【獨媒報導】宏福苑五級火發生至今半年，七幢受災大廈居民今日繼續第二輪上樓執拾。宏仁閣街坊謝先生嘲諷政府在大火後的處理手法：「如果你當佢係連續劇咁睇，就非常滿意啦」：「精彩絕倫，劇力萬鈞，星光熠熠。」在政府收購業權上，他就指居民只能選擇賣或不賣：「但就算你剷平宏福苑，都唔能夠剷走167個街坊、1個消防員，同1,900幾戶無家可歸嘅罪責。」
謝先生居住在宏仁閣中層，他今早上樓執拾。在訪問中，謝先生嘲諷當局的處理手法：「如果你當佢係連續劇咁睇，就非常滿意啦」：「精彩絕倫，劇力萬鈞，星光熠熠。」他不點名「大讚」市建局證人樓宇復修部總監王思敬在聽證會的發言，即「招標妥」「真係做到由亂到治」：「無招標妥都未燒七幢，有咗招標妥先燒咗七幢，佢係咪調轉咗兩個字呀？係咪應該由治及亂呀？」
他又斥責九九九報案中心在大火當日，接獲居民報案中仍問「要唔要消防員」：「好似睇緊周星馳啲戲，大佬仲要問，梗係要消防員啦，唔通要輔導員咩！好心教啲有用嘢俾佢，我無記錯個街坊過咗身呀，咁仲唔劇力萬鈞呀？」
不滿拒成立獨立調查委員會 應由保險公司賠償居民
對於事態發展，謝先生稱「唔理了」，指當局自選擇召開獨立委員會，而不是成立獨立調查委員會「已經覺得唔關我事」、「咪當連續劇追吓咪算囉」。在政府收購業權上，他指居民只能選擇賣或不賣：「就算你剷平宏福苑，都唔能夠剷走167個街坊，1個消防員，同1,900幾戶無家可歸嘅罪責。」
謝先生認為應由保險公司賠償宏福苑居民，包括決定是否翻新或重建大廈：「理應係保險公司核實咗情況，先出重置方案㗎嘛。點解你咁慷慨，跳出嚟話做呢單善後工作。其實唔需要咁慷慨，如果責任人唔係佢。」
點名管浩鳴、何君堯釘子戶論 反問「口釘係邊個做出嚟」
除此之外，謝先生質疑政府提出的七成收購門檻不合理：「請問依家係市區重建咩？有強拍門檻㗎咩？無㗎嘛！」他點名指立法會議員管浩鳴、何君堯均要求立法「解決」釘子戶：「我想問，嗰口釘係邊個做出嚟？又係邊個將呢釘，揼落嚿木度呢？」
在大火中，謝先生的單位未有受災，指屋企的所有物品「基本上」都可以取回，「我又唔明白點解我要被限制」。他坦言回家「無乜心情」、「執完嘢咪落嚟」：「好多人維持我情緒嘅穩定㗎嘛，我都唔可以有咩心情㗎。」
資料圖片
斥政府取締法團不盡責
至於是否希望舉行業主大會，謝先生稱「唔係我想唔想開」：「係法例要求我哋開㗎嘛，大火到依家半年喎。你取締咗人哋個業主立案法團，但你又無盡責做業主立案法團嘅職責，咁你做個業主立案法團嚟做咩？你攞個業主立案法團嚟做乜嘢先？」
謝先生斥當局安排合安協助管理屋苑，如同公正行未件檢查便要劏車：「然後賠嗰嚿錢又唔夠買過架車喎，然後又同你講你架車40年啦嘛，要折舊㗎嘛，但折唔折舊唔關我事㗎嘛，你應該搵返責任人出嚟攞個賠償呀嘛，你猛同我講話3,000萬，你同我講仲做咩啫，你同個責任人講囉。喂，我架車被人攞咗囉，我要返架車之嘛，保險公司賠囉！」
簡先生與兒子Jimmy
小學生步行24層回家 望拾回書簿和相片
另一居民、宏昌閣的簡先生亦在今日上樓執拾，他指單位承載三代人的回憶。他與兄妹在單位長大，兒子Jimmy 童年亦在該處度過。Jimmy 在大埔浸信會公立學校六年級，每日放學後都會先到嫲嫲位於宏昌閣24樓的單位。
由於首輪上樓名額只有4人，Jimmy 未能上樓，今次獲伯父讓出名額，才能與父親一同上樓。Jimmy 稱對上樓感到期待，最希望拾回書簿和相片等珍貴物品：「我想去攞返我喺我嫲嫲屋企嗰啲嘢，想攞返嗰啲回憶。」雖然要步行24層樓梯，Jimmy 仍然信心十足，笑言：「每日返學都行咁多樓梯㗎啦。」
蕭先生
宏建閣25樓居民蕭先生年屆70歲，上月因擔心體能和眼疾而未隨家人上樓，今日是他大火後首次嘗試回家：「試吓啦，得唔得都好啦，諗住慢慢行囉，行到就行，行唔到咪行返轉頭，無乜壓力。」他形容過去半年流離浪蕩，失去住所「心掛掛」，「而家好啲咁多」。至於未來出售業權和「樓換樓」的意向，蕭先生指可供選擇的資助房屋未完全適合他，「有啲換九龍（屋苑）未必有，有嘅亦都好貴，你知我哋幾廿歲都唔做按揭㗎啦，買唔起就算㗎喇」。