議題發聲，首先要讓他們對社區有身份認同。然而，觀塘區議會從未就這方面進行工作。
他認為要增加居民對社區的歸屬感，首先要讓他們對自己居住的地區有所認知，「好多時我哋問街坊，藍田歷史係點，都無咩人知」。Eason 曾擔任中大校園電台台長，未來數月將會運用自己擅長的拍片技能，製作一系列影片及動畫介紹藍田地區歷史。「而家啲文宣都係冷冰冰嘅poster、單張。用拍片、有畫面嘅講故事形式可以直接帶動情感、較易入口」。
Eason 重申，當居民對社區有身份認同、有「bonding」，自然有意欲對地區議題發表意見。近來的「反送中」運動，同樣反映市民因「香港人」的身份認同而上街抗爭，Eason 指，運動中所彰顯的價值例如公義、法治、民主、自由，都是可帶入區議會的力量。現時居民對區議會的了解仍然不深，「希望大家多啲了解區議會，因為代議士未必反映到居民意見」。當區議員的決策有違公眾利益時，他認為「民眾應出嚟反駁代議士」。
Eason 無任何政黨背景，一系列的社區工作完全出於他個人自發。被問道投身社區工作遇到甚麼困難，Eason 坦言，「我就學生哥嚟，做唔到蛇齋餅粽，我做到嘅嘢好有限」。他指缺乏資源是大部份政治素人及無政黨人士面對的困難，而街坊反應很直接，「邊個畀到直接利益，就支持邊個」。
對於潛在對手，他表示現任區議員只看顧某個年齡階層，「搞旅行團、派月餅」等服務全針對長者。然而 Eason 認為，社區工作者應兼顧區內不同持份者的需要，「社區唔只得一個年齡層嘅人。例如小朋友，學新嘢要畀好多錢，但其實睇書都係一個方法，可以搞吓漂書，呢啲都係之前區議員無做過」。Eason 表示，當資源不足時，唯有做「低成本高回報」的服務，「最重要係回應唔同訴求，唔好只係將資源傾向某個階層」。
Eason 又坦言，自己在服務資歷上的確較為「輸蝕」，比不上現任區議員。但他說根據過去一段時間的落區經驗，街坊對他的觀感都不俗。「老一輩都支持年輕人，希望將新理念、做事方式帶到議會」，他打趣指自己勝在「有魄力、有拼勁、有滿腔熱誠、赤子之心」。「既然（街坊）觀感上咁有期望，我就盡力做」。
觀塘區議會一直是建制派「票倉」，現屆區議會37席中，有28席都屬於建制派。要改變建制派壟斷議會的局面，是否完全不可能？Eason 表示，社區行動及民眾力量，都是政制以外的出路，「有無用、得唔得？未知，但係有呢個可能性，而一直觀塘區都無做過呢啲嘢。如果大家一齊做，可能最後區選結果又會唔同呢」。
「平田」選區現任區議員為獨立建制派姚柏良，他在2007年首次當選，擊敗爭取連任的社民連陳昌。去屆區議會選舉，「傘兵」、香港廚師聯盟的吳志輝挑戰姚，以998票對3,404票敗予姚。
記者：陳康麒
部分相片由受訪者提供