（獨媒報導）大埔宏福苑居民第二日分批上樓執拾，譚先生在宏新閣17樓擁有兩個相鄰單位。他今早先與家人到其中一個單位上樓執拾前，在記者面前一度哽咽：「真係好差，始終住咗咁多年，係差㗎啦，無得救。」他上樓後尋獲少量金飾、夾萬及兩隻麥當勞Hello Kitty九索麻雀；另有同層鄰居不便上樓，他遂協助對方買花及鞠躬悼念在火災中罹難的愛貓，「好幸運地幫佢搵到紀念價值嘅嘢」。
譚先生與妻子在宏福苑居住了30多年，在兒子出生後購入同層的相鄰單位。他今早與妻子、兒子及外傭一同上樓執拾，他向記者形容單位「基本上燒晒」、「有95%燒晒」：「真正攞到嘅好幸運有兩個夾萬拎到，燶晒未打開，因為鎖住咗。希望打開之後，現金預算冇咗，希望攞返啲金飾。」
另外，譚先生提到，妻子在家中找到金鏈、藍寶石戒指，及一對麥當勞Hello Kitty九索麻雀，兒子就拾獲玩具，惟工人則未能尋獲金飾，「到時睇吓點樣補償返俾佢」。
金鏈（受訪者提供）
戒指（受訪者提供）
麥當勞Hello Kitty九索麻雀（受訪者提供）
被問進入單位感受一度哽咽 同層多個單位「燒到無門」
被問到進入單位時候的感受，譚先生一度哽咽：「真係好差，始終住咗咁多年，係差㗎啦，無得救。」他稱在看到「一戶一社工」提供單位門口的相片後已感到十分恐怖，看到單位內部情況後更是打定輸數，同層多個單位「燒到無門」。
譚先生花費了約5,600元，購買外骨骼輔助器方便行樓梯上樓執拾。他指裝備協助了自己四分一力，笑言與家人及民安隊在上樓期間齊上齊落。他透露，有同層鄰居不便上樓，遂協助對方買花及鞠躬悼念在火災中罹難的貓貓，「好幸運地幫佢搵到紀念價值嘅嘢」。
與家人對角挖掘灰燼尋找物件 讚政府安排很好
當局安排譚先生與家人在今日早上及下午，分別到兩個單位執拾，因為樓板燒得太嚴重，需要避免石屎剝落墮下。在入屋後，他與家人亦要在對角輪流使用鏟子挖掘灰燼尋找物件，形容要「掘礦般」、「啲炭飛晒出嚟」。不過，他稱因為呼吸辛苦，需要戴上口罩，坦言戴口罩十分辛苦，稱佩服警察的付出，並指當局在走廊提供座椅及飲用水。
此外，譚先生大讚政府安排得很好，在挖掘期間有人員協助搬運：「真係好好，由17樓攞落樓下，幫我攞埋上車。」
譚先生單位內照片（受訪者提供）
苦笑稱是換樓的契機 寄語要重建生活
本身從事裝修的譚先生，他指大火將住所內的傢俬「燒到墮下去」、「好恐怖」，電梯大堂、走廊均被燻黑，自言「做咗幾廿年人」，才初次感受到火災的力量：「總之就人無事，屋企就OK嘅。」他與家人最後用了兩個多小時執拾，因為時間已經足夠。
記者問到是否有與居住多年的住所道別，譚先生苦笑稱「沒有特別」，反而告訴自己有換樓的契機，政府亦大力度協助居民：「我覺得應該都係放下，我寄語啦。我哋屋企齊整，但都唔可以套落人哋度，可能有人傷感、有人行咗嘅就冇嘢講。如果正常嚟講，望返要重建生活。」他更表示在火災當日，「知道屋企齊人」後，便「港車北上」到中山食乳鴿。
譚先生兒子Isaac
兒子多年前購入的渣古數年前才完成 沒準備告別式
譚先生的兒子、24歲的Isaac 是高達愛好者，其房間有一個擺滿模型的三層櫃，今日上樓卻只找回一個在小學時購買的渣古蝕刻片模型。談到該隻渣古，Issac 指雖然在多年前購入，卻是數年前才完成起來，指因為蝕刻片的金屬很薄，「切少少出嚟可以屈，係好高難度嘅」：「基本上我唔記得佢存在咁滯啦，所以冇啊，都係算啦。」
Isaac提供家中的相片
Isaac 早前從照片獲悉單位已「燒通哂」，所以已經有心理準備、「預咗係冇曬」：「不過有啲意外嘅就係有隻蝕刻片嘅渣古模型，咁樣樣就竟然連散都冇散啦，只係燶咗咁樣。」
對於失去家園，Isaac 顯得份外樂觀，形容上樓像跑馬拉松：「側邊有人打氣，仲有幾層、使唔使坐低休息。」至於在灰燼中尋找沒有被燒壞的物品，Isaac 指就如「細個嗰陣去沙灘邊掘蜆咁樣，攞住個剷喺度掘咁」。不少街坊在上樓執拾期間，均向居住多年的住所作告別。Isaac 就表示「冇乜儀式感」，即使自小在該處長大，但沒有準備告別式。