（獨媒報導）隨內地大動作放寬防疫政策，港府亦宣布周四（29日）起取消絕大部分防疫措施，包括實施逾10個月、爭議聲一直不絕的「疫苗通行證」。眼見網民紛紛恭賀從未接種疫苗的「零針人」，《獨媒》邀請11位沒打針的香港市民寫下心聲，告訴大家他們曾經作為社會中的極少數，如今有何感受。
受訪者中，有人是教育工作者，有人是文員，有人是長期病患者。不少人不約而同提到，不打針除了是因為個人身體狀況，也因為他們不希望「打針換人權」。為此他們付出的代價，包括失業、情緒焦慮、和親友聚會的機會、出行的自由⋯⋯
如今重獲「自由」，有人說開心之餘感到可悲，因為「我只係攞返我應有嘅人權」；有人感謝自己一直堅持，「我選擇咗健康同自由」；有人形容感覺如「打完一小場仗」，也有人說「我唔覺得自己贏，因為我都付出咗好多」。
相關報導：
訪五個沒打針的香港人：被限制出入場所的日子，我覺得自己像活在地下城
親睹父親打針後離世 11歲小六生拒接種無奈退出校隊：失望、孤獨
＊＊＊＊＊＊＊＊＊
Tommy，30歲，待業 （前職：銀行前線員工）
零針原因：唔想做人體實驗嘅其中一個數據、信唔過支針
感受：一場唔知邊度爆發嘅病毒同幾款用幾個月、唔知用咩整出嚟嘅疫苗，老實講，信唔過。
其實我係疫情嘅尾聲先無咗份工，無收入又無公司會請，好多都話要打針，連唔使打針嘅office工都要人打針，搞到啲零針嘅好似帶菌者咁。仲被剝奪咗好多人權，出去食個飯都要打針。
最好笑係打唔打針，同中唔同Covid係無關係，到最後只係話防重症，咁有咩用？！死唔去，仲一身後遺症，醫返都要時間啦！
依家話唔使疫苗通行證，係好開心，但諗深一層其實好可悲。我只係攞返我應有嘅人權，搞到好似係恩賜咁。
政策朝令夕改，都係袋住先㗎咋。政府想通關，新年放人入香港帶旺經濟。大陸疫情又爆緊，病毒會唔會帶嚟香港，對香港醫療負擔重唔重，政府只係一句有信心就好似咩都得。其實市民只有硬食，根本咩都做唔到。
＊＊＊＊＊＊＊＊＊
阿T，25歲，議員助理
零針原因：不想配合疫苗通行證
感受：終於唔使偷偷摸摸！一年來要用各種方法例如期待「中招」等，其實真係好辛苦之餘，都疲於同親戚朋友解釋。唔打針都係令自己以及身邊朋友唔好忘記逼迫依然存在，唔好慣咗就無嘢。與其話係興奮開心，倒不如話係Relieved，好似打完一小場仗咁。
＊＊＊＊＊＊＊＊＊
Lewis，30歲，文員
零針原因：支針預防唔到感染，對我嚟講等同冇用
感受：2022年12月28日，經歷咗近乎一年，終於取消疫苗通行證，我想同自己講，多謝自己一直堅持，保持清醒，理解自己同其他人有時係會唔一樣。
過去一段時間，冇得去鍾意嘅餐廳坐低食嘢，唔緊要，食外賣都生存到啫；攰到仆街都冇得係cafe坐吓，唔緊要，公園都有凳啫；冇得去戲院睇戲，唔緊要，等兩三個月Disney Plus同Netflix就會上映，一樣睇到啫；冇咗以前嘅娛樂，唔緊要，生活方式係可以改變啫；職場上機會係就係少咗，唔緊要，可以慢慢嚟追返啫。
多謝自己，一直都好清楚自己其實係有選擇，我選擇咗健康同自由。
＊＊＊＊＊＊＊＊＊
Raymond，27歲，老師
零針原因：身體不適合，也認為打針才有基本自由不合公義
感受：有小部份小朋友因為各種原因無打疫苗。呢班小朋友無辦法參與校內校外嘅課外活動，課後活動佢無得玩，旅行日入主題樂園佢入唔到，運動會佢無份參加，佢只可以返學校自修。佢哋無法經歷成長中好美好嘅一啲片段，無打針嘅同學又覺得自己拖累其他同學無得全日復課，覺得有壓力。我為佢哋覺得心痛，但唔知可以點算，會質疑自己有無盡到老師應有嘅責任。
但今日終於撤銷疫苗通行證啦，之前因為確診同各種僥倖捱到今日，一路堅持過程都好掙扎，都有啲感觸。希望我哋可以更齊心為未來努力，希望我嘅學生可以有自由過佢哋應有嘅童年生活。
＊＊＊＊＊＊＊＊＊
Christy，24歲，自僱人士
零針原因：濕疹醫咗十幾年先好返，實在唔想搏
感受：我最希望佢取消疫苗通行證嘅period已經過咗，我亦都已經慣咗少出街，「入唔到去唔到就罷就」嘅日子，所以取消張證對而家嘅我影響唔大。
不過！因為呢個麻煩QR code，我經歷過好多不必要嘅焦慮，因為咁而探唔到喺醫院嘅屋企人、長期擔心見唔到屋企人最後一面、推過無數次飯局、同屋企人嘈過俾人逼過、因為咁quit咗份工……
當呢一切都過去，而家就話取消張證，感覺都幾微妙，有捱出頭嘅感覺，但我唔覺得自己贏，因為我都付出咗好多，點可以因為咁而忘記？
淨係希望之後健健康康，冇其他～
＊＊＊＊＊＊＊＊＊
C先生，28歲，運動教練
零針原因：不相信疫苗及個人心臟問題
感受：從疫苗通行證生效開始，我剛好處於停工階斷，及後因為確診而獲得康復碼，能夠暫時繼續工作，但一直擔心康復碼到期會手停口停。當時我每日都諗，需唔需要因為份工而去打針？定係轉行？但轉行亦難以確保搵到一份適合自己、而又唔洗打針嘅工作，每日都活在壓力及恐懼之下。
我在工作中會接觸不同年齡嘅小朋友，亦見唔少學生因打完第一針身體不適，唔再打針而被逼停止訓練，對佢地亦唔公平。因身體問題不能滿足所謂疫苗通行證要求，而被逼放棄喜愛嘅運動，亦沒有選擇嘅權利，我身為教練充滿無力感，同時亦很難過。
到今日終於取消疫苗通行證，希望無論小朋友定大人唔再需要面對依一年嘅壓力，生活回復正常，可以自由做自己想做嘅事。
＊＊＊＊＊＊＊＊＊
陳小姐，21歲，Freelancer
零針原因：唔想用針卡換基本人權
感受：終於唔使驚同人講自己冇打針會俾人歧視、俾人覺得點解要咁aggressive，然後自己都懷疑埋自己的決定，明明只係選擇緊所有人都應該平等享有的alternatives。同埋一份唔使打針的長工本身已經唔容易搵，而家終於唔使驚做freelance都俾人問有冇打針！
＊＊＊＊＊＊＊＊＊
Venus，25歲，文化工作者
零針原因：唔想因為配合政府谷針、疫苗通行證而打針
感受：呢三年嘅種種限制所謂防疫條例，剝削咗本身大家應該有嘅自由同權利，宜家取消疫苗通行證，其實只不過係攞返大家與生俱來嘅部份自由。唔好唔記得因為限聚令，我哋已經幾年冇咗遊行示威嘅自由啦。
相關報導：
回顧1005日限聚令：三度收緊至二人、林鄭早承認沒科學基礎、罰款逾1.45億
＊＊＊＊＊＊＊＊＊
Sharon（化名），39歲，文職人員
零針原因：有多次藥物過敏及住院不快經驗，不想再受藥物副作用困擾；對兩款疫苗沒信心；自己沒打針亦沒感染，不解為何仍要打針；認為強迫打針不合邏輯、道德和人權
感受：我早前因七醫生免針紙事件，接受《獨媒》訪問，之後亦因免針紙失效而再次過「紅碼」生活。直到現在，我仍認為個人不打針的體質及扺抗力，比打了疫苗還好。
在免針紙事件報導刊出後，我再次因皮膚敏感而服食抗敏丸，並出現關節痛，加重了原本類風濕關節炎的病情，因而對本港兩款疫苗更加抗拒。我本身認識很多類風濕／紅斑狼瘡病患的朋友，因打疫苗而「無病變有病」，或者令原本受控的病情失控。
假如我一早打齊三針，就不會面對生活上各式各樣的困難和歧視，但我仍選擇零針，用行動對政府及疫苗作出投訴同抗議，不會因為困難就放棄。
＊＊＊＊＊＊＊＊＊
馬小姐，27歲，文員
零針原因：2款疫苗均無註冊（註），復必泰更加係採用mRNA技術，擔心長遠對人體有負面影響。
感受：終於捱過咗呢段不平等嘅日子。曾經希望以中肺炎黎換取免針，諗返覺得幾諷刺，一個人嘅基本人權要用身體健康嚟換取，小朋友更加慘，冇打針連課外活動都冇得參加。明明打唔打針係個人選擇，但就變到唔打就冇咗好多社交生活。嚟緊希望可以約齊家人朋友堂食、聚會。
（註：目前科興及復必泰疫苗，是根據香港法例第599K章《預防及控制疾病（使用疫苗）規例》獲認可使用，它尚未根據第138章《藥劑業及毒藥條例》在香港註冊。）
＊＊＊＊＊＊＊＊＊
區太一對子女，7歲和4歲，學生
零針原因：擔心疫苗副作用
區太感受：之前因為子女沒打針，生活有少少影響，不能去圖書館、遊樂場，也不能參加學校旅行。現時不用打針和掃安心出行當然開心，但仔女聽到可以進入餐廳後，都因為擔心而不願意去：「驚話捉到會罰錢吖。」女兒說想去遊樂場玩，但我們沒計劃未來幾日假要到哪裡，因為假期後他們要考試（笑）。此外，我們一家人都曾經確診，所以不擔心措施放寛後會再感染。